ആലപ്പുഴ: ക്രൈസ്തവ സഭകളുടെ പ്രതിഷേധത്തിനും സാംസ്കാരിക മന്ത്രി സജി ചെറിയാന്റെ കടുത്ത വിമര്ശത്തിനുമൊടുവില് കക്കുകളി നാടകം അവതരിപ്പിക്കുന്നത് പുന്നപ്ര പറവൂര് പബ്ലിക് െലെബ്രറി നിര്ത്തിവച്ചു. െലെബ്രറിയുടെ കീഴിലുള്ള നെയ്തല് നാടക സംഘമാണ് കക്കുകളി അവതരിപ്പിച്ചിരുന്നത്.
കന്യാസ്ത്രീ മഠത്തിലെ പെണ്കുട്ടിയുടെ സ്വാതന്ത്ര്യ പ്രഖ്യാപനത്തിന്റെ കഥ പറഞ്ഞ നാടകത്തിനെതിരേ വന് പ്രതിഷേധമാണ് ഉയര്ന്നത്. നാടകം കന്യാസ്ത്രീ മഠങ്ങളെ മനഃപൂര്വം അപമാനിക്കാനാണെന്ന് ആരോപിച്ചായിരുന്നു പ്രതിഷേധം. നാടകാവതരണം തടയണമെന്നാവശ്യപ്പെട്ട് കെ.സി.ബി.സി. ഉള്പ്പടെ വിവിധ ക്രൈസ്തവ സംഘടനകള് സര്ക്കാരിനേയും സമീപിച്ചിരുന്നു. ഇതിനിടെയാണ് പറവൂര് പബ്ലിക് െലെബ്രറിയുടെ പുതിയ പ്രസിഡന്റ് ഡോ. എസ്. അജയകുമാറും സെക്രട്ടറി കെ.വി. രാഗേഷും നാടകാവതരണം തല്ക്കാലികമായി നിര്ത്തിവയ്ക്കുന്നതായി പത്രക്കുറിപ്പിലൂടെ വ്യക്തമാക്കിയത്.
പബ്ലിക് െലെബ്രറി എന്ന നിലയില് സ്ഥാപനം പൊതുഇടമാണെന്നും വിവാദത്തില് താല്പര്യമില്ലെന്നുമാണ് െലെബ്രറി പ്രസിഡന്റ് അജയകുമാര് വിശദീകരിക്കുന്നത്. ആരുടേയും സമ്മര്ദംകൊണ്ട് നിര്ത്തുന്നതല്ലെന്നും കേസ് െഹെക്കോടതിയിലുണ്ടെന്നും ആരെയും വേദനിപ്പിക്കാന് ഉദ്ദേശിച്ച് ഒരുക്കിയ നാടകമായിരുന്നില്ലെന്നും അജയകുമാര് പറയുന്നു.
പറവൂര് പബ്ലിക് െലെബ്രറിയുടെ 75-ാം വാര്ഷികത്തിന്റെ ഭാഗമായിട്ടാണ് കേരള സംഗീത നാടക അക്കാദമിയുടെ സഹായത്തോടെ ഈ നാടകം ചിട്ടപ്പെടുത്തിയത്. പ്രശസ്ത കഥാകൃത്ത് ഫ്രാന്സിസ് നൊറോണയുടെ കെ.സി.ബി.സി. പുരസ്കാരം നേടിയ തൊട്ടപ്പന് എന്ന കഥാസമാഹാരത്തിലെ കഥയായിരുന്ന കക്കുകളിയുടെ സ്വതന്ത്രാവിഷ്കാരമായിരുന്നു നാടകം. ജോബ് മഠത്തിലാണ് സംവിധാനം നിര്വഹിച്ചത്.
അതേസമയം, നാടകാവതരണം അവസാനിപ്പിക്കാന് പറവൂര് പബ്ലിക് െലെബ്രറി തീരുമാനമെടുത്തത് തന്നെ പോലും അറിയിക്കാതെയാണെന്ന് സംവിധായകന് ജോബ് മഠത്തില് കുറ്റപ്പെടുത്തി. പറവൂര് പബ്ലിക് െലെബ്രറിയുടേത് ഏകപക്ഷീയമായ തീരുമാനമായിപ്പോയെന്നും അദ്ദേഹം പ്രതികരിച്ചു.
