ബംഗലുരു: കര്ണാടകത്തില് ഭരണം പോയാല് അത് ഗുണകരമാകുക ബിജെപിയ്ക്ക് തന്നെയെന്ന് രാഷ്ട്രീയ വിദഗ്ദ്ധര്. 2024 ല് ലോക്സഭാ തെരഞ്ഞെടുപ്പ് നടക്കാനിരിക്കെ കര്ണാടകയില് ഭരണം നഷ്ടമാകുന്ന സ്ഥിതി ഗുണകരമായ ഒരു പാഠമായി നരേന്ദ്രമോഡിയ്ക്കും സംഘത്തിനും മാറുമെന്നാണ് വിലയിരുത്തല്.
കര്ണാടകയില് വോട്ടെടുപ്പ് കഴിഞ്ഞ് ഫലം കാത്തിരിക്കെ കോണ്ഗ്രസ് ഏറ്റവും വലിയ ഒറ്റക്കക്ഷിയായി മാറുമെന്നാണ് മിക്ക സര്വേകളും പ്രവചിച്ചിരിക്കുന്നത്. അതേസമയം തൂക്കുമന്ത്രിസഭ വരാനുള്ള സാധ്യത പ്രവചിക്കപ്പെട്ടിട്ടുള്ള കര്ണാടകത്തില് ഭരണം നഷ്ടമാകുന്നത് ബിജെപിയ്ക്ക് വലിയ തിരിച്ചടിയായി മാറിയേക്കും. കര്ണാടകയില് ഭരണം നഷ്ടമായാല് ദക്ഷിണേന്ത്യയിലെ ബിജെപിയുടെ പിടി അയയുകയും കോണ്ഗ്രസിന് പുതുജീവനായും മാറും. അതേസമയം വമ്പന് യുദ്ധക്കളമായ 2024 ലോക്സഭാ തെരഞ്ഞെടുപ്പിലേക്ക് കൂടുതല് ശക്തമായി തിരിച്ചുവരാന് നരേന്ദ്രമോഡിയ്ക്ക് ഇത് ഷോക്ക് ട്രീറ്റുമെന്റാകുമെന്നാണ് കരുതുന്നത്.
എന്നിരുന്നാലും കര്ണാടകത്തിലെ പരാജയം ബിജെപിയുടെ പാന് ഇന്ത്യന് പാര്ട്ടി എന്ന വിളിപ്പേരിന് മങ്ങലേല്പ്പിക്കും. 2024 ല് ലോക്സഭാ തെരഞ്ഞെടുപ്പിലേക്ക് തിരിച്ചുവരവിന് ആത്മവിശ്വാസമേറ്റുകയും ചെയ്യുമെന്നാണ് വിലയിരുത്തല്.
ബിജെപിയെക്കുറിച്ച് പുതിയതായി പുസ്തകം എഴുതുന്ന രാഷ്ട്രീയ തന്ത്രജ്ഞനും എഴുത്തുകാരനുമായ നളീന് മെഹ്ത കര്ണാടകാ തെരഞ്ഞെടുപ്പിനെ രണ്ടു പാര്ട്ടികളുടേയും അഭിമാന പോരാട്ടമായി വിലയിരുത്തുന്നുണ്ട്. വോട്ടര്മാര്ക്കിടയില് എന്താണ് പ്രവര്ത്തിക്കേണ്ടത് എന്ന കാര്യത്തില് മോഡിയ്ക്ക് പുതിയൊരു പാഠം നല്കുമെന്ന് നളീന് വിലയിരുത്തുന്നു. ദക്ഷിണേന്ത്യയില് ലോക്സഭയിലേക്ക് ഏറ്റവും കൂടുതല് സീറ്റുകളുള്ള സംസ്ഥാനങ്ങളില് ഒന്നാണ് കര്ണാടക. 28 സീറ്റുകള് ഇവിടെയുണ്ട്. 39 സീറ്റുകളുള്ള തമിഴ്നാടാണ് ഇവര്ക്ക് മുന്നിലുള്ളത്. കര്ണാടകയ്ക്ക് അപ്പുറത്തേക്ക് ദക്ഷിണേന്ത്യയില് പാര്ട്ടി വളര്ത്താന് പാടുപെടുന്ന ബിജെപിയ്ക്ക് കര്ണാടകയിലെ തോല്വി വലിയ ആശങ്കയാകും സമ്മാനിക്കുക.
കര്ണാടക തെരഞ്ഞെടുപ്പിലെ നഷ്ടം പ്രധാനമന്ത്രിയെയാകും കൂടുതല് ബാധിക്കുകയെന്നും അദ്ദേഹം തന്റെ് വ്യക്തിപരമായ സാന്നിദ്ധ്യം കൂടുതലായി ഇവിടെ ഉപയോഗിച്ചിരുന്നതായും ന്യൂഡല്ഹിയിലെ സെന്റര് ഫോര് പോളിസി റിസര്ച്ചിലെ സീനിയര് ഫെലോയായ ഗില്ലസ് വെര്ണിയേഴ്സ് പറയുന്നു. കര്ണാടകാ തെരഞ്ഞെടുപ്പ് ലക്ഷ്യമിട്ട് തെരഞ്ഞെടുപ്പിന് മുമ്പ് അനേകം റാലികളിലും റോഡ്ഷോകളിലുമാണ് മോഡി പ്രത്യക്ഷപ്പെട്ടത്. ആറ് റോഡ്ഷോകളില് പങ്കാളിയായ നരേന്ദ്രമോഡി കര്ണാടകത്തില് ബിജെപിയുടെ 19 പൊതുപരിപാടികളിലാണ് സംബന്ധിച്ചത്.
