സ്ത്രീധനത്തിന്റെ പേരിലും മറ്റു കാരണങ്ങള് കൊണ്ടും ഭര്ത്താവ് തന്നെ ശാരീരികമായും മാനസീകമായും പീഡിപ്പിക്കുന്നെന്ന് കാണിച്ച് ഭര്ത്താവിനെതിരേ രാജകുടുംബത്തില് നിന്നുള്ള യുവതിയുടെ പരാതി. ഭര്ത്താവ് ആര്കേശ് നാരായണ സിംഗിനെതിരേ ഉത്തരാഖണ്ഡിലെ ബോലംഗീര് രാജകുടുംബത്തില് നിന്നുള്ള മുന്പ്രധാനമന്ത്രി വി.പി. സിംഗിന്റെ കൊച്ചുമകളുമായ ആദ്രിജാ മാഞ്ജാരി സിംഗ് ആണ് രംഗത്ത് വന്നത്.
അടുത്തിടെ ഉത്തരാഖണ്ഡ് ഡിഐജിയെ നേരില് കണ്ട് തനിക്ക് നീതിവേണമെന്ന് ഇവര് ആവശ്യപ്പെട്ടിരുന്നു. തുടര്ന്ന് ഡിജിപി കേസ് ഡെറാഡൂണിലെ എ എസ് പിയ്ക്ക് പരാതി കൈമാറിയിട്ടുണ്ട്. ഗുരുതരമായ ആരോപണമാണ് ഭര്ത്താവിനെതിരേ ഉയര്ത്തിയിരിക്കുന്നത്. തന്നെ കൊലപ്പെടുത്താന് ഭര്ത്താവ് വാടകക്കൊലയാളിയെ വരെ ഏര്പ്പാടാക്കിയെന്നാണ് യുവതിയുടെ പരാതിയില് ആരോപിച്ചിട്ടുണ്ട്.
ഈ വിഷയത്തില് പോലീസില് പരാതി നല്കിയിരുന്നെങ്കിലും അവര് അതിനെ ഗൗരവമായി പരിഗണിച്ചിട്ടില്ലെന്നും ഇവര് പറയുന്നു. അനേകം തവണ പോലീസിനെ വിളിച്ചിട്ടും രക്ഷയില്ലെന്നും ഉത്തരാഖണ്ഡ് പോലീസ് ഇടപെടാന് കൂട്ടാക്കാതിരുന്ന സാഹചര്യത്തിലാണ് ഡിജിപിയെ സമീപിച്ചതെന്നും ഇവര് പറയുന്നു.
താന് ഇതുവരെ ഒരു പാര്ട്ടിയോടും രാഷ്ട്രീയത്തില് പ്രവേശിക്കാന് ടിക്കറ്റ് ചോദിച്ചിട്ടില്ലെന്നും ബോലാംഗീറിലെ ഒരു സാധാരണ പൗരയെ പോലെ ജീവിക്കുകയാണെന്നും ഇവര് പറഞ്ഞു. അനേകം സ്ത്രീകള് ദിവസേനെ ഗാര്ഹിക പീഡനത്തിന് ഇരയാകുന്നുണ്ട്. എന്നാല് പലരും പരാതി നല്കിയിട്ടുപോലും അവയൊന്നും മുമ്പോട്ട് വരുന്നില്ല. അവരിലെ ഒരു ഉദാഹരണമായി തനിക്ക് മാറാന് താല്പ്പര്യമില്ലെന്നും പറഞ്ഞു.
മുന് പ്രധാനമന്ത്രി വി.പി. സിംഗിന്റെ കൊച്ചുമകളാണ് ആദ്രിജ. ഇവര് ഇപ്പോള് ഉത്തരാഖണ്ഡിലെ സ്വന്തം കുടുംബത്തിനൊപ്പമാണ്. അതേസമയം സംഭവത്തില് അര്ക്കേശിന്റെ കുടുംബം പ്രതികരിച്ചിട്ടില്ല.
