സമൂഹ മാധ്യമങ്ങളില് സജീവമായിരിക്കുന്ന കൂടുതല് ആളുകളും ജീവിതത്തിലെ പല ഘട്ടങ്ങളിലും മറ്റുള്ളവരുടെ അഭിപ്രായം തേടാറുണ്ട്. ഇത്തരത്തില് കഴിഞ്ഞ ദിവസം തന്റെ ജീവിതത്തിലുണ്ടായ ഒരു സംഭവത്തിന് ഉത്തരം തേടി തന്റെ സോഷ്യല് മീഡിയ അക്കൗണ്ടിലൂടെ ഒരു സ്ത്രീ ചോദിച്ച ചോദ്യമാണ് ഏറെ ശ്രദ്ധ നേടുന്നത്. സ്ത്രീയുടെ പേരോ മറ്റ് വിവരങ്ങളോ ഇതില് വെളിപ്പെടുത്തിയിട്ടില്ല. കുടുബാംഗങ്ങളെയെല്ലാം മറ്റുപേരിലാണ് ഈ സ്ത്രീ പരിചയപ്പെടുത്തിയത്.
സ്ത്രീയുടെ വെളിപ്പെടുത്തല് ഇങ്ങനെ ആയിരുന്നു. ' ഭര്ത്താവിന്റെ സുഹൃത്തായ എന്നാല് തനിക്ക് അത്ര അടുപ്പമില്ലാത്ത ജെന് എന്ന സുഹൃത്തിന് ആദ്യത്തെ കുഞ്ഞുണ്ടായപ്പോള് ഭര്ത്താവ് ഒരു വില കൂടിയ (200-300ഡോളര് വിലയുള്ള) ബേബി ഷവര് സമ്മാനം നല്കി. വര്ഷങ്ങള്ക്ക് ശേഷം ജെന്നും അവളുടെ ഭര്ത്താവും ഉയര്ന്ന ഉദ്യോഗത്തിലെത്തി. അവരുടെ ജീവിത നിലവാരം ഉയര്ന്നു.
ഇതിനിടെ ജെന് വീണ്ടും ഗര്ഭിണിയായി. പിന്നാലെ വിലയേറിയ ബേബി ഷവര് സാധനങ്ങളുടെ ഒരു ലിസ്റ്റ് ജെന്, സ്ത്രീയുടെ ഭര്ത്താവിന് അയച്ച് കൊടുത്തു. ഇത് കണ്ട് തനിക്ക് ഞെട്ടലുണ്ടായെന്ന് അവര് എഴുതുന്നു. ജെന്നിന്റെ ലിസ്റ്റിലുണ്ടായിരുന്ന ഏതാണ്ട് 400 ഡോളറിന്റെ (33, 000 രൂപ) സാധനങ്ങളെല്ലാം ഭര്ത്താവ് വാങ്ങി ജെന്നിന് അയച്ച് കൊടുത്തു.
എന്നാല് ആഴ്ചകള്ക്ക് ശേഷം ജെന്നിന്റെ ഗര്ഭം അലസിപ്പോയി. ജെന്നിന് ഇനി ഒരിക്കലും ഒരമ്മയാകാന് കഴിയില്ല. അതിനാല് ആ കുഞ്ഞിന് വാങ്ങിയ സാധനങ്ങള്ക്ക് ഇനി പ്രസക്തിയില്ല. അതിനാല് ആ സാധനങ്ങള് തിരികെ ചോദിക്കാമോ? അതോ ന്ഷടപരിഹാരം ആവശ്യപ്പെടാമോ എന്നാണ് സ്ത്രീ ചോദിക്കുന്നത്. എന്നാല് ഈ ചോദ്യം നിരവധി ആളുകളുടെ ശ്രദ്ധയില് പെടുകയും അവര് പ്രതികരിക്കുകയും ചെയ്തു.
നിങ്ങള് അത് തിരികെ ചോദിക്കുകയാണെങ്കില് അത് മുറിവില് ഉപ്പ് വയ്ക്കുന്നതിന് സമമാണ്. കാരണം ഇപ്പോഴത്തെ അവരുടെ സാഹചര്യം അതാണെന്ന് പലരും ചൂണ്ടിക്കാട്ടി. നിബന്ധനകളും വ്യവസ്ഥകളുമില്ലാതെയാണ് സമ്മാനം നല്കുന്നതെന്നും അത് തിരികെ ചോദിക്കാന് പറ്റില്ലെന്നും ചിലര് അഭിപ്രായപ്പെട്ടു. എന്തെങ്കിലും തിരികെ പ്രതീക്ഷിച്ചാണ് നിങ്ങള് അത് നല്കിയിരുന്നെതെങ്കില് അതിനെ സമ്മാനമെന്ന് വിളിക്കാന് കഴിയില്ലെന്നും അത് പരസ്പരം സ്കോര് നിലനിര്ത്താനുള്ള കറന്സി മാത്രമാണെന്നും മറ്റ് ചിലര് എഴുതി.
ഏതായാലും ഉപദേശങ്ങള് എല്ലാം കേട്ടതോടെ താന് ജെന്നിനോട് ഈ കാര്യങ്ങള് ഒന്നും സംസാരിക്കില്ലെന്നും സമ്മാനം തിരികെ ചോദിക്കാന് ആഗ്രഹിക്കുന്നില്ലെന്നും ഈ സ്ത്രീ പറഞ്ഞു. ഇത്ര നല്ല ഉപദേശം നല്കിയവരോട് സ്ത്രീ തന്റെ നന്ദി അറിയിക്കുകയും ചെയ്തു.
