പാല്ഘര്: കൊടും വേനലില് രാജ്യത്തെ ഭൂരിഭാഗം ഇടങ്ങളും വരള്ച്ചയുടെ വക്കിലൂടെയാണ് കടന്നുപോകുന്നത്. പല സ്ഥലങ്ങളിലും ആളുകള് ദീര്ഘ ദൂരം നടന്നു ചെന്ന് വെള്ളം ശേഖരിച്ച് വീട്ടില് എത്തിക്കണ്ട അവസ്ഥയാണ് ഉണ്ടായിരിക്കുന്നത്. ഈ സാഹചര്യത്തിലാണ് സ്വന്തം അമ്മയെ സഹായിക്കാനായി ഒരു കൊച്ചു മിടുക്കന് അവിശ്വസനീയമായ ഒരു കാര്യം ചെയ്തിരിക്കുന്നത്. വീട്ടാവശ്യങ്ങള്ക്ക് വെള്ളമെടുക്കാനായി അമ്മയ്ക്ക് കൊടും ചൂടില് നദിയിലേക്ക് നടക്കേണ്ട ബുദ്ധിമുട്ട് ഒഴിവാക്കാനായി കിണര് കുഴിച്ച് നല്കിയിരിക്കുകയാണ് ആദിവാസി വിഭാഗത്തില് പെടുന്ന ഒരു 14കാരന്. മഹാരാഷ്ട്രയിലെ പാല്ഘറിലാണ് സംഭവം.
മുംബൈയില് നിന്ന് 128 കിലോമീറ്റര് അകലെയുള്ള പാല്ഘറിലെ കെല്വാ എന്ന ഗ്രാമത്തിലാണ് സംഭവം. ഇവര് താമസിക്കുന്ന ചെറുകുടിലിന്റെ മുറ്റത്ത് ആണ് 9ാം ക്ലാസ് വിദ്യാര്ത്ഥി തനിയെ കിണര് കുത്തിയത്. ഇനി മുതല് അമ്മയ്ക്ക് നദിയിലേക്ക് നടക്കേണ്ടതില്ലല്ലോയെന്ന എന്ന സന്തോഷമാണ് പ്രണവ് രമേഷ് സല്ക്കാര് എന്ന 14 കാരന്. ആദര്ശ് വിദ്യാ മന്ദിറിലെ 9ാം ക്ലാസ് വിദ്യാര്ത്ഥിയായ പ്രണവ് മണ്വെട്ടിയും ചെറിയ കോണിയും ഉപയോഗിച്ചാണ് ചെറുകിണര് നിര്മ്മിച്ചത്. കൂടാതെ പുളിയുടേയും ആല് മരത്തിന്റെയും കമ്പുകള് ഉപയോഗിച്ച് കിണറിന് ചെറുവേലി തീര്ക്കുകയും ചെയ്തിട്ടുണ്ട് പ്രണവ്.
ദിവസം മുഴുവന് കിണറ് കുഴിയില് ഏര്പ്പെട്ടിരുന്ന പ്രണവ് ഉച്ചഭക്ഷണത്തിനായി മാത്രമാണ് വിശ്രമിച്ചതെന്നാണ് അമ്മ ദര്ശന പറയുന്നത്. 20 അടിയോളം ആഴമുള്ളതാണ് കിണര്. കെല്വയിലെ ഒരു പച്ചക്കറി തോട്ടത്തിലെ തൊഴിലാളിയാണ് പ്രണവിന്റെ പിതാവ് രമേഷ്. കിണറിന് ഭംഗിയായി ഒരു മൂടി തയ്യാറാക്കാനും മണ്കട്ടകള് കൊണ്ട് കിണറ് കെട്ടാനും പിതാവ് രമേഷ് സഹായിച്ചതായി പ്രണവ് പറയുന്നു. മകന്റെ കഠിനാധ്വാനത്തെ അഭിനന്ദിക്കുന്നതിനായി ചെറുകിണറിന് മുകളിലായി മകന്റെ പ്രവര്ത്തി വിശദമാക്കുന്ന ഒരു ചെറുകുറിപ്പും ഇവര് സ്ഥാപിച്ചിട്ടുണ്ട്.
കിണറില് വെള്ളം കണ്ടതിനെ തുടര്ന്ന് താന് അതീവ സന്തോഷവാനാണെന്നും ഈ വാര്ത്ത അറിഞ്ഞ ഉടനെ ഗ്രാമത്തിലുള്ളവരും അധ്യാപകരും തന്റെ വീട്ടിലെത്തി അഭിനന്ദിച്ചു എന്നും പ്രണവ് ദേശീയ മാധ്യമങ്ങളോട് പങ്കുവച്ചു. കിണറ് കുഴിച്ചതോടുകൂടി അമ്മ ഇനി കഷ്ടപ്പെടേണ്ടി വരില്ല എന്ന സന്തോഷമാണ് പ്രണവിനെയും കുടുംബത്തെയും സന്തോഷത്തിലാക്കുന്നത്.
