സംവിധായകന് കമലിനെ വര്ഗീയവാദിയായി ചിത്രീകരിക്കുന്നതിനെതിരെ ഗാനരചയിതാവ് റഫീക് അഹമ്മദ്. ചിറയിന്കീഴ് അബ്ദുള്ഖാദറെ എന്ന് വിളിക്കപ്പെടും മുന്പ് പ്രേംനസീര് പോയത് നന്നായി. ഒന്നുമല്ലെങ്കിലും ശ്രീരാമനും ശ്രീകൃഷ്ണനുമൊക്കെ ആയി അഭിനയിച്ച ഒരു ദേഹമല്ലിയോ-റഫീക് അഹമ്മദ് ഫെയ്സ്ബുക്ക് പോസ്റ്റില് പരിഹസിച്ചു.
തിരുവനന്തപുരം അന്താരാഷ്ട്ര ചലച്ചിത്ര മേളയോട് അനുബന്ധിച്ചുണ്ടായ ദേശീയഗാന വിവാദത്തെ തുടര്ന്നാണ് കമലിനെ കമാലുദീനെന്ന് വിളിച്ച് സംഘപരിവാര് സംഘടനകള് രംഗത്ത് വന്നത്. കമല് വര്ഗീയവാദിയാണെന്നും തീവ്രവാദിയാണെന്നും ഐ.എഫ്.എഫ്.കെ വേദിയില് മുദ്രാവാക്യമുയര്ന്നു.
അന്താരാഷ്ട്ര ചലച്ചിത്ര മേളയില് എല്ലാ പ്രദര്ശനങ്ങള്ക്കും മുന്പ് ദേശീയഗാനം ആലപിക്കുന്നതിനെ എതിര്ത്ത് കൊടുങ്ങല്ലൂര് ഫിലിം സൊസൈറ്റി സുപ്രീം കോടതിയില് ഹര്ജി നല്കിയിരുന്നു. ഇതിന് പിന്നില് കമലാണെന്ന് ആരോപിച്ചായിരുന്നു സംഘപരിവാര് സംഘടനകളുടെ പ്രതിഷേധം.
