പത്തനംതിട്ട : ഐ.എ. ക്യാമറകളുടെ കാര്യത്തില് മാത്രമല്ല തദ്ദേശ സ്വയംഭരണ സ്ഥാപനങ്ങളില് സ്ഥാപിക്കുന്ന വിവിധ തരം ലൈറ്റുകളുടെ കരാറുകളും അനധികൃതമായി മറിച്ചുകൊടുത്ത് കെല്ട്രോണ് പ്രതിവര്ഷം കൈക്കലാക്കുന്നത് കോടികള്. നിയമപ്രകാരം സ്വന്തമായി ലൈറ്റുകള് നിര്മ്മിച്ച് പദ്ധതി നിര്വഹണം നേരിട്ട് നടത്തേണ്ട കെല്ട്രോണ്, പല രാജ്യാന്തര കമ്പനികള്ക്കും ലോക്കല് കമ്പനികള്ക്കും ഉപകരാര് നല്കി പദ്ധതി നടപ്പാക്കുകയാണ് ചെയ്യുന്നതെന്നു രേഖകള് വ്യക്തമാക്കുന്നു. കൂടാതെ ചില മേഖലകളില് നിലവാരം കുറഞ്ഞ ബള്ബുകളും സ്ഥാപിക്കുന്നുവെന്ന് ആരോപണവുമുണ്ട്. ഒരു സാമ്പത്തിക വര്ഷത്തില് അമ്പത് കോടിയിലധികം രൂപയുടെ പദ്ധതിയാണ് ഇത്തരത്തില് നടത്തുന്നത്.
ത്രിതല പഞ്ചായത്തുകളില് എല്.ഇ.ഡി, മിനിമാസ്റ്റ്, ഹൈമാസ്റ്റ്, സോളാര് എന്നീ ലൈറ്റുകള് സ്ഥാപിക്കാന് അനുമതിയുള്ള അക്രെഡിറ്റഡ് ഏജന്സിയാണ് കെല്ട്രോണ്. രണ്ടു തരത്തിലുള്ള പദ്ധതികളാണ് അക്രെഡിറ്റഡ് ഏജന്സികള് നടത്തുന്നത്. പ്രോജക്റ്റ് മാനേജ്മെന്റ് കണ്സള്ട്ടന്സി (പി.എം.സി)യാണ് ഒന്ന്. എന്നാല് സ്വന്തമായി നിര്മ്മിക്കുന്ന ഉത്പന്നം നേരിട്ടു സ്ഥാപിക്കണമെന്നു നിഷ്ക്കര്ഷിക്കുന്ന നോണ് പി.എം.സി. വിഭാഗത്തിലാണ് കെല്ട്രോണ് ഉള്പ്പെടുന്നത്. ഈ വിഭാഗത്തില് ടെന്ഡര് കൂടാതെ ഒരു കോടി രൂപ വരെ ചെലവാകുന്ന പദ്ധതികള് നടപ്പാക്കാന് സര്ക്കാര് അനുമതി നല്കിയിട്ടുണ്ട്. ഇതിന്റെ മറവില് പല രാജ്യാന്തര കമ്പനികളുടെ ബള്ബുകള്മാത്രമല്ല കോയമ്പത്തുര്, മുംബൈ, ഡല്ഹി തുടങ്ങിയ സ്ഥലങ്ങളിലുള്ള കടലാസു കമ്പനികളുടെ നിലവാരമില്ലാത്ത ബള്ബുകളും വാങ്ങി അതില് കെല്ട്രോണിന്റെ മുദ്ര പതിപ്പിച്ചാണ് വെട്ടിപ്പ് നടത്തുന്നതെന്ന് പ്രോജക്റ്റ് മാനേജ്മെന്റ് കണ്സള്ട്ടന്റ് കോണ്ട്രാക്റ്റര്മാര് ആരോപിക്കുന്നു.
രാജ്യത്ത് നിലനില്ക്കുന്ന ബ്യൂറോ ഓഫ് ഇന്ത്യന് സ്റ്റാന്ഡേര്ഡ് നിയമത്തിലെ കമ്പല്സറി രജിസ്ട്രേഷന് സ്കീമിലാണ് എല്.ഇ.ഡി. ഫ്ളഡ് ലൈറ്റും എല്.ഇ.ഡി. സ്ട്രീറ്റ് ലൈറ്റ് അടക്കമുള്ളവയും ഉള്പ്പെട്ടിട്ടുള്ളത്. ഇതനുസരിച്ച് ഐ.എസ്.ഐ മുദ്ര ഇല്ലാത്ത ഇത്തരം എല്.ഇ.ഡി. ലൈറ്റുകള് നിര്മ്മിക്കാനോ വില്ക്കാനോ പാടില്ല. എന്നാല് ഇതു പാലിക്കാതെയാണു നിലവാരം കുറഞ്ഞ ഇത്തരം ബള്ബുകള് കെല്ട്രോണ് സ്ഥാപിക്കുന്നത്.
കെല്ട്രോണ് സ്ഥാപിക്കുന്ന ലൈറ്റുകള് മാസങ്ങള്ക്കുള്ളില് കേടാകുന്നതും പതിവാണ്. യഥാര്ഥത്തില് 36 മാസം വാറന്റിയോടുകൂടിയാണ് പദ്ധതി കെല്ട്രോണ് നടപ്പാക്കുന്നത്. എന്നാല് കേടാകുന്ന ബള്ബുകള് യഥാസമയം മാറ്റി സ്ഥാപിക്കാന് അധികൃതര് തയ്യാറാകുന്നില്ല. എവിടെയെല്ലാം ബള്ബുകള് സ്ഥാപിച്ചിട്ടുണ്ടെന്നുപോലും അധികൃതര്ക്കു നിശ്ചയമില്ലെന്നും ആരോപണമുണ്ട്. ഇക്കാര്യം സര്ക്കാരിനു മുന്നില് പല തവണ കരാറുകാര് അറിയിച്ചിട്ടുണ്ടെങ്കിലും നടപടിയായിട്ടില്ല. ഇതിനാല് നിയമപരമായ മാര്ഗത്തിലൂടെ പരിഹാരം കാണാനാണു കരാറുകാരുടെ നീക്കം.
സജിത്ത് പരമേശ്വരന്
