യുഎഇയുടെ ചാന്ദ്രദൗത്യം പരാജയപ്പെട്ടത് ചന്ദ്രനിലേക്കുള്ള ദൂരം കണക്കാക്കുന്നതില് ലാന്ഡറിന് സംഭവിച്ച പിഴവ് നിമിത്തമെന്ന് കണ്ടെത്തല്. ചന്ദ്രോപരിതലത്തിന് അഞ്ച് കിലോമീറ്റര് മുകളില് വച്ച് റാഷിദ് റോവറിനെയും വഹിച്ചു കൊണ്ടുള്ള ഹകുട്ടോ ആര് ലാന്ഡറിന് നിയന്ത്രണം നഷ്ടമായതായി നിര്മാതാക്കളായ ഐ സ്പേസ് അറിയിച്ചു. ഹകുട്ടോ ആര് എം വണ് ലാന്ഡര് ഏപ്രില് 26നാണ് യുഎഇയുടെ റാഷിദ് റോവറിനെയും വഹിച്ചുകൊണ്ട് ചന്ദ്രോപരിതലത്തില് ഇടിച്ചിറങ്ങിയത്.
ദൗത്യം പരാജയപ്പെടാന് കാരണം ചന്ദ്രനിലേക്കുള്ള ദൂരം കണക്കാക്കുന്നതില് ലാന്ഡറിന് സംഭവിച്ച പിഴവെന്നാണ് വിലയിരുത്തല്. ലാന്ഡറിലെ സ്വയം നിര്ണയ സംവിധാനം ചന്ദ്രനിലേക്കുള്ള ദൂരം പൂജ്യം മീറ്ററെന്ന് കണക്കാക്കിയ സമയത്ത് പേടകം ചന്ദ്രന് അഞ്ച് കിലോമീറ്റര് ഉയരത്തിലായിരുന്നുവെന്ന് പരിശോധനകളില് വ്യക്തമായി. ലാന്ഡര് ഇതിന് ശേഷവും നിയന്ത്രിത വേഗത്തില് സോഫ്റ്റ് ലാന്ഡിങ്ങിന് ശ്രമിച്ചെങ്കിലും ഇന്ധനം തീര്ന്നത് തിരിച്ചടിയാവുകയായിരുന്നു. ഇതോടെ ലാന്ഡര് ചന്ദ്രോപരിതലത്തില് ഇടിച്ചിറങ്ങുകയായിരുന്നുവെന്നും നിര്മാതാക്കളായ ജാപ്പനീസ് കമ്പനി ഐ സ്പേസ് അറിയിച്ചു.
ദൂരം കണക്കാക്കിയതില് തെറ്റ് സംഭവിച്ചത് സോഫ്റ്റ് വെയര് തകരാര് മൂലമായിരിക്കാമെന്നാണ് വിലയിരുത്തല്. ഇതിനു പുറമേ 2021 ഫെബ്രുവരിയില് ചന്ദ്രനില് ലാന്ഡ് ചെയ്യാനുള്ള സ്ഥലം മാറ്റി നിശ്ചയിച്ചതും ദൗത്യം പാളാന് കാരണമായെന്ന് കരുതുന്നു. . ആദ്യ അറബ് ലോകത്തെ ചാന്ദ്ര ദൗത്യമായ റാഷിദ് റോവര് ഡിസംബര് 11നാണ് അമേരിക്കയിലെ ഫ്ലോറിഡയിലുള്ള കെന്നഡി സ്പേസ് സെന്ററില് നിന്ന് വിക്ഷേപിച്ചത്.
