നീണ്ട ഇടവേളയ്ക്കു ശേഷം അമ്മയുമായി ബന്ധം പുനഃസ്ഥാപിച്ചതിന്റെ സന്തോഷം പങ്കുവച്ചിരിക്കുകയാണ് പോപ് ഗായിക ബ്രിട്നി സ്പിയേഴ്സ്. മൂന്നു വര്ഷത്തോളമായി ബ്രിട്നി സ്പിയേഴ്സുമായി അകന്നുകഴിയുകയായിരുന്നു അമ്മ ലിന് സ്പിയേഴ്സ്. എല്ലാത്തിലുമുപരി 14 വര്ഷത്തിന് ശേഷം അമ്മയ്ക്കൊപ്പം സന്തോഷത്തോടെ ഒരു കാപ്പി കുടിക്കാന് സാധിച്ചത് തനിക്ക് ലഭിച്ച വലിയ അനുഗ്രഹമാണെന്നാണ് ഈ കൂടിക്കാഴ്ചയെ ബ്രിട്നി വിശേഷിപ്പിച്ചത്.
ഇന്നലെയാണ് മൂന്നു വര്ഷത്തിന് ശേഷം എന്റെ പ്രിയപ്പെട്ട അമ്മ വീട്ടിലെത്തുന്നത്. അതൊരു നീണ്ട കാലയളവായിരുന്നു. കുടുംബത്തില് വഴക്കുകള് സാധാരണമാണ്. പക്ഷേ കാലം എല്ലാ മുറിവുകളും ഉണക്കും. പരസ്പരം തുറന്നു സംസാരിച്ചതിലൂടെ പ്രശ്നങ്ങളെല്ലാം അവസാനിപ്പിക്കാന് സാധിച്ചു. ഞാന് അമ്മയെ ഒരുപാട് സ്നേഹിക്കുന്നു. 14 വര്ഷത്തിന് ശേഷം അമ്മയ്ക്കൊപ്പം സന്തോഷത്തോടെ ഒരു കാപ്പി കുടിക്കാന് സാധിച്ചത് എനിക്ക് ലഭിച്ച വലിയ അനുഗ്രഹമാണ്. ഇനി ഞങ്ങള്ക്ക് ഷോപ്പിങ്ങിന് പോകണം.' കുട്ടിക്കാലത്തെ ചിത്രം ഇന്സ്റ്റഗ്രാമില് പങ്കുവച്ചഷേശം ബ്രിട്നി കുറിച്ചു.
2021 ഒക്ടോബറിലാണ് 13 വര്ഷങ്ങള് നീണ്ട മാതാപിതാക്കളുടെ ഭരണത്തില് നിന്നബ്രിട്നി സ്പിയേഴ്സ് മോചനം നേടിയത്. 2008 മുതല് ബ്രിട്നിയുടെ സ്വത്ത് കൈകാര്യം ചെയ്തിരുന്നത് പിതാവ് ജാമി സ്പിയേഴ്സ് ആയിരുന്നു. മകള്ക്ക് മാനസിക പ്രശ്നങ്ങള് ഉള്ളതുകൊണ്ട് താന് രക്ഷാകര്തൃത്വം ഏറ്റെടുത്തു എന്നായിരുന്നു ജാമിയുടെ വാദം. കാമുകനില് നിന്ന് താന് ഗര്ഭിണി ആകാതിരിക്കാനായി പിതാവ് മരുന്നുകള് കഴിപ്പിച്ചിരുന്നുവെന്നും ബ്രിട്നി ആരോപണം ഉന്നയിച്ചിരുന്നു. തുടര്ന്ന് തന്റേയും തന്റെ സ്വത്തുക്കളുടേയും നിയന്ത്രണം തനിക്ക് തന്നെ മടക്കി നല്കണമെന്ന് ആവശ്യപ്പെട്ട് ഗായിക കോടതിയെ സമീപിക്കുകയായിരുന്നു. താരത്തിന് അനുകൂലമായി കോടതി വിധി വന്നിരുന്നു. എന്നാല് ഇതിനെ തുടര്ന്ന് അമ്മയ്ക്കെതിരെയും പരാതിയുമായി താരം രംഗത്തെത്തിയിരുന്നു. ശേഷം കഴിഞ്ഞ ദിവസമാണ് എല്ലാം മറന്ന് ബ്രിട്നി അമ്മയ്ക്കൊപ്പം ഒത്തുചേര്ന്നത്.
