തിരുവനന്തപുരം: മഴക്കാലം കണക്കിലെടുത്ത് സംസ്ഥാനത്തെ ആശുപത്രികളില് പ്രത്യേക പനി ക്ലിനിക്കുകളും പനി വാര്ഡുകളും തുടങ്ങുമെന്ന് ആരോഗ്യമന്ത്രി വീണാ ജോര്ജ്. പനി പകര്ച്ചപ്പനിയാകാന സാധ്യതയുള്ളതിനാല് ഏതു പനിയുള്ളവരും സ്വയം ചികിത്സ നടത്താതെ ഡോക്ടറെ കാണണമെന്നും എല്ലാ ജില്ലകളിലും ഡെങ്കിപ്പനി നേരിയ തോതില് വര്ധനവുള്ളതിനാല് കൂടുതല് ശ്രദ്ധിക്കണമെന്നും മന്ത്രി പറഞ്ഞു.
നാളെ മുതല് സംസ്ഥാനത്തെ താലൂക്ക് ആശുപത്രികള് മുതലായിരിക്കും പനി ക്ലിനിക്കുകളും പനി വാര്ഡുകളും ആരംഭിക്കുക. ഇന്നും നാളെയുമായി മരുന്നുകളുടെ സ്റ്റോക്ക് പരിശോധിക്കും. എല്ലാ ജില്ലാ മെഡിക്കല് ഓഫീസര്മാരും ഇവ ഉറപ്പ് വരുത്തണമെന്നും പറഞ്ഞു. ഡെങ്കിപ്പനി, എലിപ്പനി, സിക്ക, ചിക്കന്ഗുനിയ, കോളറ, ഷിഗല്ല, എച്ച്. 1 എന്. 1 എന്നിവയ്ക്കെതിരെ ശ്രദ്ധ വേണമെന്നും. വേനല്മഴയെ തുടര്ന്ന് കൊതുക് ജന്യ രോഗങ്ങളും ചെറുതായി വര്ധിക്കുന്നതായി കാണുന്നെന്നും പറഞ്ഞു. ചികിത്സാ പ്രോട്ടോകോള് പാലിക്കാനും പ്രതിരോധ നടപടികള് എടുക്കാനും നിര്ദേശിച്ചിട്ടുണ്ട്.
പ്രളയാനുബന്ധ പ്രശ്നങ്ങള് പ്രതിരോധിക്കാന് അവശ്യ മരുന്നുകളും സുരക്ഷാ ഉപകരണങ്ങളും വേണ്ടത്ര ശേഖരിച്ച് വയ്ക്കാനും നിര്ദേശിച്ചു. എലിപ്പനി കേസുകള് റിപ്പോര്ട്ട് ചെയ്യുന്നതിനാല് മണ്ണില് ജോലി ചെയ്യുന്നവരും കളിക്കുന്നവരും വെള്ളത്തിലിറങ്ങുന്നവരും നിര്ബന്ധമായും എലിപ്പനി പ്രതിരോധ ഗുളികയായ ഡോക്സിസൈക്ലിന് കഴിക്കണം. നിപ വൈറസ് പ്രതിരോധം ജില്ലകള് ഉറപ്പാക്കാനും മന്ത്രി നിര്ദേശം നല്കി.
മഴക്കാല പൂര്വ ശുചീകരണ പ്രവര്ത്തനങ്ങള് ശക്തമാക്കണം. വീടും, സ്ഥാപനവും പരിസരവും വൃത്തിയായി സൂക്ഷിക്കണം. വീട്ടില് അകത്തും പുറത്തും വെള്ളം കെട്ടി നിര്ത്തരുത്. കൊതുകിന്റെ ഉറവിട നശീകരണത്തിന് പ്രാധാന്യം നല്കണം. മഴക്കാല ശുചീകരണ പ്രവര്ത്തനങ്ങള്ക്ക് തദ്ദേശ സ്ഥാപനങ്ങളുടേയും റവന്യൂ വകുപ്പിന്റേയും പങ്കാളിത്തം ഉറപ്പാക്കുമെന്നും മന്ത്രി വ്യക്തമാക്കിയിട്ടുണ്ട്.
