സാധാരണഗതിയില് മോഷണം നടത്തിയ ശേഷം അതിവേഗത്തില് തന്നെ സ്ഥലം വിടാനാണ് കള്ളന്മാര് ശ്രമിക്കുന്നത്. എന്നാല് ഇവിടെ ഇതാ ഒരു കള്ളന് രണ്ട് തവണ ഒരേ വീട്ടില് മോഷണം നടത്തിയ ശേഷം ഒരു പ്രത്യേക കാര്യം ചെയ്തിരിക്കുകയാണ്. എന്താണ് എന്നല്ലേ? ഒരു ക്ഷമാപണക്കുറിപ്പ് കൂടി എഴുതി വച്ചു. അതില്, 'ഐ ആം സോറി' എന്നാണ് എഴുതിയിരുന്നത്. രണ്ടാമത്തെ തവണ ഒരുലക്ഷത്തിലധികം വില വരുന്ന സാധനങ്ങളും അടിച്ചെടുത്താണ് കള്ളന് സ്ഥലം വിട്ടത്. ഇതിനു മുന്പായിട്ടാണ് കള്ളന് കുറിപ്പെഴുതി വച്ചത്.
യുകെയിലാണ് ഈ അപൂര്വ്വ മോഷണം നടക്കുന്നത്. ടെലിവിഷന്, പിറ്റ് ബൈക്ക്, പഴ്സ്, ബാങ്ക് കാര്ഡ് തുടങ്ങിയ വസ്തുക്കളാണ് ഇയാള് ഈ വീട്ടില് നിന്നും മോഷ്ടിച്ചത്. സൈമണ് ടോളി എന്ന 39 -കാരനായ മോഷ്ടാവാണ് കളവ് നടത്തിയത്. ഇവയെല്ലാം എടുത്ത് കടന്നു കളയുന്നതിന് മുമ്പായിട്ടാണ് ടോളി ഒരു ക്ഷമാപണക്കുറിപ്പ് എഴുതി അവിടെ വച്ചത്. വീട്ടില് നിന്നും പുറത്തിറങ്ങുമ്പോള് വീടൊക്കെ പൂട്ടി ഭദ്രമാക്കിയിറങ്ങിയതാണ് വീട്ടുടമയായ യുവതി. എന്നാല്, പിറ്റേ ദിവസം യുവതി എത്തുമ്പോഴാണ് മോഷണം നടന്ന വിവരം അറിയുന്നത്.
ആദ്യം കാശും ബാങ്ക് കാര്ഡും അടങ്ങിയ പഴ്സ് കാണാതെ പോയത് മാത്രമാണ് യുവതിയുടെ ശ്രദ്ധയില് പെട്ടത്. പിറ്റേന്ന് അവളുടെ കസിന് എത്തിയപ്പോഴാണ് ടിവി അടക്കം പല വസ്തുക്കളും വീട്ടില് നിന്നും കാണാതെ പോയതായി ശ്രദ്ധയില് പെട്ടത്. അതിനിടെ യുവതിക്ക് തന്റെ കാര്ഡുപയോഗിച്ച് ആരോ പണം വലിച്ചതായുള്ള നോട്ടിഫിക്കേഷനും ഫോണില് കിട്ടി. അതിനിടെ ടോളി മോഷ്ടിച്ച പിറ്റ് ബൈക്ക് യുവതിയുടെ അയല്ക്കാരന് വില്ക്കാന് ശ്രമിച്ചിരുന്നു. എന്നാല്, ഇയാള് യുവതിയെ കാര്യം അറിയിച്ചു. അതോടെ കള്ളനെ തപ്പിയിറങ്ങുകയായിരുന്നു യുവതി. തുടര്ന്ന് യുവതി ടോളിയുമായി ബന്ധപ്പെടുകയും പണം തിരികെ വേണമെന്ന് ആവശ്യപ്പെടുകയും ചെയ്തു. ഏതായാലും വൈകാതെ ഇയാള് പൊലീസ് പിടിയിലായി. രണ്ട് വര്ഷം തടവിനും ശിക്ഷിക്കപ്പെട്ടു.
