മെസ്സി ഇന്റര് മിയാമിയില് കളിക്കാന് എത്തിയതോടെ ഇനി ഏത് സൂപ്പര്താരമാണ് അമേരിക്കയ്ക്ക് എന്ന രീതിയിലാണ് അഭ്യൂഹങ്ങള്. ഏറ്റവും ഒടുവിലായി കേട്ടത് ഉറുഗ്വായന് സൂപ്പര്താരവും മെസ്സിയുടെ ബാഴ്സിലോണയിലെ മുന് സഹതാരവുമായി ലൂയിസ് സുവാരസിന്റെ പേരാണ്. എന്നാല് താന് അമേരിക്കയില് കളിക്കാനില്ലെന്ന് സുവാരസ് കൃത്യമായി വ്യക്തമാക്കി.
ജൂണ് 30 ന് പിഎസ്ജിയുമായുള്ള കരാര് അവസാനിക്കുന്ന മെസ്സി ആഗസ്റ്റ് മുതല് അമേരിക്കയില് കളിക്കാനെത്തും. നേരത്തേ യൂറോപ്പ് വിടാന് തീരുമാനം എടുത്തപ്പോള് സുവാരസിന്റെ പേരും ഇന്റര്മിയാമിയുമായി ബന്ധപ്പെട്ട് കേട്ടിരുന്നു. എന്നാല് താരം പോയത് ദക്ഷിണ അമേരിക്കയ്ക്കായിരുന്നു. ആദ്യം ഉറുഗ്വായന് ക്ലബ്ബ് നാഷണലിലേക്ക് പോയ സുവാരസ് പിന്നീട് ബ്രസീലിലെ ഗ്രെമിയയില്േക്കും പോയി. ഇപ്പോള് താരം കളിക്കുന്നത് ഗ്രെമിയോയിലാണ്.
ഇന്റര്മിയാമിയുമായി ബന്ധപ്പെട്ട വാര്ത്ത വന്നപ്പോള് തന്നെ തന്റെ നിലപാട് സുവാരസ് വ്യക്തമാക്കി. താന് ഗ്രെമിയോയില് സന്തോഷവാനാണെന്നാണ് താരം പറഞ്ഞത്. 2022 ല് പോര്ട്ടോ അലിഗ്രേ ടീമിനൊപ്പം ചേര്ന്ന സുവാരസ് ഇതിനകം അവര്ക്കായി 24 കളികളില് 11 ഗോളുകളും എട്ട് അസിസ്റ്റും നേടിക്കഴിഞ്ഞിരിക്കുകയാണ്.
അതേസമയം സുവാരസിന്റെയും മെസ്സിയുടെയും പഴയ കൂട്ടുകാരന് സെര്ജിയോ ബുസ്ക്കെറ്റ്സാണ് മിയാമിയുമായി ബന്ധപ്പെട്ട് ഏറ്റവും പുതിയതായി കേള്ക്കുന്ന പേരുകളിലൊന്ന്. ഈ സീസണോടെ ബാഴ്സിലോണ വിട്ട താരത്തിന് വേണ്ടി ഇന്റര്മിയാമി ശ്രമിക്കുന്നുണ്ട്. അതേ സമയം തന്നെ ഫ്രീട്രാന്സ്ഫറില് ആയിരിക്കുന്ന താരത്തിനായി ക്രിസ്താനോ റൊണാള്ഡോയുടെ അല് നസറും എതിരാളികളായ അല് ഹിലാലും രംഗത്തുണ്ട്.
