ജോലി ലഭിക്കാന് ഒരു കമ്പനി മുന്പോട്ട് വെച്ച വിചിത്രമായ ആവശ്യം കേട്ട് അമ്പരന്നിരിക്കുകയാണ് ഇപ്പോള് ഉദ്യോഗാര്ത്ഥികള്. ജോലി തരാം പക്ഷേ ഓഫീസ് പരിസരത്ത് സസ്യാഹാരം മാത്രമേ കഴിക്കാവൂ എന്നാണ് തൊഴിലുടമയുടെ വിചിത്രമായ നിര്ദേശം.
ഒരു ഉദ്യോഗാര്ത്ഥിയാണ് ഈ നിര്ദ്ദേശം സംബന്ധിച്ച് റെഡ്ഡിറ്റ് അക്കൗണ്ടിലൂടെ പങ്കുവച്ചത്.
ഇദ്ദേഹം ജോലിക്ക് അപേക്ഷിച്ചപ്പോള് ഒരു സ്ഥാപനത്തില് നിന്നും തനിക്ക് ലഭിച്ച വിചിത്രമായ കമ്പനി അയച്ച മെയിലിന്റെ സ്ക്രീന് ഷോട്ട് സഹിതമാണ് സാമൂഹിക മാധ്യമത്തില് കുറിപ്പെഴുതിയത്. കമ്പനിയുടെ മെയില് സന്ദേശം ഇങ്ങനെ ആയിരുന്നു. 'താങ്കളുടെ അപേക്ഷയ്ക്ക് നന്ദി. താങ്കളെ ജോലിയിലേക്ക് തെരഞ്ഞെടുക്കുന്നതിന് മുമ്പ് ഒരു കാര്യം കൂടി വ്യക്തമാക്കേണ്ടതുണ്ട്. താങ്കള് ഒരു സസ്യാഹാരി ആയിരിക്കണം. ഞങ്ങളുടെ ഓഫീസ് പരസരത്ത് സസ്യാഹാരം മാത്രമേ കഴിക്കാന് അനുവാദമുള്ളു.'
സാമൂഹിക മാധ്യമത്തില് പോസ്റ്റ് വൈറലായതോടെ വന് വിമര്ശനമാണ് കമ്പനിക്കെതിരെ ഉയര്ന്നിരിക്കുന്നത്. ഒരാളുടെ വ്യക്തി സ്വാതന്ത്ര്യമാണ് എന്ത് കഴിക്കണമെന്ന് തീരുമാനിക്കുന്നതെന്നും ഇതില് കൈ കടത്താന് ആര്ക്കും അവകാശമില്ലെന്നും നിരവധി പേര് അഭിപ്രായപ്പെട്ടു. പറയുന്ന കാര്യങ്ങള് സത്യമാണെങ്കില് കമ്പനിയുടെ പേര് കൂടി വെളിപെടുത്താനുള്ള മാന്യത കാണിക്കണമെന്നാണ് ഒരു വിഭാഗം സോഷ്യല് മീഡിയ ഉപയോക്താക്കള് ആവശ്യപ്പെടുന്നത്.
