ഉന്നതവിദ്യാഭ്യാസ വകുപ്പ് മന്ത്രി ആര്.ബിന്ദു കഴിഞ്ഞ ദിവസം ഇന്ത്യ ടുഡേ സംഘടിപ്പിച്ച സൗത്ത് കോണ്ക്ലേവില് സംസാരിക്കുന്നതിനിടയില് ‘വെറെവര് ഐ ഗോ, ഐ ടേക്ക് മൈ ഹൗസ് ഇൻ മൈ ഹെഡ്’ എന്നു പറഞ്ഞിരുന്നു. ഇന്ത്യ ടുഡേയുടെ പരിപാടിയിൽ ജെൻഡർ സംബന്ധിച്ച വിഷയത്തിൽ അവതാരകയുടെ ചോദ്യത്തിന് മന്ത്രി പറഞ്ഞ മറുപടി ആയിരുന്നു ഇത്. മന്ത്രി ആര് ബിന്ദു പറഞ്ഞ ഈ വരികള് സോഷ്യല് മീഡിയകളില് ഏറെ ട്രോളുകള്ക്ക് കാരണമായി. മന്ത്രിയെ അനുകൂലിച്ച് പലരും സോഷ്യല് മീഡിയയില് കുറിപ്പുകളെഴുതിയിരുന്നു. ഇപ്പോഴിതാ മന്ത്രിക്ക് പിന്തുണയുമായി നടി സജിത മഠത്തില് ഫെയ്സ്ബുക്കില് കുറിച്ചിരിക്കുകയാണ്. വീട് തലയില് കൊണ്ടു നടക്കാതിരിക്കാൻ സാധിക്കുന്ന ഒരു മലയാളി സ്ത്രീയെ പോലും താനിത്രയും കാലത്തിനകത്ത് പരിചയപ്പെട്ടിട്ടില്ലെന്ന് താരം കുറിച്ചിരിക്കുന്നു.
‘‘വീട് തലയിൽ കൊണ്ടു നടക്കാതിരിക്കാൻ സാധിക്കുന്ന ഒരു മലയാളി സ്ത്രീയെ പോലും ഞാനിത്രയും കാലത്തിനകത്ത് പരിചയപ്പെട്ടിട്ടില്ല.
wherever I go, I carry my house in my head!! ബഹു.മന്ത്രി ബിന്ദു രാധാകൃഷ്ണൻ സംസാരിച്ചത് കേട്ടപ്പോൾ കേരളത്തിലെ പെണ്ണുങ്ങൾ മനസ്സിലേക്ക് എടുത്തത് അതു മാത്രമാണ്. ( അങ്ങിനെ ചെയ്യാതിരുന്നാൽ കുടുബവും സമൂഹവും കുറ്റബോധം നൽകി കൊണ്ട് നിങ്ങളെ ഇഞ്ചിഞ്ചായി കൊന്നിരിക്കും.)..’’ എന്നാണ് സജിത മഠത്തില് കുറിച്ചത്.
മന്ത്രിയുടെ പ്രസംഗം സോഷ്യല് മീഡിയ ട്രോളുകളായപ്പോള് മറ്റു പലരും അതിന്റെ പൊരുള് ചിന്തിച്ചു. മന്ത്രി പറഞ്ഞതിലെ പൊരുള് ആര്ക്കും മനസിലാകാതിരുന്നില്ല എന്നും നഗ്നമായ ആ സത്യങ്ങള് അധികം ചര്ച്ച ചെയ്യാൻ താല്പര്യമില്ലാത്തവരാണ് ഇംഗ്ളീഷ് പറഞ്ഞ് കളിയാക്കുന്നതെന്നും ചിലര് പറയുന്നു. നിരവധി ആക്ടിവിസ്റ്റുകളും പ്രമുഖരുമാണ് മന്ത്രിക്ക് പിന്തുണയുമായി രംഗത്ത് വരുന്നത്.
