ചാരുംമൂട്: നൂറനാട് ഗ്രാമപഞ്ചായത്ത് പ്രസിഡന്റ് സ്വപ്ന സുരേഷ്, വ്യാപാരി വ്യവസായി ഏകോപന സമിതി സംസ്ഥാന പ്രസിഡന്റ് രാജു അപ്സര, മുന് എം.എല്.എ കെ.കെ.ഷാജു തുടങ്ങി നിരവധിപേര്ക്ക് അശ്ലീല ഊമക്കത്തയച്ച മൂന്നംഗ സംഘം പിടിയിലായി.
നൂറനാട് നെടുകുളഞ്ഞിമുറിയില് ശ്യാം നിവാസില് ശ്യാം (36), നെടുകുളഞ്ഞിമുറിയില് തിരുവോണം വീട്ടില് ജലജ (44), ചെറിയനാട് മാമ്പ്രമുറിയില് കാര്ത്തിക നിവാസില് രാജേന്ദ്രന് (57) എന്നിവരെയാണ് നൂറനാട് സി.ഐ പി.ശ്രീജിത്തിന്റെ നേതൃത്വത്തില് അറസ്റ്റ് ചെയ്തത്.
പോലീസ് പറയുന്നത് ഇങ്ങനെ: ആറുമാസം മുമ്പ് കേസിലെ ഒന്നാം പ്രതിയായ ശ്യാം നൂറനാട് സി.ഐ പി.ശ്രീജിത്തിനെ നേരില്ക്കണ്ട് തനിക്കൊരു പ്രശ്നമുണ്ടെന്ന് അറിയിച്ചു. അയല്വാസിയായ മനോജിന്റെ കിണറ്റില് ആരോ പട്ടിയെ കൊണ്ടിട്ടെന്നും അത് താനാണെന്ന തരത്തില് നാട്ടില് പ്രചാരണമുണ്ടെന്നും മനോജിന് അശ്ലീലച്ചുവയുള്ള കത്തുകള് എഴുതുന്ന സ്വഭാവമുണ്ടന്നും തന്നോടുള്ള വൈരാഗ്യം തീര്ക്കാന് തന്റെ പേരില് കത്തുകളയക്കാന് സാധ്യതയുണ്ടെന്നും സഹായിക്കണമെന്നും പറഞ്ഞാണ് ശ്യാം മടങ്ങിയത്.
ഒരാഴ്ചയ്ക്കുശേഷം നൂറനാട് പഞ്ചായത്ത് ഗ്രാമ പ്രസിഡന്റ് സ്വപ്ന സുരേഷിന് ഒരു കത്ത് ലഭിച്ചു. കവറിന് പുറത്ത് ശ്യാം, ശ്യാം നിവാസ് പടനിലം എന്നായിരുന്നു ഉണ്ടായിരുന്നത്. തന്റെ പേരില് കത്ത് എഴുതുന്നത് മനോജാണെന്ന് പൊലീസിനോടും നാട്ടുകാരോടും ശ്യാം പറഞ്ഞിരുന്നു. തുടര്ന്ന് നൂറനാട് പൊലീസില് പരാതി നല്കി. പൊലീസ് മനോജിനെ ചോദ്യം ചെയ്യുകയും കൈയക്ഷരം പരിശോധിക്കുകയും ചെയ്തുവെങ്കിലും മനോജോ വീട്ടുകാരോ കത്തെഴുതിയതായുള്ള ഒരു തെളിവും ലഭിച്ചില്ല.
തൊട്ടടുത്ത ആഴ്ച വ്യാപാരി വ്യവസായി ഏകോപന സമിതി സംസ്ഥാന പ്രസിഡന്റ് രാജു അപ്സരയ്ക്കും അശ്ലീല ഊമക്കത്ത് ലഭിച്ചു. ഇതെല്ലാം മനോജാണ് ചെയ്യുന്നതെന്ന് ശ്യം നാട്ടില് പറഞ്ഞുപരത്തിയിരുന്നു. പിന്നീട് മുന് എം.എല്.എ കെ.കെ.ഷാജുവിനും പടനിലം എച്ച്.എസ്.എസ് മാനേജര് മനോഹരനും സമാനമായ കത്ത് ലഭിച്ചു. തുടര്ന്ന് കത്തുകിട്ടിയ ശ്യാമിന്റെ അയല്വാസിയ പാലമേല് ശ്രീനിലയത്തില് ശ്രീകുമാര് നല്കിയ പരാതിയില് നൂറനാട് പൊലീസ് കേസ് രജിസ്റ്റര് ചെയ്ത് അനേഷണം നടത്തി.
പലരുടെയും െകെയക്ഷരം പരിശോധിച്ചെങ്കിലും അശ്ലീല കത്തിലെ െകെയക്ഷരവുമായി സാമ്യം കണ്ടെത്താന് കഴിഞ്ഞില്ല. ഇതിനിടെ പ്രദേശത്തുളള മിക്ക സ്ത്രീകള്ക്കും പുരുഷന്മാര്ക്കും ശ്യാമിന്റെ പേരില് നിരന്തരം അശ്ലീലവും വധഭീഷണിയുമുള്ള കത്തുകള് വന്നു കെണ്ടിരുന്നു. കഴിഞ്ഞ ആഴ്ച ശ്യാമിന്റെ ബന്ധുവായ ലത എന്ന സ്ത്രീക്ക് വന്ന കത്ത് പൊലീസിന് െകെമാറിയിരുന്നു.
ഇത് പോസ്റ്റ് ചെയ്തിരുന്ന വെണ്മണി പോസ്റ്റ് ഓഫീസിന് സമീപത്തെ സി.സി.ടി.വി ദൃശ്യങ്ങള് പരിശോധിച്ചപ്പോള് മധ്യവയസ്കനായ ഒരു വ്യക്തി സംശയകരമായ രീതിയില് കത്ത് ഇടുന്നതായി കണ്ടെത്തി. തുടര്ന്നുള്ള അന്വേഷണത്തില് രാജേന്ദ്രനെ കണ്ടെത്തി ചോദ്യം ചെയ്തപ്പോള് കുറ്റം സമ്മതിച്ചു.
പടനിലത്തുള്ള ജലജ പറഞ്ഞിട്ടാണ് കത്തുകള് അയച്ചതെന്ന് ഇയാള് പറഞ്ഞു. ജലജയെ പൊലീസ് ചോദ്യം ചെയ്തപ്പോള് കത്തിന് പിന്നില് ശ്യാമാണെന്ന് സമ്മതിച്ചു. ജലജയുടെയും ശ്യാമിന്റെയും വീടുകളില് നിന്ന് കത്തുകളുടെ ഫോട്ടോസ്റ്റാറ്റുകളും കവറുകളും പോലീസ് കണ്ടെടുത്തു.
തുടര്ന്നാണ് കഴിഞ്ഞദിവസം പ്രതികളെ അറസ്റ്റ് ചെയ്തത്. മാസങ്ങളായി പടനിലം പ്രദേശത്ത് പരിഭ്രാന്തി പരത്തിക്കൊണ്ടിരുന്ന അജ്ഞാത അശ്ലീലകത്ത് പ്രചാരണത്തിന് ഇതോടെ അവസാനമായി. അയല്ക്കാരനും ബന്ധുവുമായ മനോജ്, ശ്രീകുമാര് എന്നിവരോട് സ്വത്തുമായി ബന്ധപ്പെട്ടുള്ള തര്ക്കമാണ് വൈരാഗ്യം ഉണ്ടാകാനുള്ള കാരണമെന്നും പൊലീസ് പറഞ്ഞു.
എസ്.ഐ. നിതീഷ് എസ്.ഐ സുഭാഷ് ബാബു എ.എസ്.ഐ രാജേന്ദ്രന് സി.പി.ഒ മാരായ ജയേഷ്, സിനു,വിഷ്ണു, പ്രവീണ്, രജനി, ബിജു എന്നിവരും അന്വേഷണ സംഘത്തിലുണ്ടായിരുന്നു.
