ജീവതത്തിലെ ഏറ്റവും മനോഹരമായ മുഹൂര്ത്തങ്ങളില് ഒന്നാണ് ജന്മദിനാഘോഷം. അന്നേ ദിവസം അടുത്ത ബന്ധുക്കളും സുഹൃത്തുക്കളുമായിരിക്കും ആഘോഷം കെങ്കേമമാക്കുന്നത്. എന്നാല് ഈ സമയം ക്ഷണിക്കപ്പെട്ട അതിഥികള് ആരും വരാതെ ഇരുന്നാല് എന്തായിരിക്കും അവസ്ഥ. അത്തരം ഒരു സാഹചര്യത്തിലൂടെയാണ് ഒരു അമ്മയും മകളും കടന്നുപോയത്. മകളുടെ പിറന്നാളാഘോഷിക്കാന് അമ്മ ക്ഷണിച്ചവരാരും എത്തിയിരുന്നില്ല. ഒടുവില് അമ്മയുടെ പോസ്റ്റ് വൈറലാകുകയും പിറന്നാള് ആഘോഷിക്കാന് മറ്റുചിലര് കടന്നുവരുകയും ആയിരുന്നു.
ലെക്സ് ഫിറ്റ്സ്ജെറാള്ഡ് എന്ന സ്ത്രീയാണ് മകളുടെ എല്ലാ സുഹൃത്തുക്കളെയും ടെക്സാസിലെ കെല്ലറിലെ ഒരു ബര്ഗര് റെസ്റ്റോറന്റിലേക്ക് അവളുടെ അഞ്ചാം ജന്മദിനം ആഘോഷിക്കാന് ക്ഷണിച്ചത്. ഓരോ അതിഥിക്കുമുള്ള കുഞ്ഞുകുഞ്ഞ് സമ്മാനങ്ങളും ഭക്ഷണം വരും വരെ ബോറടിക്കാതിരിക്കാനുള്ള കളറിംഗ് ബുക്കുകളും എല്ലാം ടേബിളില് ഒരുക്കി വച്ചിട്ടുണ്ടായിരുന്നു. എന്നാല്, ആഘോഷങ്ങള്ക്കുള്ള സമയം കടന്നു പോയിട്ടും ആരും ഇവിടേക്ക് എത്തിയില്ല. അതിഥികള് ആരും എത്താതിരുന്ന വിവരം തന്റെ മകള് വില്ല അറിഞ്ഞാല് അവള് വിഷമിക്കും എന്ന് ലെക്സിന് മനസിലായി. അതിനാല് തന്നെ അവളില് നിന്നും അമ്മ ഇത് മറച്ചുവെച്ചു. ശേഷം കാര്യങ്ങളെല്ലാം പറഞ്ഞ് ലോക്കല് ഫേസ്ബുക്ക് ഗ്രൂപ്പില് പോസ്റ്റിട്ടു. അധികം താമസിച്ചില്ല, പോസ്റ്റ് കണ്ട് നിരവധിപ്പേര് വില്ലയ്ക്കൊപ്പം പിറന്നാള് ആഘോഷിക്കാന് എത്തിച്ചേര്ന്നു. വളരെ പെട്ടെന്ന് തന്നെ ബുക്ക് ചെയ്ത ഹാള് നിറയെ ആളുകളായി. കുട്ടികള്ക്കും അമ്മമാര്ക്കും ഒപ്പം വില്ല നിറഞ്ഞ ഹാളില് തന്റെ പിറന്നാള് ഗംഭീരമായി ആഘോഷിച്ചു.
ചടങ്ങു കഴിഞ്ഞ ശേഷം തന്റെ മകളുടെ പിറന്നാള് അതിമനോഹരമാക്കിയ ഓരോരുത്തര്ക്കും അമ്മ നന്ദി പറഞ്ഞു. ഒരു അമ്മയെന്ന നിലയില് ഞാനൊരു പരാജയമാണല്ലോ എന്ന് ചിന്തിച്ച നേരത്താണ് നിങ്ങളോരോരുത്തരായി വന്ന് ആ ചിന്ത മാറ്റിയെടുത്തത് എന്നും ലെക്സ് പറഞ്ഞു. ഏതായാലും വിചാരിച്ചതിലും കളര്ഫുള് ആയിട്ടാണ് ലെക്സിന്റെ മകളുടെ പിറന്നാള് ആഘോഷം നടന്നത്.
