റാന്നി: കുടുങ്ങിയ ഡെബിറ്റ് കാര്ഡ് വലിച്ചെടുക്കാനുള്ള ശ്രമത്തിനിടെ എ.ടി.എം. മെഷിന്റെ കവര് പുറത്തേക്ക് ഇളകിവന്നു. മോഷണ ശ്രമമെന്ന രീതിയില് സാമൂഹിക മാധ്യമങ്ങളില് വ്യാപകമായി പ്രചരിച്ച ചിത്രത്തിന്റെ സത്യാവസ്ഥ മണിക്കൂറുകള്ക്കുശേഷം പുറത്തുവന്നത്.
ഉതിമൂട് ജങ്ഷനിലുള്ള കുമ്പളാംപൊയ്ക ഫെഡറല് ബാങ്ക് ശാഖയുടെ എ.ടി.എം കൗണ്ടറില് ഇന്നലെ രാവിലെ ആറിനാണു സംഭവം. തോപ്പില് ചാര്ലിക്കു പറ്റിയ അബദ്ധമാണു സാമൂഹിക മാധ്യമങ്ങളില് ചര്ച്ചയായത്.
ഭാര്യ വീട്ടിലില്ലാത്തതിനാല് ചായ കുടിക്കാന് പോയതാണ് ചാര്ലിക്ക് പുലിവാലായത്. അടുത്തുള്ള കടയില് മകനെ വിട്ട് ചായ വാങ്ങിപ്പിക്കാന് നോക്കിയപ്പോള് കൊടുക്കാന് പണമില്ലായിരുന്നു. തുടര്ന്നാണ് ചാര്ലി നേരിട്ട് എ.ടി.എമ്മില് പണമെടുക്കാന് പോയതും കാര്ഡ് കുടുങ്ങിയതും.
തുടര്ന്ന് കാര്ഡ് പുറത്തെടുക്കാനായി അദ്ദേഹം പിന്നിലേക്ക് ശക്തിയായി വലിച്ചു. ഉടന് മെഷിന്റെ മുന്ഭാഗത്തെ കവര് ഇളകി പുറത്തുവരികയായിരുന്നു. കാര്ഡ് ഇടുമ്പോള് തന്നെ മെഷിന്റെ മുന്വശം ഇളകിയാടുന്നുണ്ടായിരുന്നുവെന്ന് ചാര്ലി പറഞ്ഞു.
വിവരമറിഞ്ഞ് പോലീസും ബാങ്ക് അധികൃതരും പരിശോധിച്ചതിന് ശേഷം മോഷണ ശ്രമമല്ലെന്നും മെഷിന്റെ കവര് ഇളകി മാറിയതാണെന്നും അറിയിച്ചു. ഇതിനിടെ ഉതിമൂട്ടിലെ എ.ടി.എമ്മില്നിന്ന് പണം കൊള്ളയടിക്കാന് ശ്രമിച്ചുവെന്ന രീതിയില് വ്യാപകമായി ചിത്രവും വാര്ത്തയും സോഷ്യല് മീഡിയയില് പ്രചരിച്ചു.
