മലപ്പുറം: കൊണ്ടോട്ടിയില് വന്തുക വില വരുന്ന പാമ്പിന്റെ വിഷയവുമായി മുന് പഞ്ചായത്തു പ്രസിഡന്റും റിട്ടയര് ചെയ്ത അദ്ധ്യാപകനുമായ വ്യക്തിയും കൂട്ടുകാരും പിടിയില്. ഫ്ളാസ്ക്കില് ഒളിപ്പിച്ച നിലയിലുള്ള പാമ്പിന്റെ വിഷവുമായി ഒരു ലോഡ്ജില് നിന്നുമാണ് ഇവര് പിടികൂടിയത്. ഇവര്ക്ക് വിഷം എത്തിച്ചു നല്കിയയാളുടെ വിവരവും പോലീസിന് കിട്ടിയിട്ടുണ്ട്. ഇയാളും ഉടന് കുടുങ്ങുമെന്നാണ് സൂചന.
അരുവാപ്പുലം പഞ്ചായത്ത് മുന് പ്രസിഡന്റും ഐരവണ് ബ്രാഞ്ച് കമ്മറ്റിയംഗവുമായ ടി.പി.കുമാര് (63), പത്തനംതിട്ട കോന്നി അതുമ്പുംകുളം സ്വദേശി ശ്രീമംഗലം വീട്ടില് പ്രദീപ്നായര് (62), തൃശൂര് കൊടുങ്ങല്ലൂര് മേത്തല സ്വദേശി വടക്കേവീട്ടില് ബഷീര് (58) എന്നിവരാണ് പിടിയിലായത്. വിരമിച്ച അദ്ധ്യാപകന് കൂടിയായ ടിപികുമാറും ബഷീറും നാട്ടുകാരാണ്. ഇരുവരും മലപ്പുറം സ്വദേശിയ്ക്ക് വിഷം വില്ക്കാന് കൊണ്ടുവന്നതായിരുന്നു വിഷം എന്നാണ് പോലീസ് നല്കുന്ന വിവരം. ഇവരെ പോലീസ് ചോദ്യം ചെയ്തു വരികയാണ്.
ജില്ലാ പോലീസ് േേധാവി സുജിത്ത്ദാസിന് കിട്ടിയ വിവരത്തിന്റെ അടിസ്ഥാനത്തില് പോലീസ്ടീം നടത്തിയ റെയ്ഡിലാണ് മൂവരും പിടിയിലായത്. രണ്ടുകോടിയാണ് ഫ്ളാസ്ക്കില് സൂക്ഷിച്ച നിലയില് കണ്ടെത്തിയ വിഷത്തിന് കണക്കാക്കുന്ന വില. ബുധനാഴ്ച വൈകിട്ടാണ് ഇവര് പിടിയിലായത്. ടിപി കുമാറും പ്രദീപ്നായരും പൊതുസമൂഹവുമായി ഏറെ ബന്ധമുള്ള ആള്ക്കാരായതിനാല് സംഭവം നാട്ടുകാരെ ഒന്നടങ്കം ഞെട്ടിച്ചിരിക്കുകയാണ്. പൊതുപരിപാടികളില് സജീവമായിട്ടുളള ഇരുവര്ക്കും വിഷം കച്ചവടം നടത്തുന്ന പരിപാടിയാണെന്ന് പോലും നാട്ടുകാര് അറിഞ്ഞത് ഇപ്പോഴാണ്.
മുന് അദ്ധ്യാപകന് കൂടിയായിരുന്ന ടി.പി. കുമാര് സിപിഎമ്മിന്റെ പ്രബല നേതാവായിരുന്ന കാലത്താണ് പഞ്ചായത്ത് പ്രസിഡന്റായത്. എന്നാല് പിന്നീട് പാര്ട്ടിയില് നിന്നും അച്ചടക്കനടപടി നേരിടേണ്ടി വന്ന ശേഷം പാര്ട്ടിയില് സജീവമല്ല. നല്ല സാമ്പത്തീകശേഷിയുള്ള വീട്ടിലെ പ്രദീപും നാട്ടില് ആള്ക്കാര്ക്കിടയില് അറിയപ്പെടുന്നയാളാണ്. വിദേശത്തായിരുന്ന പ്രദീപ് നാട്ടിലെത്തി വാഹനക്കച്ചവടവും മറ്റും നടത്തിവരികയായിരുന്നു.
വാര്ത്തയ്ക്കൊപ്പമുള്ളത് പ്രതീകാത്മക ചിത്രം
