ശ്രീനഗര്: ക്ഷേത്രത്തില് കയറിയതിന് ദളിത് മനുഷ്യരെ മര്ദ്ദിക്കുന്നതിന്റെ സംഭവം ഇന്ത്യയില് വീണ്ടും. ഇത്തവണ ജമ്മു കശ്മീരിലെ ദോഡ ജില്ലയില് നിന്നുമാണ് സംഭവം റിപ്പോര്ട്ട് ചെയ്യപ്പെട്ടിരിക്കുന്നത്. ഡ്രൈവറായ 25 കാരന് ബിട്ടു റാം എന്നയാളെയാണ് ക്ഷേത്രത്തില് പ്രാര്ത്ഥിക്കാന് കയറിയതിന്റെ പേരില് സവര്ണ്ണരായ ആള്ക്കാരുടെ സംഘം ആക്രമിച്ചത്.
മര്ദ്ദനത്തില് ബിട്ടുവിന്റെ വലതുകൈ ഒടിഞ്ഞു. റംബാന് ജില്ലിയിലെ ഹില്ലര് ഗ്രാമത്തില് നിന്നുള്ള ബിട്ടു റാമാണ് ജൂണ് 18 ന് ക്ഷേത്രത്തില് പ്രവേശിച്ചതിന് മര്ദ്ദനത്തിന് ഇരയായത്. ദോഡയ്ക്ക് സമീപത്തെ ഗലാധാറിലെ ക്ഷേത്രത്തിലായിരുന്നു പ്രാര്ത്ഥിക്കാന് കയറിയത്. പ്രാര്ത്ഥന കഴിഞ്ഞ് തിരിച്ചിറങ്ജി വന്നപ്പോള് ക്ഷേത്രത്തില് നിന്നും മൂന്ന് കിലോമീറ്റര് അകലെ വെച്ച് രജപുത്ത് സമുദായത്തില് പെട്ട ആറംഗ സംഘം തടഞ്ഞുനിര്ത്തി.
ആ ക്ഷേത്രം നിന്റേതല്ലെന്നും താഴ്ന്ന ജാതിയില് പെടുന്നവര് അവിടെ കയറരുതെന്നും പറഞ്ഞു. അവര് പിന്നീട് വാക്കാല് അപമാനിക്കുകയും ഇതിനെതിരേ പ്രതിഷേധിച്ചപ്പോള് കയ്യേറ്റം ചെയ്യുകയും തട്ടിക്കൊണ്ടുപോകുകയും ചെയ്തെന്നാണ് ബിട്ടു ചില മാധ്യമങ്ങളോട് പറഞ്ഞത്. ക്രൂരമായി മര്ദ്ദിച്ച ശേഷം അഞ്ചുമണിക്കൂര് കഴിഞ്ഞ് അവശനിലയില് തെരുവില് കൊണ്ടിടുകയും ചെയ്തു. മര്ദ്ദനത്തില് ബിട്ടുവിന്റെ വലതുകൈയ്ക്ക് ഒടിവുണ്ടാകുകയും ആശുപത്രിയില് പ്രവേശിപ്പിക്കുകയും ചെയ്തു.
കഴിഞ്ഞമാസം സമാനഗതിയിലുള്ള വാര്ത്ത തമിഴ്നാട്ടില് നിന്നും പുറത്തുവന്നിരുന്നു. വില്ലുപുരം ജില്ലയിലെ ദ്രൗപതി അമ്മന് കോവിലില് കഴിഞ്ഞ ഏപ്രിലില് ദളിത് വിഭാഗത്തില് പെടുന്ന മനുഷ്യര്ക്ക് പ്രവേശനം നിഷേധിച്ചതിനെ തുടര്ന്ന് ക്ഷേത്രം സര്ക്കാര് അടച്ചിട്ടു.
