ഒരു ഫാന്സി റെസ്റ്റോറന്റില് ഭക്ഷണം കഴിക്കവേ തനിക്കുണ്ടായ അനുഭവമാണ് റിതിക ബോറ എന്ന ഉപയോക്താവ് ട്വിറ്ററില് പങ്കുവച്ചത്. ഒരു കുപ്പി വെള്ളം റെസ്റ്റോറന്റില് നിന്ന് വാങ്ങിയപ്പോള് കുപ്പിവെള്ളത്തിന് 350 രൂപ ഈടാക്കിയെന്നും അതിനാല് താന് വെള്ള കുപ്പി റെസ്റ്റോറന്റില് ഉപേക്ഷിക്കാതെ വീട്ടിലേക്ക് കൊണ്ടുവന്നുവെന്നുമാണ് അവര് തന്റെ പേജില് കുറിച്ചിരിക്കുന്നത്. താന് ചെയ്തത് പോലെ നിങ്ങളും ചെയ്യുമോയെന്നും അവര് ചോദിക്കുന്നുണ്ട്. പോസ്റ്റിനൊപ്പം വെള്ളക്കുപ്പിയുടെ ചിത്രവും യുവതി പങ്കുവച്ചിരുന്നു. പിന്നാലെ ട്വിറ്ററില് ഈ കുറിപ്പ് വൈറലായി. ഇതിനകം ആറ് ലക്ഷത്തി ഏഴുപത്തിയൊന്നായിരം പേരാണ് ഇത് വായിച്ചത്. കുപ്പിയുടെ പുറത്ത് വീന് സ്റ്റീല്, പ്രകൃതിദത്ത കുടി കുടിവെള്ളം എന്ന് എഴുതിയിട്ടുണ്ട്.
നിരവധി പേര് ഫാന്സി റെസ്റ്റോറന്റുകളില് നിന്ന് തങ്ങള് വാങ്ങിയ കുപ്പികളുടെ ചിത്രങ്ങള് പങ്കുവച്ച് 'ഞങ്ങളും നിങ്ങളെ പോലെ' എന്ന് കുറിച്ചു. ''ഒരു ഫാന്സി റെസ്റ്റോറന്റില് ഉച്ചഭക്ഷണത്തിന് ചെന്നപ്പോള് ഒരു സുഹൃത്തിനെ കണ്ടുമുട്ടി, അവര് ഒരു കുപ്പി വെള്ളത്തിന് 350 രൂപ ഈടാക്കുമെന്ന് നിങ്ങള് വിശ്വസിക്കില്ല. അതിനാല്, കുപ്പി വീണ്ടും ഉപയോഗിക്കാനായി വീട്ടിലേക്ക് കൊണ്ടുവരാന് ഞാന് തീരുമാനിച്ചു. ഇത് ഞാന് മാത്രമാണോ അതോ നീങ്ങളും ഇതു ചെയ്തിട്ടുണ്ടോ?'' എന്നാണ് കുറിച്ചിരിക്കുന്നത്.
കുപ്പിയിലെ വെള്ളം അന്റാര്ട്ടിക്കയില് നിന്നാണോ വന്നതെന്നാണ് ഒരു ട്വിറ്റര് ഉപയോക്താവ് ചോദിച്ചത്. സമാനമായ അനുഭവം പങ്കുവച്ച ഒരാള് ഫാന്സി റെസ്റ്റോറന്റുകളില് നിന്ന് അപ്രതീക്ഷിത പണ ചെലവ് ഒഴിവാക്കാന് സാധാരണ വെള്ളം ആവശ്യപ്പെടാനും നിര്ദ്ദേശിച്ചു.
