ഹോളിവുഡില് എഴുത്തുകാര് നടത്തിവരുന്ന സമരത്തിന് ഐക്യദാര്ഡ്യം പ്രഖ്യാപിച്ച് നടീനടന്മാരും സമരത്തില് പങ്കാളികളാകുന്നു. നടീനടന്മാര് കൂടി സമരത്തില് പങ്കാളികളാകുന്നതോടെ പല സിനിമകളുടെയും ചിത്രീകരണത്തെ ബാധിച്ചു. പല താരങ്ങളും സിനിമകളുടെ പ്രീമിയറുകളില് നിന്നും ഇറങ്ങിപ്പോയി. അവതാറിന്റെയും ഗ്ളാഡിയേറ്ററിന്റെയും അടുത്ത ഭാഗങ്ങള് അടക്കമുള്ള ചിത്രീകരണത്തെ സമരം ബാധിച്ചിരിക്കുകയാണ്.
റൈറ്റേഴ്സ് ഗില്ഡ് ഓഫ് അമേരിക്ക (ഡബ്ള്യുജിഎ) തുടങ്ങിയ സമരത്തിലേക്ക് ഇപ്പോള് സ്ക്രീന് ആക്ടേഴ്സ് ഗില്ഡും (എസ്എജി) അമേരിക്കന് ഫെഡറേഷന് ഓഫ് ടെലിവിഷന് ആന്റ റേഡിയോ ആര്ടിസ്റ്റ്സ് (എഎഫ്ടിആര്എ) സംഘടനയും ചേരുകയായിരുന്നു. ഹോളിവുഡിന്റെ 60 വര്ഷത്തിനിടയിലെ ഏറ്റവും വലിയ സമരമാണ് നടക്കുന്നത്. ഈ മാസം പുറത്തിറങ്ങാനിരിക്കുന്ന ഡിസ്നിയുടെ സിനിമ ഹണ്ടഡ് മാന്ഷനും ക്രിസ്റ്റഫര് നോളന്റെ ഓപ്പണ് ഹെയ്മറും അടക്കമുള്ള സിനിമകളുടെ റെഡ് കാര്പ്പറ്റ് പ്രീമിയറുകളെയും സമരം ബാധിച്ചു.
വന്കിട നിര്മ്മാതാക്കളായ സ്റ്റുഡിയോകള് തങ്ങളുടെ അവകാശങ്ങള് അംഗീകരിക്കാത്ത സാഹചര്യത്തിലാണ് ചരിത്രത്തിലാദ്യമായി സിനിമയുടേയും ടെലിവിഷന് പരിപാടികളുടെയും ഓണ്ലൈനിലെയും എഴുത്തുകാര് സമരവുമായി ഇറങ്ങിയത്. 63 വര്ഷത്തെ ചരിത്രത്തില് ആദ്യമായി നടീനടന്മാരും എഴുത്തുകാര്ക്ക് ഐക്യദാര്ഡ്യം പ്രഖ്യാപിച്ച് രംഗത്ത് വന്നു. ഇവര്ക്കൊപ്പം ഡിസ്നി, നെറ്റ്ഫ്ളിക്സ്, ആമസോണ് തുടങ്ങിയ ഒടിടി പ്ലാറ്റ്ഫോമുകളിലെ ജീവനക്കാരും ടെലിവിഷന് പ്രൊഡ്യൂസേഴ്സിനെ പ്രതിനിധീകരിച്ച് രംഗത്ത് വന്നിട്ടുണ്ട്.
മെയ് ആദ്യമാണ് എഴുത്തുകാരുടെ സംഘടനയായ റൈറ്റേഴ്സ് ഗില്ഡ് ഓഫ് അമേരിക്ക സമരം തുടങ്ങിയത്. വേതനം വര്ദ്ധിപ്പിക്കുക, നിര്മ്മിത ബുദ്ധിയുടെ അനാവശ്യ ഇടപെടലുകള് ഒഴിവാക്കുക എന്ന കാര്യം ഉയര്ത്തിയാണ് സമരം. സൂപ്പര്താരങ്ങളായ ജോര്ജ്ജ് ക്ലൂണിയും ആ ജസീക്കാ ചാസ്റ്റെയ്ന്, സിലയന് മര്ഫി, എമിലിബ്ളണ്ട്, മാറ്റ് ഡാമന് അടക്കമുള്ള അനേകം താരങ്ങള് സമരത്തിന് പിന്തുണ പ്രഖ്യാപിച്ചു.
ഹോളിവുഡ് നടിയും ബോളിവുഡ് താരവുമായ പ്രിയങ്കാചോപ്രയും സമരത്തിന് പിന്തുണ പ്രഖ്യാപിച്ചിട്ടുണ്ട്. ഇന്സ്റ്റാഗ്രാം പേജിലൂടെയാണ് താരം ഐക്യദാര്ഡ്യം പ്രഖ്യാപിച്ചത്. '' എന്റെ യൂണിയനും സഹപ്രവര്ത്തകര്ക്കുമൊപ്പം നില്ക്കും. ഐക്യത്തോടെ നമ്മള് നല്ല നാളെ പടുത്തുയര്ത്തും.'' താരം കുറിച്ചു. സമരം പ്രിയങ്കയും റസ്ളിംഗ് താരം ജോണ്സീനയും പ്രധാനവേഷത്തില് എത്തുന്ന ഹെഡ്സ് ഓഫ് സ്റ്റേറ്റ് സിനിമയുടെ ഷൂട്ടിംഗിനെയും ബാധിച്ചു. അമേരിക്കന് ഫെഡറേഷന് ഓഫ് ടെലിവിഷന് ആന്റ റേഡിയോ ആര്ടിസ്റ്റ്സ് സംഘടനയുടെ 65,000 പേരാണ് സമരത്തിന് ഐക്യദാര്ഡ്യം പ്രഖ്യാപിച്ചിട്ടുള്ളത്. 1,60,000 പേര് ഇതില് അംഗങ്ങളാണെന്നാണ് അധികൃതര് വ്യക്തമാക്കിയിരിക്കുന്നത്.
കഴിഞ്ഞ ചൊവ്വാഴ്ച വിഖ്യാത സംവിധായകന് ക്രിസ്റ്റഫര് നോളന്റെ യുദ്ധചിത്രം ഓപ്പണ് ഹെയ്മറിന്റെ യുകെ പ്രീമിയറില് നിന്നും താരങ്ങള് ഇറങ്ങിപ്പോയി. സിലയന് മര്ഫി, ഫ്ളോറന്സ് പഗ്, മാറ്റ് ഡാമന്, എമിലി ബ്ളണ്ട്, റാമി മാലേക് എന്നീ പ്രമുഖ താരങ്ങളെല്ലാം വാക്കൗട്ട് നടത്തി. റെഡ് കാര്പ്പറ്റില് എത്തിയ താരങ്ങള് ഫോട്ടോയെടുക്കാന് പോസ് ചെയ്യുകയും മാധ്യമപ്രവര്ത്തകരും ആരാധകരുമായി സംവദിക്കുകയുമൊക്കെ ചെയ്ത ശേഷം സിനിമയുടെ സ്ക്രീനിംഗിന് തൊട്ടുമുമ്പ് ഇറങ്ങിപ്പോയി. ഹയാന് റെയ്നോള്ഡ്സും ഹഗ് ജാക്കമാനും അഭിനയിക്കുന്ന ഡെഡ്പൂള് - 3, എച്ച്ബിഒ യുടെ ടെലിവിഷന് സീരീസായ ഹൗസ് ഓഫ് ഡ്രാഗണ്, നെറ്റ് ഫ്ളിക്സിന്റെ ദി സാന്റ്മാന് ആന്റ് ഫാമിലിഗൈ, ദി സിംപ്സണ്സ് ഓഫ് ഫോക്സ് എന്നിവയുടെ രണ്ടാം ഭാഗം എന്നിവയുടെയെല്ലാം ചിത്രീകരണത്തെ ബാധിച്ചു.
ഹോളിവുഡ് നടന്മാരും എഴുത്തുകാരും ഇതിന് മുമ്പ് 1960 ലാണ് ആദ്യമായി സമരം ചെയ്തത്. വെള്ളിയാഴ്ച സമരക്കാര് നെറ്റ്ഫ്ളിക്സിന്റെയും പാരാമൗണ്ടിന്റെയും വാര്ണര് പ്രസിന്റെയും ഡിസ്നിയുടേയുമൊക്കെ കാലിഫോര്ണിയയിലെ ഹെഡ് ക്വാര്ട്ടേഴ്സിന് മുന്നില് പിക്കറ്റിംഗ് നടത്തിയിരുന്നു. മതിയായ വേതനത്തിനൊപ്പം ഭാവിയില് സിനിമാതാരങ്ങളെ ഇല്ലാതാക്കുന്ന ആര്ട്ടിഫിഷ്യല് ഇന്റലിജന്റ്സിന്റെ അതിപ്രസരം കുറയ്ക്കണമെന്നും സമരക്കാര് ആവശ്യപ്പെടുന്നു. നടീനടന്മാരുടെ ഏതെങ്കിലും ഒരു പോസിലുള്ള ഇമേജ് എടുത്ത് കമ്പ്യൂട്ടര് ഉപയോഗപ്പെടുത്തി ഒരു സിനിമ പൂര്ണ്ണമായും നിര്മ്മിക്കാനുള്ള നീക്കം ഭാവിയില് സിനിമാമേഖലയ്ക്ക് ദോഷം ഉണ്ടാക്കുമെന്നാണ് സമരക്കാരുടെ വാദം.
