ന്യൂഡല്ഹി : ഇന്ത്യയിലേക്ക് അനധികൃത കുടിയേറ്റം നടത്തിയതിന് അന്വേഷണം നേരിടുന്ന പാകിസ്താന് വനിത സീമാ ഹൈദര് ഇന്ത്യന് പൗരത്വം തേടി രാഷ്ട്രപതിയ്ക്ക് ഹര്ജി നല്കിയതായി വിവരം.
എ.പി. സിംഗ് എന്ന അഭിഭാഷകന് മുഖേനെയാണ് ഇവര് ഇന്ത്യന് പ്രസിഡന്റ് ദ്രൗപതി മുര്മ്മുവിന് ദയാ ഹര്ജി നല്കിയിരിക്കുന്നത്. ഇന്ത്യന് പൗരന് സച്ചിന് മീണയെ വിവാഹം കഴിച്ച സാഹചര്യത്തില് തനിക്ക് ഇന്ത്യന് പൗരത്വം നല്കണമെന്നായിരുന്നു ഇവരുടെ ആവശ്യം.
താനിപ്പോള് ഇന്ത്യയുടെ മരുമകള് ആണെന്ന് അവകാശപ്പെട്ടിരിക്കുന്ന സീമാ ഹൈദര് ഇന്ത്യയില് താമസിക്കാന് അനുവദിക്കണമെന്ന് കേന്ദ്രസര്ക്കാരിനോടും അപേക്ഷിച്ചിട്ടുണ്ട്. താന് ഇന്ത്യയുടെ സംസ്ക്കാരവും പാരമ്പര്യവും തന്നെ ആഴത്തില് സ്പര്ശിച്ചിരിക്കുകയാണെന്നും ഹിന്ദുത്വത്തെ താന് പൂര്ണ്ണമായും ഉള്ക്കൊണ്ട് കഴിഞ്ഞിരിക്കുകയാണെന്നും അതിന്റെ പാരമ്പര്യവും ആചാരവും മനസ്സിലാക്കാന് ഏറ്റവും നന്നായി പരിശ്രമിച്ചു കൊണ്ടിരിക്കുകയാണെന്നും അപേക്ഷയില് പറയുന്നു.
അതേസമയം ഇന്ത്യയിലേക്ക് അനധികൃതമായി കുടിയേറിയ സീമ ഐഎസ്ഐ യുടെ ചാരവനിതയാണോ എന്നതടക്കമുള്ള സംശയത്തിലാണ് ഇന്ത്യയും അന്വേഷണ ഏജന്സികളും. പാകിസ്താനില് നിന്നും നേപ്പാള് വഴിയുള്ള ഇവരുടെ യാത്രയെ സംബന്ധിച്ച് യുപി എടിഎസ് നല്കിയിരിക്കുന്ന വിവരങ്ങളും ഞെട്ടിക്കുന്നത്. ഇക്കാര്യത്തില് അന്വേഷണവും മറ്റും നടക്കുന്ന സാഹചര്യത്തിലാണ് ഇവര് പ്രസിഡന്റിന് ദയാഹര്ജി നല്കിയിരിക്കുന്നത്. നിഗൂഡതകള്ക്ക് ഇടയില് നില്ക്കുമ്പോഴും പാകിസ്താനി ഭാഭി എന്നാണ് സീമ നാട്ടുകാര്ക്കിടയില് അറിയപ്പെടുന്നത്.
2020 ല് പബ്ജി കളിച്ച് പരിചയപ്പെട്ട ഇന്ത്യാക്കാരനുമായി വാട്സാപ്പിലൂടെ സംസാരിച്ച് പ്രണയത്തിലാകുകയും പിന്നീട് നേപ്പാളില് വെച്ച് വിവാഹം കഴിക്കുകയും ചെയ്തെന്നാണ് ഇവര് നല്കുന്ന വിവരം. തന്റെ നാലു മക്കളുമായി മാര്ച്ചില് പാകിസ്താനില് നിന്നും നേപ്പാളിലേക്ക് പോകുകയും അവിടെ കാഠ്മണ്ഡുവില് സച്ചിന് മീണയ്ക്കൊപ്പം ഒരാഴ്ച കഴിയുകയും ചെയ്തതിരുന്നു.
ഈ വര്ഷം മെയ് ആദ്യം കറാച്ചിയില് നിന്നും ദുബായ് യിലേക്കും അവിടെ നിന്നും നേപ്പാളിലേക്കും യാത്ര ചെയ്തിരുന്നു. അതിന് ശേഷമാണ് ഇന്ത്യയിലേക്ക് നുഴഞ്ഞുകയറിയത്. എന്നാല് ഇന്ത്യയില് അനധികൃതമായി പ്രവേശിച്ചതിനും താമസിച്ചതിനും ജൂലൈ 4 ന് ഇവര് അറസ്റ്റ് ചെയ്യപ്പെടുകയും പിന്നീട് ജാമ്യം കിട്ടി പുറത്തുവരികയുമായിരുന്നു. താന് പാകിസ്താന് ചാരവനിതയല്ലെന്ന് ഇവര് ഇന്ത്യയിലെ അനേകം മാധ്യമങ്ങള്ക്ക് അഭിമുഖം നല്കിയിട്ടുണ്ട്.
