ന്യൂഡല്ഹി: കോമണ്വെല്ത്ത ഗെയിംസ് അഴിമതിക്കേസില് ആരോപിതനായ മുന് ഇന്ത്യന് ഒളിമ്പിക് അസോസിയേഷന് തലവന് സുരേഷ് കല്മാഡിയെയും വിവാദ നായകനായ ബോക്സിംഗ് ഫെഡറേഷന് ഓഫ് ഇന്ത്യ മുന് തലവന് അഭയ് സിംഗ് ചൗട്ടാലയെയും ആജീവനാന്ത അദ്ധ്യക്ഷന്മാരാക്കി ആദരിക്കാനുള്ള ഇന്ത്യന് ഒളിമ്പിക് അസോസിയേഷന്റെ നീക്കം വിവാദമാകുന്നു. വാര്ഷിക ജനറല് ബോഡി യോഗത്തില് സമിതി എടുത്ത തീരുമാനമാണ് വിവാദമാകുന്നത്.
ആനുവല് ജനറല്ബോഡിയിലെ അജണ്ഡയില് ഇല്ലാത്ത കാര്യത്തില് അംഗങ്ങളില് ഒരാള് വെച്ച നിര്ദേശം സമിതി അംഗീകരിക്കുകയായിരുന്നു. ആജീവനാന്ത അദ്ധ്യക്ഷന് വോട്ടിംഗ് പവര് ഇല്ലെങ്കിലും യോഗത്തില് പങ്കെടുക്കാം. അതേസമയം തീരുമാനത്തിനെതിരേ കായികമന്ത്രി വിജയ് ഗോയല് രംഗത്ത് വന്നിട്ടുണ്ട്. ഗുരുതരമായ അഴിമതിയാരോപണങ്ങളില് ക്രിമിനല് കേസുകള് നേരിടുന്ന സുരേഷ് കല്മാഡിയുടേയും അഭയ് ചൗട്ടാലേയുടെയും കാര്യത്തിലുള്ള തീരുമാനം ഒരിക്കലും അംഗീകരിക്കാന് കഴിയാത്തതാണെന്ന് വിജയ് ഗോയല് തുറന്നടിച്ചു.
ഇന്ത്യന് ഒളിമ്പിക് അസോസിയേഷന്റെ തീരുമാനം ഞെട്ടിച്ചെന്നും കായികമന്ത്രി പറഞ്ഞു. തീരുമാനം വന്നതിന് തൊട്ടു പിന്നാലെ പ്രത്യേക വാര്ത്താസമ്മേളനം വിളിച്ചു ചേര്ത്താണ് വിജയ് ഗോയല് പ്രതിഷേധം പറഞ്ഞത്. ചൗട്ടാലയെയും ലളിത് ഭാനോട്ടിനെയും തെരഞ്ഞെടുത്തതിനെ തുടര്ന്ന് ഇന്ത്യന് ഒളിമ്പിക് അസോസിയേഷനെ അന്താരാഷ്ട്ര ഒളിമ്പിക് കൗണ്സില് സസ്പെന്റ് ചെയ്തിരിക്കുകയാണെന്നും അവരെ പുറത്താക്കിയാല് മാത്രമേ സസ്പെന്ഷന് ഇല്ലാതാകൂ എന്നും മന്ത്രി പറഞ്ഞു. ഇന്ത്യന് ഒളിമ്പിക്സ് അസോസിയേഷനില് നിന്നും വിവരം കിട്ടുന്ന മുറയ്ക്ക് ഉയര്ന്ന ഉദ്യോഗസ്ഥര്ക്കെതിരേ നടപടിയെടുക്കുമെന്നും കായിക മന്ത്രി വ്യക്തമാക്കിയിട്ടുണ്ട്.
അതേസമയം ഇന്ത്യന് ഒളിമ്പിക്സ് അസോസിയേഷന് ഇക്കാര്യത്തില് പ്രതികരിച്ചിട്ടില്ല. നേരത്തേ റിയോ ഒളിമ്പിക്സില് മികച്ച പ്രകടനം നടത്തിയ ബാഡ്മിന്റണ്താരം പി വി സിന്ധുവിനും ഗുസ്തിതാരം സാക്ഷി മാലിക്കിനും അസോസിയേഷന് 30 ലക്ഷവും 20 ലക്ഷവും വീതം പുരസ്ക്കാരം നല്കിയിരുന്നു. ഇതിനൊപ്പം ബോക്സിംഗ്, ബാസ്ക്കറ്റ്ബോള്, വോളിബോള്, ജിംനാസ്റ്റിക്സ് ഫെഡറേഷനുകളുമായുള്ള തര്ക്കങ്ങള് പരിഹരിക്കുമെന്ന് ഇന്ത്യന് ഒളിമ്പിക്സ് അസോസിയേഷന് പ്രസിഡന്റ് എന് രാമചന്ദ്രന് വ്യക്തമാക്കിയിരുന്നു.
