മസാച്യുസെറ്റ്സിൽ ഐസ് പാളി പതിച്ച് വീടിെന്റ മേൽക്കൂര തകർന്നു. അപകട സമയത്ത് വീടിനുള്ളിൽ ആളുകള് ഉണ്ടായിരുന്നെങ്കിലും അവർ അത്ഭുതകരമായി രക്ഷപ്പെട്ടു. ജെഫ് ഇൽഗ് എന്ന മസാച്യുസെറ്റ്സ് സ്വദേശിയുടെ വീടിനു മുകളിലേക്കാണ് അപ്രതീക്ഷിതമായി ഐസ് പാളി പതിച്ചത്. ഓഗസ്റ്റ് 13 -ന് രാത്രിയിൽ ആയിരുന്നു സംഭവം. അപകടം നടക്കുന്ന സമയത്ത് ജഫും ഭാര്യ അമേലിയ റെയിൻവില്ലും മക്കളും വീടിനുള്ളിൽ തന്നെ ഉണ്ടായിരുന്നു. വീടിൻറെ മേൽക്കൂര തകർന്നു വീണെങ്കിലും ഇവര് കാര്യമായ പരിക്കേൽക്കാതെ രക്ഷപ്പെട്ടു.
15 മുതൽ 20 പൗണ്ട് വരെ ഭാരമുള്ള ഐസ് പാളിയാണ് അസോസിയേറ്റഡ് പ്രസ് റിപ്പോർട്ട് ചെയ്തതനുസരിച്ച് ഇവരുടെ വീടിന് മുകളിൽ പതിച്ചത്. ബോസ്റ്റൺ ലോഗൻ ഇന്റർനാഷണൽ എയർപോർട്ടിലേക്ക് പോകുകയായിരുന്ന വിമാനത്തിൽ നിന്ന് ഐസ് വീണതായാണ് തങ്ങൾ സംശയിക്കുന്നതെന്ന് ജെഫ് പറഞ്ഞു.
തങ്ങള് സംഭവം നടക്കുമ്പോൾ കിടന്നുറങ്ങുകയായിരുന്നുവെന്നും ഉഗ്രമായ ഒരു സ്ഫോടന ശബ്ദം കേട്ടാണ് ഞെട്ടി ഉണർന്നത് എന്നും ജെഫ് പറഞ്ഞു. ആദ്യം തങ്ങൾ കരുതിയത് വീടിന് ഇടിമിന്നലേറ്റതാണെന്നായിരുന്നു എന്നും എന്നാൽ വീടിെന്റ മേൽക്കൂര തകർന്ന് ഐസ് പാളി താഴേക്ക് വീണപ്പോഴാണ് സംഭവിച്ചത് മറ്റെന്തോ ആണെന്ന് മനസ്സിലായതെന്നും അദ്ദേഹം പറഞ്ഞു. വീടിനു പുറത്തിറങ്ങി നോക്കിയെങ്കിലും ഐസ് പാളിയുടെ അവശിഷ്ടങ്ങൾ അല്ലാതെ മറ്റൊന്നും കണ്ടില്ലെന്നും അദ്ദേഹം കൂട്ടിച്ചേർത്തു. തുടർന്ന് പോലീസ് സ്ഥലത്തെത്തി പരിശോധന നടത്തി.
