കൊച്ചി: ഫയര് ആന്ഡ് റെസ്ക്യൂ വകുപ്പ് ഓര്ഡര് ചെയ്തു വരുത്തിയ 16 ഡ്രോണുകളുടെ പണം ഉടന് വിതരണക്കാര്ക്കു കൈമാറണമെന്നു മുംബൈ ജില്ലാ മജിസ്ട്രേറ്റ് അധ്യക്ഷനായ മൈക്രോ ആന്ഡ് സ്മോള് എന്റര്പ്രൈസസ് ഫെസിലിറ്റേഷന് കൗണ്സിലിന്റെ ഉത്തരവ്.
ഡ്രോണ് വാങ്ങിയിട്ട് പണം നല്കിയില്ലെന്നാരോപിച്ച് മുംബൈയിലെ കമ്പനി നല്കിയ പരാതിയിന്മേലാണു നടപടി. 56 ലക്ഷം രൂപയാണു ഫയര് ആന്ഡ് റെസ്ക്യൂ വകുപ്പ് കമ്പനിക്കു നല്കാനുള്ളത്. പണമോ വാങ്ങിയ ഡ്രോണുകളോ അടുത്തമാസം 20 നകം തിരിച്ചുകൊടുക്കണമെന്നാണു കൗണ്സില് നിര്ദേശിച്ചിരിക്കുന്നത്.
പാലക്കാട് കുറുമ്പാച്ചി മലയിടുക്കില് ബാബു എന്ന യുവാവ് കുടുങ്ങിയതിന്റെ പശ്ചാത്തലത്തിലാണ് ഡ്രോണുകള് വാങ്ങാന് കരാര് നല്കിയത്. തുടര്ന്ന് കമ്പനി ഡ്രോണുകള് കൈമാറിയെങ്കിലും പണം നല്കിയില്ല. ഇക്കാര്യം ചൂണ്ടിക്കാട്ടി കമ്പനി പരാതി നല്കിയതിന്റെ അടിസ്ഥാനത്തില് സംസ്ഥാന ഫയര് ആന്ഡ് റെസ്ക്യൂ ഡി.ജി.പിക്ക് ഫെസിലിറ്റേഷന് കൗണ്സില് നോട്ടീസയച്ചു. എന്നാല്, കരാറില് പറയുന്ന ഗുണനിലവാരം ഡ്രോണുകള്ക്കില്ലെന്നാണു ഫയര് ആന്ഡ് റെസ്ക്യൂ അധികൃതരുടെ വാദം.
വിദഗ്ധര് വിലയിരുത്തിയപ്പോഴാണ് ഇക്കാര്യം വ്യക്തമായതെന്നും അവര് പറയുന്നു. ഡ്രോണുകള് സ്വീകരിക്കാന് കഴിയില്ലെന്നും തിരിച്ചുകൊണ്ടുപോകണമെന്നും കാണിച്ച് കമ്പനിക്കു കത്തയച്ചിരുന്നു. എന്നാല് ഇതുവരെ കൊണ്ടുപോയിട്ടില്ല.
ഇക്കാര്യം കൗണ്സിലിനെ അറിയിക്കുമെന്ന് ഫയര് ആന്ഡ് റെസ്ക്യൂ വകുപ്പ് വ്യക്തമാക്കി. യുവാവ് പാറയിടുക്കില് കുടുങ്ങിയപ്പോള് കരസേനയുടെ ഡ്രോണിനെയാണ് ദൗത്യസംഘം ആശ്രയിച്ചത്. യുവാവ് കുടുങ്ങിയ സ്ഥലം കൃത്യമായി മനസിലാക്കാന് ഡ്രോണ് പകര്ത്തിയ ദൃശ്യങ്ങള് അന്നു സഹായകമായിരുന്നു. ഒപ്പം, സ്വന്തമായി ഡ്രോണില്ലാത്തത് സംസ്ഥാനത്തിനു നാണക്കേടുമായി. ഇതേത്തുടര്ന്നാണ് തിരക്കിട്ടു ഡ്രോണ് വാങ്ങാന് അനുമതി നല്കിയത്.
