സംസ്ഥാന ചലച്ചിത്ര ദാനചടങ്ങളില് പ്രതേക ജൂറി പരാമര്ശത്തിന് അര്ഹനായ നടന് അലന്സിയര് പറഞ്ഞ വാക്കുകള് സമൂഹ മാധ്യമങ്ങളില് വലിയ രീതിയില് വിമര്ശനങ്ങള് ഏറ്റുവാങ്ങി കൊണ്ടിരിക്കുകയാണ്. പെണ് പ്രതിമ തന്ന് തങ്ങളെ പ്രലോഭിപ്പിക്കരുത് എന്നായിരുന്നു മുഖ്യമന്ത്രിയില് നിന്നും പുരസ്കാരം ഏറ്റുവാങ്ങിയ ശേഷം അലന്സിയറുടെ പ്രതികരണം.ആണ്കരുത്തുള്ള മുഖ്യമന്ത്രി ഇരിക്കുന്നിടത്ത് ആണ്കരുത്തുള്ള ശില്പം തരണമെന്നും അലന്സിയര് പറഞ്ഞു. അങ്ങനെയൊരു പ്രതിമ തരുമ്പോള് താന് അഭിനയം നിര്ത്തുമെന്നും അലന്സിയര് പറഞ്ഞു. സംസ്ഥാന ഫിലിം അവാര്ഡ്ദാനച്ചടങ്ങില് സ്പെഷ്യല് ജൂറി അവാര്ഡ് ഏറ്റുവാങ്ങിയതിന് ശേഷമുള്ള പ്രതികരണത്തിനിടെയാണ് അലന്സിയറുടെ വിവാദ പരാമര്ശം ഉണ്ടായത്. ഇപ്പോഴിതാ അഭിനയത്രിയും ട്രാന്സ് ജെണ്ടര് ആക്ടിവിസ്റ്റുമായ ശീതള് ശ്യാം അലന്സിയറിന് എതിരെ രംഗത്ത് വന്നിരിക്കുകയാണ്.
''ആഭാസം സിനിമയില് ബാംഗ്ലൂര് വര്ക്ക് ചെയ്യുമ്പോഴാണ് ഇയാള് ഞാനിരിക്കെ ഒരു നടിയോട് മോശം വര്ത്തമാനം പറയുകയും അയാള് അയാളെ തിരുത്തി സംസാരിക്കാന് താല്പര്യമില്ലെന്ന് പറഞ്ഞ് എഴുന്നേറ്റ് പോരുകയും ചെയ്തത്. പിന്നെ മറ്റൊരു നടിയുടെ അടുത്ത് മോശമായി പെരുമാറാന് നോക്കുകയും മീടൂ ആരോപണം വരെ ഉണ്ടായിരുന്നു. അന്ന് ആ നടിക്ക് ഒപ്പം ഞാന് നിന്നുകൊണ്ട് പലയിടത്തും സംസാരിക്കാന് ശ്രമിച്ചു. പിന്നീട് അപ്പന് സിനിമയില് വര്ക്ക് ചെയ്യുമ്പോള് എന്നെ ഇയാള് കാണുകയും അപ്പോള് ഒരു കമന്റ് പറഞ്ഞു.
'ഓ.. ഡബ്ലു.സി.സി ആളുകളുണ്ട്, സൂക്ഷിച്ച് സംസാരിക്കണം എന്നൊക്കെ. അതെ സെറ്റിലുള്ള പ്രായം ചെന്ന നടി കിടന്ന് ഉറങ്ങുമ്പോള് മൊബൈല് ഫോണ് ഉപയോഗിച്ച് അവരുടെ ഉറക്കം ഷൂട്ട് ചെയ്യാന് ശ്രമിച്ചു. ഞാനും കൂടെയുണ്ടായിരുന്ന ഹെയര് സ്റ്റൈല് ചെയ്യുന്ന പെണ്കുട്ടിയും കൂടി അവരെ ഉറക്കത്തില് നിന്നും വിളിച്ചു. അവര് എഴുന്നേറ്റ് അയാളോട് ആ വീഡിയോ ഡിലീറ്റ് ചെയ്യണെമെന്ന് പറഞ്ഞു. അപ്പോള് അയാള് ഇളിച്ച് തമാശ ചെയ്തതാണെന്ന് പറഞ്ഞു. അയാളെ കൊണ്ട് ഡിലീറ്റ് ചെയ്യിപ്പിച്ചു. അയാള് എന്തൊക്കെയോ പറഞ്ഞ് റൂമില് നിന്നു പോയി.
ടേക്ക് സമയംപോലും മദ്യലഹരിയിലുള്ള ഇയാള് ഒരു ദിവസം അയാള്ക്ക് പരിചയമുള്ള ട്രാന്സ് വുമണ് വ്യക്തിയുടെ നമ്പര് എന്റെ അടുത്ത് ചോദിക്കാന് മടിയായി മേക്കപ്പ് ആര്ട്ടിസ്റ്റായ ഒരാളുടെ അടുത്ത് പറഞ്ഞു വിട്ടു. ഇത് നേരിട്ട് ചോദിക്കാന് പോലും നാണമായി നില്ക്കുന്ന ഒരാളാണോ അതോ അയാള് അഭിനയിക്കുകയാണോ? അയാള് ഒരേസമയം ക്യാമറയ്ക്ക് മുന്നിലും ജീവിതത്തിലും അഭിനയിക്കുന്ന യഥാര്ത്ഥ കലാകാരന്. ആര്ട്ടിസ്റ്റ് ബേബി. അയാള്ക്ക് കൊടുക്കേണ്ടത് ആണ്പ്രതിമ അല്ല തങ്കന് ചേട്ടന്റെ.. പറഞ്ഞാല് കൂടിപോകും.. മലരേ നിന്നെ കാണാതിരുന്നാല്..'', ശീതള് കുറിച്ചു.
