ചെന്നൈ: തമിഴ്നാട്ടില് എഐഎഡിഎംകെ ഇടഞ്ഞു നില്ക്കുന്ന പശ്ചാത്തലത്തില് ബിജെപി പുതിയ തന്ത്രം മെനയുന്നു. 2014 ന് സമാനമായി മറ്റുചെറുപാര്ട്ടികളെ ഒരുമിപ്പിച്ചുള്ള സഖ്യത്തിനാണ് ശ്രമം. തമിഴ്നാട്ടില ബിജെപിയെ വികസിപ്പിക്കുക എന്നതാണ് തന്റെ പ്രാഥമിക ജോലിയെന്ന് അടിയന്തിരമായി നേതൃത്വം ഏറ്റെടുക്കേണ്ടി വന്നതിന് പിന്നാലെ 2021 ലെ ബിജെപി പ്രസിഡന്റായിരുന്ന അണ്ണാമലൈ പറയുന്നത്.
2022 ലെ നഗര തദ്ദേശ സ്വയംഭരണ തെരഞ്ഞെടുപ്പില് അണ്ണാമലൈയുടെ നേതൃത്വത്തിലുള്ള ബിജെപി സ്വന്തം സ്ഥാനാര്ത്ഥികളെ നിര്ത്തുകയും നിര്ണ്ണായക വിജയങ്ങള് പിടിച്ചെടുക്കുകയും വോട്ടുഷെയര് കൂട്ടുകയും ചെയ്തിരുന്നു. അതിന് ശേഷം 2023 ല് ഈറോഡ് ഈസ്റ്റ് ഉപ തെരഞ്ഞെടുപ്പില് എഐഎഡിഎംകെ യെ പിന്തുണയ്ക്കുന്നതായി പ്രഖ്യാപിക്കുകയും അത് നീളുകയുമായിരുന്നു. തമിഴ്നാട്ടില ഡിഎംകെ സര്ക്കാരിനെ താഴെയിറക്കാന് ബിജെപി അണ്ണാമലൈയുടെ നേതൃത്വത്തില് വലിയൊരു സഖ്യത്തിനൊരുങ്ങുകയാണെന്നാണ് ബിജെപിയുടെ തമിഴ്നാട് ഹെഡ്ക്വാര്ട്ടേഴ്സ് കമലാലായം പറയുന്നത്. അദ്ദേഹത്തിന്റെ എന്മാന് എന് മക്കള് യാത്ര തമിഴ്നാട്ടിലെ ജനങ്ങള് വലിയ രീതിയില് സ്വീകരിച്ചതായും ബിജെപി കരുതുന്നു.
ബിജെപിയുമായി സഖ്യത്തിനില്ലെന്ന് എഐഎഡിഎംകെയുടെ ജയകുമാര് കഴിഞ്ഞ ദിവസം പ്രഖ്യാപിച്ചിട്ടുണ്ട്. ഇതോടെ പിഎംകെ, ഡിഎംഡികെ, എഎംഎംകെ, പുതിയ തമിഴകം, ടിഎംഎംകെ, പുതിയ നീതി പാര്ട്ടി, മുന് മുഖ്യമന്ത്രി ഒ പനീര്ശെല്വം എന്നിവരുമായി ഒന്നിച്ച് ബിജെപിക്ക് കീഴില് പുതിയ സഖ്യം രൂപീകരിക്കാനുള്ള സാധ്യത നിലവിലുണ്ട്. വിവിധ ചര്ച്ചകള്ക്ക് ശേഷം പുതിയ മെഗാ സഖ്യത്തെക്കുറിച്ചുള്ള പുതിയ നിലപാട് ബിജെപി ഔദ്യോഗികമായി പ്രഖ്യാപിക്കുമെന്നാണ് വിവരം.
''അതേസമയം എഐഎഡിഎംകെയുമായുള്ള സഖ്യം ബിജെപി വിട്ടിട്ടില്ലെന്നാണ് ബിജെപി സംസ്ഥാന വൈസ് പ്രസിഡന്റ് വിപി ദുരൈസാമി പറയുന്നത്. ജയകുമാര് വികാരഭരിതനായി സംസാരിച്ചു. ഇരുപക്ഷത്തും ഇനിയും സംസാരിച്ചാല് സഖ്യം പുനസ്ഥാപിക്കാന് കഴിയുമെന്നും തിരഞ്ഞെടുപ്പിന് ആറുമാസം ബാക്കിയുള്ളതിനാല് രാഷ്ട്രീയത്തില് എന്തും സംഭവിക്കാമെന്നും ഇദ്ദേഹം പറയുന്നു.
