ലോകയുദ്ധ കാലഘട്ടങ്ങളില് ഒളിച്ചിരുന്ന് പോരാടാനും രഹസ്യ സഞ്ചാരം നടത്താനുമായി ഓരോ രാജ്യക്കാരും പ്രത്യേക താവളങ്ങളും തുരങ്കങ്ങളും നിര്മ്മിച്ചിരുന്നു. എന്നാല് യുദ്ധങ്ങള് കെട്ടണഞ്ഞതോടെ ഇത്തരം താവളങ്ങള് വെറും പഴങ്കഥകള് ആയിമാറി. സമാനമായി രണ്ടാം ലോക മഹായദുദ്ധകാലത്ത് സൈനികര്ക്ക് രഹസ്യമായി ഒരു സ്ഥലത്ത് നിന്ന് മറ്റൊരു സ്ഥലത്തേക്ക് സഞ്ചരിക്കാന് യുറോപ്പിലും പല രഹസ്യ തുരങ്കങ്ങളും നിര്മ്മിച്ചിരുന്നു. എന്നാല് ഇന്ന് യുദ്ധത്തിന്റെ അവശിഷ്ടങ്ങളായി തുടരുന്ന രാജ്യത്തെ ഇത്തരം തുരങ്കങ്ങളെ പുനര്നിര്മ്മിച്ച് വിനോദ സഞ്ചാര കേന്ദ്രങ്ങളാക്കി മാറ്റാനുള്ള ഒരുക്കത്തിലാണ് ബ്രിട്ടീഷ് സര്ക്കാര്.
പുറത്തുവരുന്ന വിവരങ്ങള് അനുസരിച്ച് ലണ്ടനിലെ ഇത്തരത്തിലുള്ള ഒരു രഹസ്യ തുരങ്കം പൂര്ണ്ണമായും പുനര്നിര്മ്മിച്ച് വിനോദ സഞ്ചാരികള്ക്കായി തുറന്ന് കൊടുക്കാനുള്ള ഒരുക്കത്തിലാണ് അധികൃതര്. വിന്സ്റ്റണ് ചര്ച്ചിലിന്റെ സീക്രട്ട് ആര്മി ഈ രഹസ്യ തുരങ്കങ്ങള് ഉപയോഗിച്ചിരുന്നതായി റിപ്പോര്ട്ടുണ്ട്. ഈ റൂട്ടുകള് കിംഗ്സ്വേ എക്സ്ചേഞ്ച് (Kingsway Exchange) എന്നും അറിയപ്പെട്ടിരുന്നു. നഗരത്തിലെ ഹൈ ഹോള്ബോണിന് താഴെ സ്ഥിതി ചെയ്യുന്ന ഇത്തരം ഭൂഗര്ഭ തുരങ്കങ്ങളുടെ ഒരു മൈല് നീളമുള്ള ശൃംഖലയാണ് ഏറ്റവും രഹസ്യമായ ഇടം. പിന്നീട് ശീതയുദ്ധത്തിന്റെ തുടക്കത്തില്, തുരങ്കം വിപുലീകരിച്ചു.
വൈറ്റ് ഹൗസിനും ക്രെംലിനും ഇടയിലുള്ള ഒരു ഹോട്ട്ലൈനായി പ്രവര്ത്തിക്കുന്ന ഈ തുരങ്കങ്ങള്ക്കിടയില് അറ്റ്ലാന്റിക് ടെലിഫോണ് കേബിള് പ്രവര്ത്തിപ്പിക്കുകയും തുടര്ന്ന് ഇത് കിംഗ്സ്വേ ടെലിഫോണ് എക്സ്ചേഞ്ച് എന്ന പേരിലും അറിയപ്പെടാന് തുടങ്ങി. 70 വര്ഷത്തോളം ഒഫീഷ്യല് സീക്രട്ട് ആക്ട് പ്രകാരം രഹസ്യ തുരങ്കം മറ്റുള്ളവരില് നിന്നും ഇംഗ്ലണ്ട് മറച്ചു വെച്ചിരുന്നു. ഇപ്പോഴിതാ 'ദ ലണ്ടന് ടണല്സ് ലിമിറ്റഡ്' എന്ന കമ്പനിക്ക് ബ്രിട്ടീഷ് സര്ക്കാര് കിംഗ്സ്വേ എക്സ്ചേഞ്ച് വില്ക്കാന് തീരുമാനിച്ചതായിട്ടാണ് റിപ്പോര്ട്ടുകള്. ഈ സൈറ്റ് ഒരു വിനോദസഞ്ചാര കേന്ദ്രമാക്കി മാറ്റുകയാണ് ലക്ഷ്യം. ആംഗസ് മുറെ എന്ന ഓസ്ട്രേലിയന് ബാങ്കര് ഈ പദ്ധതിയില് 220 ദശലക്ഷം യൂറോ നിക്ഷേപിക്കാന് താല്പ്പര്യം പ്രകടിപ്പിച്ചു കഴിഞ്ഞു. എല്ലാം കൃത്യസമയത്ത് നടന്നാല്, 2027 ഓടെ ഇത് പൂര്ത്തിയാകുമെന്നാണ് റിപ്പോര്ട്ടുകള് സൂചിപ്പിക്കുന്നത്.
