ഓരോരുത്തര്ക്കും ചേര്ന്ന പങ്കാളിയെ തിരഞ്ഞെടുക്കാനായി കൂടുതല് ആളുകളും ഇന്ന് ഡേറ്റിംഗ് മാര്ഗ്ഗങ്ങളാണ് സ്വീകരിക്കാറുള്ളത്. എല്ലാം കൊണ്ടും പരസ്പരം യോജിച്ചു പോകുന്നു എന്ന് മനസ്സിലാക്കിയാല് ഇരുവരും പ്രണയിക്കുകയും ഒടുവില് വിവാഹം കഴിക്കുകയും ചെയ്യുന്നു. എന്നാല് ഇത്തരത്തില് ഡേറ്റിംഗിനിടയില്പോലും ചിലപ്പോള് അഭിപ്രായ വ്യത്യാസങ്ങളും വഴക്കും എല്ലാം ഉണ്ടാകാറുണ്ട്. എന്നാല് സാധാരണായായി ഇതുപോലെയുള്ള ഗൗരവമായ വഴക്കുകള് വേര്പിരിയലിന് കാരണമാകാറുണ്ട്. ഇപ്പോഴിതാ സമാനമായി ഡേറ്റിംഗ് സംബന്ധിക്കുന്ന ഒരു വാര്ത്തയാണ് സമൂഹ മാധ്യമങ്ങളില് ശ്രദ്ധ നേടുന്നത്.
റഷ്യയിലാണ് സംഭവം. ഒരു യുവാവും യുവതിയും ഡേറ്റിന് പോയി. എന്നാല്, പോലീസ് ഇപ്പോള് ഡേറ്റിന് പോയ യുവതിക്ക് വേണ്ടി തിരച്ചില് നടത്തിക്കൊണ്ടിരിക്കുകയാണ്. എന്താണ് യുവതി ചെയ്ത തെറ്റ് എന്നല്ലേ? നമുക്കറിയാവുന്നത് പോലെ ഡേറ്റിന് പോയാല് റെസ്റ്റോറന്റിലെ ബില്ല് ആര് കൊടുക്കണം എന്ന കാര്യത്തില് എപ്പോഴും ചര്ച്ച നിലനില്ക്കുന്നുണ്ട്. ചിലര് പറയുന്നത് രണ്ടുപേരും പപ്പാതി കൊടുക്കണം എന്നാണ്. എന്നാല്, മറ്റ് ചിലര് പറയുന്നത് പുരുഷന് കൊടുക്കണം എന്നാണ്. ഏതായാലും ഇവിടെ യുവാവ് യുവതിക്കെതിരെ പോലീസില് പരാതി നല്കിയത് അവള് ഡേറ്റിന് പോയിട്ട് ബില്ലിലെ പകുതി തുക നല്കാന് തയ്യാറായില്ല എന്നും പറഞ്ഞാണ്. ഡേറ്റിന് പോയപ്പോള് യുവാവ് യുവതിയോട് റെസ്റ്റോറന്റിലെ ബില് രണ്ടുപേര്ക്കും പകുതി പകുതിയായി നല്കാം എന്ന് പറഞ്ഞത്രെ. എന്നാല്, അതിന് തയ്യാറാവാതെ പണമൊന്നും അടക്കാതെ തന്നെ യുവതി അവിടെ നിന്നും പോയി എന്നാണ് യുവാവ് ആരോപിക്കുന്നത്.
ആഴ്ചകള്ക്കു മുന്പ് ഒരു ഓണ്ലൈന് പോര്ട്ടലിലാണ് 28 കാരനായ യുവാവ് യുവതിയെ കുറിച്ച് കണ്ടത്. പിന്നീട്, സോഷ്യല് മീഡിയയില് കൂടുതല് പരിചയപ്പെട്ടു. അങ്ങനെ, ഡേറ്റിന് പോകാന് തീരുമാനിച്ചു. മിറ അവന്യൂവിലെ ഒരു കഫേയാണ് അവര് ഡേറ്റിന് വേണ്ടി തിരഞ്ഞെടുത്തത്. 16000 രൂപയാണ് റെസ്റ്റോറന്റില് ബില് വന്നത്. ഭക്ഷണത്തിന് ശേഷം വെയിറ്റര് ബില്ലുമായി വന്നു. അപ്പോഴാണ് യുവാവ് ബില് പകുതി പകുതിയായി വിഭജിക്കണം എന്ന് പറയുന്നത്. എന്നാല്, യുവതി അതിന് സമ്മതിച്ചില്ല. കൂടുതല് ഭക്ഷണവും ഡ്രിങ്കും ഓര്ഡര് ചെയ്തത് യുവാവാണ് എന്നായിരുന്നു അവള് കാരണമായി പറഞ്ഞത്. പിന്നാലെ, അവള് കഫേയില് നിന്ന് പോവുകയും ചെയ്തു. ശേഷം യുവാവ് ഇത്രയും രൂപ തനിയെ അടച്ചു. തുടര്ന്ന് ഇയാള് പരാതി നല്കുകയായിരുന്നു.
