തെന്മല: പരിശോധനയ്ക്ക് എത്തിയ പോലീസ് ആദ്യം കണ്ടെത്തിയത് 12 കുപ്പി മദ്യം. കൂടുതല് ചോദ്യം ചെയ്തതിന് ശേഷം പരിശോധന നടത്തിയപ്പോള് പൊങ്ങിവന്നത് 93 കുപ്പി മദ്യം കൂടി. കൊല്ലം തെന്മലയില് ഡ്രൈ ഡേയില് വില്പ്പനയ്ക്കായി സൂക്ഷിച്ച 105 കുപ്പി മദ്യവുമായി യുവാവ് പിടിയിലായി. ഡ്രൈഡേയില് ആള്ക്കാര്ക്ക് വില്പ്പന നടത്താന് വേണ്ടി സൂക്ഷിച്ചതാണ് മദ്യമെന്നാണ് ഇയാള് വെളിപ്പെടുത്തിയത്.
സംഭവത്തില് അറസ്റ്റിലായത് 29 വയസുള്ള അച്ചുമോനാണ്. രഹസ്യ വിവരത്തെ തുടര്ന്ന് പൊലീസ് അച്ചുമോന്റെ സ്റ്റേഷനറി കടയില് പരിശോധന നടത്തുകയായിരുന്നു. വീട്ടിലും തന്റെ സ്റ്റേഷനറി കടയിലുമായിട്ടായിരുന്നു ഇയാള് മദ്യം സൂക്ഷിച്ചിരുന്നത്. ബെവ്കോ ഔട്ട്ലറ്റില് നിന്ന് ഘട്ടംഘട്ടമായി മദ്യം വാങ്ങി സൂക്ഷിച്ച് ഡ്രൈ ഡേയില് വില കൂട്ടി ആവശ്യക്കാര്ക്ക് വില്ക്കുന്നതാണ് ഇയാളുടെ രീതിയെന്ന് പൊലീസ് പറഞ്ഞു.
റിയ എസ്റ്റേറ്റ് ലയത്തില് പുനലൂര് ഡിവൈഎസ്പിയുടെ നേതൃത്വത്തിലുള്ള പ്രത്യേകസംഘമാണ് പരിശോധന നടത്തിയത്. ഇവര്ക്ക് കിട്ടിയ രഹസ്യവിവരത്തിന്റെ അടിസ്ഥാനത്തിലായിരുന്നു പരിശോധന. നിരോധിത പുകയില ഉല്പ്പന്നങ്ങള് വില്പ്പന നടത്തിയത് അടക്കം നിരവധി കേസുകളില് പ്രതിയാണ് അച്ചുമോന്. ഇയാളെ പുനലൂര് കോടതിയില് ഹാജരാക്കി. പ്രതിയെ റിമാന്ഡ് ചെയ്തു.
ഒന്നാം തീയതിയും രണ്ടാം തീയതി ഗാന്ധി ജയന്തി ദിനവും ആയതിനാല് രണ്ടു ദിവസം ഡ്രൈഡേ ആയിരുന്നു. ഈ അവധികള് മുതലെടുത്തുള്ള മദ്യവില്പ്പന നടത്താനായിരുന്നു സ്റ്റോക്ക് ചെയ്തത്. കഴിഞ്ഞ ദിവസം കൊടുങ്ങല്ലൂരിലും അനധികൃത മദ്യം പിടികൂടിയിരുന്നു. അഴീക്കോട് കപ്പല് ബസാറില് നിന്ന് അനധികൃതമായി വില്പ്പനയ്ക്കായി സൂക്ഷിച്ച 35 കുപ്പി വിദേശ മദ്യം എക്സൈസ് സംഘമാണ് പിടിച്ചെടുത്തത്.
