വാഷിങ്ടണ്: അമേരിക്കന് പ്രസിഡന്റ് തെരഞ്ഞെടുപ്പില് റിപ്പബ്ലിക്കന് പാര്ട്ടി സ്ഥാനാര്ഥിയാകാന് രംഗത്തുള്ള ഇന്ത്യന് വംശജന് വിവേക് രാമസ്വാമി തന്റെ മക്കളെ പരിപാലിക്കാന് ആയയെ തേടുന്നതായി റിപ്പോര്ട്ട്.
കേരളത്തില് വേരുകളുള്ള യു.എസ്. ശതകോടീശ്വരനാണു വിവേക്. അദ്ദേഹത്തിന്റെ ഭാര്യ അപൂര്വയും ഇന്ത്യന് വംശജയാണ്. എസ്റ്റേറ്റ്ജോബ്സ്.കോം എന്ന വെബ്െസെറ്റിലാണു വിവേക് പരസ്യം നല്കിയത്. വിവേകിന് രണ്ട് ആണ്മക്കളാണുള്ളത്.
അവരെ നോക്കാന് തയാറുള്ളവര്ക്ക് 80 ലക്ഷം രൂപ വാര്ഷിക ശമ്പളമാണു വാഗ്ദാനം. ജിജ്ഞാസ, സാഹസികത എന്നിവ ഇഷ്ടമുള്ളവര്ക്കു മുന്ഗണന ലഭിക്കും. ആഴ്ചയില് 84 മുതല് 96 മണിക്കൂര് വരെ ജോലി ചെയ്യണം. ആഴ്ചയില് ഒരു ദിവസം അവധി നല്കും.
'കുട്ടികള്ക്ക് തടസമില്ലാത്ത സേവനം ലഭിക്കാന് ഷെഫ്, ഹൗസ് കീപ്പര്, പ്രൈവറ്റ് സെക്യൂരിറ്റി എന്നിവരുമായി ചേര്ന്നു പ്രവര്ത്തിക്കണം. കുട്ടികളുടെ 'കളിസ്ഥലങ്ങള്, കളിപ്പാട്ടങ്ങള്, വസ്ത്രങ്ങള്' എന്നിവ വൃത്തിയായി സൂക്ഷിക്കണം... നിബന്ധനകള് ഇങ്ങനെ പോകുന്നു.
2024 ലെ തെരഞ്ഞെടുപ്പില് ജോ ബൈഡനെ നേരിടാന് മുന് യു.എസ്. പ്രസിഡന്റ് ഡൊണാള്ഡ് ട്രംപിനൊപ്പം വിവേകും മുന്നിരയിലുണ്ട്.
