ചായ ഇഷ്ടമില്ലാത്തവരായി അധികമാരും കാണില്ല. കാരണം രാവിലെ കിടക്കയില് നിന്ന് ഉറക്കമുണര്ന്ന് എണീറ്റാല് പലര്ക്കും ചായ നിര്ബന്ധമുള്ള കാര്യമാണ്. ശരീരത്തിലെ ക്ഷീണാവസ്ഥ മാറാനും നല്ല ഉന്മേഷം കിട്ടാനും ചായയോളം വരുന്ന മറ്റൊരു മരുന്നുണ്ടാവില്ല. ഫാന്സ് കൂടിയതോടെ വെറൈറ്റി ചായകളും കടകളില് ലഭ്യമായി തുടങ്ങി. ഇപ്പോഴിതാ ഇത്തരത്തില് വ്യത്യസ്തമായൊരു ചായയുടെ റെസിപ്പിയുടെ വീഡിയോയാണ് സമൂഹ മാധ്യമങ്ങളില് വൈറലായിക്കൊണ്ടിരിക്കുന്നത്. വീഡിയോ കണ്ട് പലരും കണ്ണ്തള്ളി ഇരിക്കുകയാണ്.
സംഭവം ഒരു യുവതി ചായ ഉണ്ടാക്കുന്നതാണ്. ആപ്പിളും പച്ച മുട്ടയും ഒക്കെ ഒഴിച്ചാണ് ഈ ചായ ഉണ്ടാക്കുന്നത്. നല്ല പാലൊഴിച്ച ചായയിലേക്ക് ഒരു പച്ച മുട്ട പൊട്ടിച്ച് ഒഴിച്ചാല് എങ്ങനെയിരിക്കും. ബംഗ്ലാദേശില് നിന്നുള്ള ഒരു ഫുഡ് ബ്ലോഗറായ യുവതി സുല്ത്താനാസ് കുക്ക് എന്ന തന്റെ ഫേസ്ബുക്ക് പേജിലൂടെയാണ് പച്ച മുട്ട ഒഴിച്ചുള്ള ചായ തയ്യാറക്കുന്ന വീഡിയോ പോസ്റ്റ് ചെയ്തത്. വീഡിയോയ്ക്കൊപ്പം ബംഗാളിയില് ഒരു അടിക്കുറിപ്പും അവര് പങ്കുവച്ചു. 'തിളക്കുന്ന ചായയില് പച്ച മുട്ട ചേര്ക്കുക, എന്താണ് സംഭവിക്കുന്നതെന്ന് കാണുക. ഈ പാചകക്കുറിപ്പ് നിങ്ങളെ ഒരു കോടീശ്വരനാക്കും. എന്നാണ് ഇതിന്റെ അര്ത്ഥം വരുന്നത്.
വൈറലായ വീഡിയോയുടെ തുടക്കത്തില് സ്ത്രീ ഒരു പാനില് ചായപ്പൊടിയും പഞ്ചസാരയും ചേര്ക്കുന്നതാണ് കാണിക്കുന്നത്. അടുത്തതായി, അവള് ആപ്പിള് കഷ്ണങ്ങള്, പാല്,പാല് പൊടി എന്നിവ ചട്ടിയില് ചേര്ക്കുന്നു. ആപ്പിള് ചേര്ക്കുന്നത് പാനീയത്തിന്റെ കയ്പ്പ് കുറയ്ക്കും എന്നാണ് അവള് ഇവിടെ വിശദീകരിക്കുന്നത്, അതുകൊണ്ട് അവര് ആപ്പിള് ചേര്ക്കുന്നു. മിശ്രിതം തിളച്ചു തുടങ്ങിയപ്പോള് , അവള് അതില് ഒരു പച്ച മുട്ട ഒഴിക്കുന്നു. വീഡിയോ പുരോഗമിക്കുമ്പോള്, മുട്ട പൂര്ണ്ണമായും അലിഞ്ഞുപോകുന്നതുവരെ അവള് മിശ്രിതം ഇളക്കിക്കൊണ്ടേയിരിക്കും. അത് കഴിഞ്ഞ് , അവള് മിശ്രിതം അരിച്ചെടുത്ത് ഒരു കപ്പിലേക്ക് ഒഴിച്ചു. ഭൂരിഭാഗം ആളുകളും ഈ ചായ പരീക്ഷിച്ചിട്ടുണ്ട് എന്നാണ് വീഡിയോയിലൂടെ വ്യക്തമാകുന്നത്.
