കുഞ്ഞുക്കുട്ടികള്‍ മുതല്‍ മുതിര്‍ന്നവര്‍ വരെയുള്ളവരുടെയും ഇഷ്ടവിഭവമാണ് ന്യൂഡില്‍സ്. ആരെയും കൊതിപ്പിക്കുന്ന പ്രത്യേക സ്വാദ് ഉള്ളതുകൊണ്ട് മാത്രമല്ല തയ്യാറാക്കാനും എളുപ്പമായതുകൊണ്ടാണ് എല്ലാവരും ന്യൂഡില്‍സ് വാങ്ങുന്നത്. എന്നാല്‍ ഇത്രയും പ്രിയപ്പെട്ട ഈ ന്യൂഡില്‍സ് ഫാക്ടറികളില്‍ നിന്ന് എങ്ങനെയാണ് ഉണ്ടാക്കുന്നതെന്ന് കണ്ടിട്ടുണ്ടോ? ഇത്തരത്തിലൊരു വീഡിയോയാണ് ഇപ്പോള്‍ സമൂഹ മാധ്യമങ്ങളില്‍ നെറ്റീസണ്‍സിന്റെ ശ്രദ്ധ തിരിച്ചിരിക്കുന്നത്. കൊല്‍ക്കത്തയിലെ ഒരു ഫാക്ടറിയിലെ നൂഡില്‍സ് തയ്യാറാക്കുന്ന പ്രക്രിയ ആണ് അളുകളെ ഞെട്ടിച്ചത്.
പ്രചരിക്കപ്പെടുന്ന വീഡിയോയില്‍ ഒറ്റ നോട്ടത്തില്‍ തന്നെ, തീര്‍ത്തും ശുചിത്വ മാനദണ്ഡങ്ങള്‍ പാലിക്കാത്ത ഒരു അന്തരീക്ഷമാണ് കാണുന്നത്.
നൂഡില്‍സിനുള്ള മാവ് തയ്യാറാക്കുന്നതാണ് വീഡിയോയുടെ തുടക്കത്തില്‍ കാണുന്നത്. തറയില്‍ വെച്ച് മാവും വെള്ളവും കുഴക്കുന്നു. ശേഷം നേര്‍ത്ത ഷീറ്റ് തയ്യാറാക്കാനായി ഈ കുഴച്ച മാവിനെ ഒരു യന്ത്രത്തിലൂടെ കടത്തിവിടുന്നു. അത് പിന്നീട് ഒരു കട്ടര്‍ ഉപയോഗിച്ച് നൂഡില്‍ ആകൃതിയില്‍ മുറിക്കുന്നു. ഈ നൂഡില്‍സ് ഒരു വടി പോലെയുള്ള ഘടനയില്‍ തൂക്കിയിട്ട് അവ പൂര്‍ണമായും പാകമാകുന്നതുവരെ ആവിയില്‍ വേവിക്കുന്നു.
ഇവ നന്നായി പാകം ചെയ്തുകഴിഞ്ഞാല്‍, വടിയില്‍ തൂങ്ങിക്കിടക്കുന്ന നൂഡില്‍സ് ചാക്കുകളുടെ സഹായത്തോടെ താഴെയെടുക്കും. നൂഡില്‍സിന്റെ ഒരു പ്രധാന ബാച്ച് പിന്നീട് തറയില്‍ കൊണ്ടു ഇടുകയാണ്. ഒടുവില്‍, വില്‍പ്പനക്കാര്‍ക്ക് വിതരണം ചെയ്യുന്നതിനായി അവ പോളിത്തീന്‍ ബാഗുകളില്‍ പായ്ക്ക് ചെയ്യുന്നു. ഇത് ഏത് കമ്പിനിയുടെ നൂഡില്‍സ് ആണെന്ന് വ്യക്തമല്ല. എല്ലാ കമ്പിനികളും ഇവ തയ്യാറാക്കുന്നത് ഇങ്ങനെയാകണമെന്നില്ല. ഏതായാലും നിമിഷ നേരങ്ങള്‍ക്കുള്ളില്‍ മൂന്ന് മില്യണിലധികം ആളുകളാണ് ഈ വീഡിയോ ഇതുവരെ കണ്ടത്.
നിരവധി ആളുകളാണ് വീഡിയോയെ വിമര്‍ശിച്ച് രംഗത്തെത്തിയത്. വൃത്തിഹീനമായ അന്തരീക്ഷത്തെക്കുറിച്ചുള്ള ആശങ്കകള്‍ ആയിരക്കണക്കിന് ഭക്ഷണപ്രേമികള്‍ കമന്റ് സെക്ഷനില്‍ പ്രകടിപ്പിച്ചു. 'ഇത് നിര്‍മ്മിക്കാന്‍ അവര്‍ക്ക് എന്ത് അനുമതിയുണ്ട്, ഇത് നിയമപരമാണോ?' - എന്നാണ് ഒരു ഉപയോക്താവ് കുറിച്ചത്. ഇനി ഒരിക്കലും നൂഡില്‍സ് കഴിക്കില്ലെന്നും ചിലര്‍ കമന്റില്‍ കുറിച്ചത്.
Comments