ആവശ്യാനുസരണം മദ്യം കഴിക്കാനുള്ള അവസരമാണ് ബാറുകള് ഒരുക്കുന്നത്. കൈയ്യില് കാശുണ്ടെങ്കില് വയറു നിറഞ്ഞ് മദ്യം കഴിക്കാം. എന്നാല് ഈ ആഗ്രഹവുമായിട്ട് എല്ലാ ബാറിലും കയറുന്നതുപോലെ ഈ ബാറില് കയറാന് നില്ക്കണ്ട. കാരണം മദ്യം കഴിച്ചു എന്ന് കരുതി മദ്യലഹരിയില് ബാറോ ബാറിലെ ഉപകരണങ്ങളോ വൃത്തികേടാക്കിയാല് നല്ല മുട്ടന് പണി കിട്ടും ഈ ബാറില്. അതായത് അറിയാതെ വാള് വെച്ചതാണെങ്കിലും ശരി വൃത്തിയാക്കാനുള്ള പണം കൊടുത്താല് മാത്രമേ ഇവിടെ നിന്നും പോകാന് കഴിയുകയുള്ളൂ.
കാലിഫോര്ണിയയിലെ ഓക്ക്ലാന്ഡിലെ ബാര് റസ്റ്റോറന്റ് ആയ മിമോസ ആണ് ഇത്തരത്തില് ഒരു നിയമം നടപ്പിലാക്കിയിരിക്കുന്നത്. ബാര് വൃത്തിയാക്കുന്നതിനായി 50 ഡോളറാണ് അധികമായി നല്കേണ്ടത്. ബാറിന്റെ മുന്നില് ആളുകള് കയറി വരുന്നതിന് സമീപത്തായി ഈ നിര്ദ്ദേശങ്ങള് പതിപ്പിച്ചിട്ടുണ്ട്. അതുകൊണ്ട് തന്നെ ബാറില് കയറുന്നതിനു മുന്പ് എല്ലാവരും നിര്ദ്ദേശങ്ങള് വായിച്ചു മനസ്സിലാക്കേണ്ടതുണ്ട്.
അത് ഇങ്ങനെയാണ്: പ്രിയപ്പെട്ട മിമോസ പ്രേമികളേ, ദയവായി ഉത്തരവാദിത്തത്തോടെ കുടിക്കുകയും നിങ്ങളുടെ പരിധികള് അറിയുകയും ചെയ്യുക. ഞങ്ങളുടെ പൊതുഇടങ്ങളില് നിങ്ങള് വൃത്തികേട് ആകുമ്പോള് $50 ക്ലീനിംഗ് ഫീസ് സ്വയമേവ നിങ്ങളുടെ ബില്ലില് ഉള്പ്പെടുത്തും. മനസ്സിലാക്കിയതിന് വളരെ നന്ദി. '
കഴിഞ്ഞ രണ്ടു വര്ഷക്കാലമായി മിമോസയില് ഈ നിയമം നിലവിലുണ്ട്. പരിധിവിട്ട് മദ്യപിച്ച ശേഷം ആളുകള് ബാറിനുള്ളില് തന്നെ ഛര്ദിക്കുകയും തുപ്പുകയും ഒക്കെ ചെയ്യുന്നത് തടയുന്നതിനായാണ് ഇത്തരത്തില് ഒരു നിയമം ഇവിടെ നടപ്പിലാക്കിയത് എന്നാണ് ബാര് ഉടമ പറയുന്നത്. ഇന്നുവരെ, താന് ആരില് നിന്നും ക്ലീനിംഗ് ഫീസ് ഈടാക്കിയിട്ടില്ല, എന്നാല് ഈ നിര്ദ്ദേശം ഫലപ്രദമായ പ്രതിരോധമാണെന്ന് തെളിയിക്കപ്പെട്ടിട്ടുണ്ടെന്ന് റെസ്റ്റോറന്റിന്റെ ഉടമ സിബിഎസ് ന്യൂസിനോട് സംസാരിക്കവേ വെളിപ്പെടുത്തി. സ്വന്തം കീശയിലെ പണം തന്നെ പോകും എന്നായതോടെ ആളുകള് കൂടുതല് ഉത്തരവാദിത്വബോധമുള്ളവരായി മാറിയെന്നും അദ്ദേഹം പറയുന്നു.
