അന്തരിച്ച നടന് കുണ്ടറ ജോണിയ്ക്ക് ആദരാഞ്ജലികള് അര്പ്പിച്ച് നടന് മോഹന്ലാല്.'പ്രിയപ്പെട്ട ജോണി വിടപറഞ്ഞു. കിരീടവും ചെങ്കോലും ഉള്പ്പെടെ എത്രയെത്ര ചിത്രങ്ങളില് ഞങ്ങള് ഒന്നിച്ചു. സിനിമകളില് വില്ലന് വേഷങ്ങളാണ് കൂടുതല് ചെയ്തതെങ്കിലും ജീവിതത്തില് നൈര്മല്യവും നിഷ്കളങ്കതയും നിറഞ്ഞ, സ്നേഹസമ്പന്നനായ പച്ചമനുഷ്യന് ആയിരുന്നു, എനിക്ക് ഒരുപാട് പ്രിയപ്പെട്ട ജോണി. ഏറ്റവും അടുത്ത സുഹൃത്തുക്കളില് ഒരാളിനെയാണ് എനിക്ക് നഷ്ടമായത്. വേദനയോടെ ആദരാഞ്ജലികള്',- മോഹന്ലാല് സോഷ്യല് മീഡിയയില് കുറിച്ചു.
ഹൃദയാഘാതത്തെത്തുടര്ന്ന്, ഇന്നലെ വൈകുന്നേരം കൊല്ലത്തെ സ്വകാര്യ ആശുപത്രിയിലായിരുന്നു അദ്ദേഹത്തിന്റെ അന്ത്യം.കൊല്ലം ഫാത്തിമ മാത നാഷണല് കോളേജിലെ അദ്ധ്യാപികയായ സ്റ്റെല്ലയാണ് ഭാര്യ. കൊല്ലം ജില്ലയിലെ കുണ്ടറയിലാണ് ജോണി ജനിച്ചത്. പിതാവ് ജോസഫ്, അമ്മ കാതറിന്. കൊല്ലം ഫാത്തിമ മാതാ കോളജ്, ശ്രീ നാരായണ കോളജ്എന്നിവിടങ്ങളിലായിരുന്നു വിദ്യാഭ്യാസം. കോളജില് പഠനകാലത്ത് കൊല്ലം ജില്ലാ ഫുട്ബോള് ടീം ക്യാപ്റ്റനായിരുന്നു. 1978ല് ഇറങ്ങിയ നിത്യവസന്തം ആയിരുന്നു ആദ്യ സിനിമ.
പിന്നാലെ എ.ബി. രാജിന്റെ കഴുകന്, ചന്ദ്രകുമാറിന്റെ അഗ്നിപര്വതം, കരിമ്പന, രജനീഗന്ധി, ആറാം തമ്പുരാന്, ?ഗോഡ് ഫാദര് തുടങ്ങി ഒട്ടനവധി ചിത്രങ്ങള്. പതിയ പതിയെ മലയാളസിനിമയിലെ പധാന വില്ലനായി മാറിക്കഴിഞ്ഞിരുന്നു കുണ്ടറ ജോണി. ഐ.വി ശശി ഒരുക്കിയ മുപ്പതോളം സിനിമകളില് അഭിനയിക്കാനുള്ള അവസരവും അദ്ദേഹത്തെ തേടി എത്തുകയും ചെയ്തു.
കിരീടം. ചെങ്കോല്, നാടോടി കാറ്റ്, ഗോഡ് ഫാദര്,ഓഗസ്റ്റ് 15, ഹലോ, അവന് ചാണ്ടിയുടെ മകന്, ഭാര്വചരിതം മൂന്നാം ഖണ്ഡം, ബല്റാം v/s താരാദാസ്, ഭരത്ചന്ദ്രന് ഐപിഎസ്, ദാദാസാഹിബ്, ക്രൈംഫൈല്, തച്ചിലേടത്ത് ചുണ്ടന്, സമാന്തരം, വര്ണപ്പകിട്ട്, ആറാം തമ്പുരാന്, സ്ഫടികം, സാഗരം സാക്ഷി, ആനവാല് മോതിരം, തുടങ്ങി ഒട്ടനവധി ഹിറ്റ് ചിത്രങ്ങളില് ജോണി ഭാഗമായി. ഉണ്ണി മുകുന്ദന് നായകനായ മേപ്പടിയാനാണ് അവസാന ചിത്രം. മലയാളത്തിന് പുറമേ തെലുങ്കു്, തമിഴ്, കന്നഡ ഭാഷകളിലെ ചില ചിത്രങ്ങളിലും ജോണി അഭിനയിച്ചു.
