മാനന്തവാടി: വയനാട്ടില് കാട്ടുപോത്ത് സ്കൂട്ടറില് ഇടിച്ചതിനെ തുടര്ന്ന് യുവാവിന് പരിക്കേറ്റു. തിരുനെല്ലി പഞ്ചായത്തിലെ പനവല്ലി റസല്കുന്നിലാണ് സംഭവം. പനവല്ലി റസല്കുന്ന് സെറ്റില്മെന്റ് കോളനിയിലെ നരേഷിനാണ് പരിക്കേറ്റത്.
യാത്രയ്ക്കിടെ സ്കൂട്ടറിന് നേരെ പാഞ്ഞടുത്ത കാട്ടുപോത്ത് സ്കൂട്ടര് കൊമ്പ് കൊണ്ട് കുത്തി മറിച്ചിട്ടതായി നരേഷ് പറഞ്ഞു. ഇടിയുടെ ആഘാതത്തില് തെറിച്ചു വീണ് പരിക്കേറ്റ നരേഷ് അവശനിലയില് വഴിയരികില് കിടക്കുകയായിരുന്നു. ഇതുവഴി പോയ നാട്ടുകാരാണ് ഇദ്ദേഹത്തെ കണ്ട് വനംവകുപ്പ് ഉദ്യോഗസ്ഥരെ വിളിച്ചുവരുത്തി ആശുപത്രിയിലെത്തിച്ചത്.
കൈക്കും കാലിനും, കഴുത്തിനും പരിക്കേറ്റ യുവാവ് ചികില്ത്സയിലാണ്. അപ്പപ്പാറ ഫോറസ്റ്റ് സ്റ്റേഷനിലെ ഉദ്യോഗസ്ഥരായ ഫോറസ്റ്റര് എ. രമേശ്, ബീറ്റ് ഫോറസ്റ്റ് ഓഫിസര് ജി.എസ് നന്ദഗോപന് എന്നിവരുടെ നേതൃത്വത്തില് നരേഷിനെ മാനന്തവാടി മെഡിക്കല് കോളജില് എത്തിച്ചത്.കഴിഞ്ഞ ദിവസം വൈകുന്നേരം ഏഴ് മണിക്കായിരുന്നു സംഭവം. പകല് പോലും പ്രദേശത്ത് കാട്ടുപോത്തിന്റെ ശല്യം രൂക്ഷമാണെന്ന് നാട്ടുകാര് പറഞ്ഞു.
