കുമരകം: സ്കൂളിലേക്ക് വളളത്തില് സഞ്ചരിക്കവേ യാത്രാ ബോട്ട് ഇടിച്ച് ആറ്റില് വീണു വിദ്യാര്ഥിനി മരിച്ചു. കരീമഠം വാഴപ്പറമ്പില് രതീഷിന്റെയും രേഷ്മയുടെയും മകള് അനശ്വര (13) യാണു മരിച്ചത്. ഇന്നലെ രാവിലെ എട്ടരയോടെ വീട്ടില് നിന്നും 20 മീറ്റര് അകലെ പെണ്ണാര് തോട്ടിലാണു നാടിനെ നടുക്കിയ ദുരന്തം ഉണ്ടായത്. കുടവെച്ചൂര് സെന്റ് മൈക്കിള്സ് സ്കൂളിലെ ഏഴാം ക്ലാസ് വിദ്യാര്ഥിനിയായ അനശ്വര, മാതാവ് രേഷ്മയ്ക്കും സഹോദരി ദിയക്കുമൊപ്പം സ്കൂളില് പോകാന് ബസില് കയറുന്നതിനായി വള്ളത്തില് പോകവേ ചീപ്പുങ്കല് ഭാഗത്തുനിന്നു മണിയാപറമ്പിലേക്കു പോയ ജലഗതാഗത വകുപ്പിന്റെ സര്വീസ് ബോട്ട് ഇടിക്കുകയായിരുന്നു.
വള്ളത്തിന്റെ പടിയിലിരുന്ന അനശ്വരയുടെ ദേഹത്താണ് ബോട്ട് ആദ്യം തട്ടിയത്. ഇടിയുടെ ആഘാതത്തില് വള്ളത്തില് നിന്നു തെറിച്ചു വീണ അനശ്വരയ്ക്കായി ഉടന് തന്നെ നാട്ടുകാര് തെരച്ചില് നടത്തിയെങ്കിലും ജീവന് രക്ഷിക്കാനായില്ല. വള്ളത്തിന്റെ ഒരു വശവും ഇടിയുടെ ആഘാതത്തില് തകര്ന്നു. അനശ്വരയുടെ വീടിന്റെ മുന്വശത്തുകൂടിയൊഴുകുന്ന കുരിച്ചാല് തോട്ടില്നിന്നു പ്രധാന നദിയായ പെണ്ണാര് തോട്ടിലേക്കു പ്രവേശിക്കുന്ന ഭാഗത്താണ് അപകടം നടന്നത്. വലിയ ആഴമുള്ള ഇവിടെ ശക്തമായ അടിയൊഴുക്കും ഉണ്ടായിരുന്നു. അപകടമുണ്ടായ ഭാഗത്തുനിന്നും ഇരുപതു മീറ്റര് മാറി ഉച്ചയ്ക്ക് 12 മണിയോടെ ഫയര്ഫോഴ്സിലെ മുങ്ങല് വിദഗ്ധരാണു മൃതദേഹം കണ്ടെടുത്തത്.
അനശ്വരയുടെ മുത്തച്ഛന് മോഹനനാണ് യന്ത്രം ഘടിപ്പിച്ചിരുന്ന വള്ളം നിയന്ത്രിച്ചിരുന്നത്. ഈ മേഖലയില് റോഡില്ലാത്തതിനാല് വള്ളത്തെ ആശ്രയിച്ചാണു ജനങ്ങള് റോഡിലെത്തുന്നത്. കരീമഠത്തില്നിന്നും രണ്ടര കിലോമീറ്റര് അകലെയുളള ചീപ്പുങ്കലില് വള്ളത്തില് എത്തി അവിടെ നിന്നു ബസില് കയറിയാണ് അനശ്വര സ്കൂളില് പോയിരുന്നത്. ഈ യാത്രയാണു ദുരന്തത്തിനു വഴി തെളിച്ചത്. അനശ്വരയുടെ സംസ്കാരം ഇന്ന് 11-ന് വീട്ടുവളപ്പില്. സംഭവത്തെപ്പറ്റി അന്വേഷണം നടത്താന് ജില്ലാ കലക്ടര് ഉത്തരവിട്ടു. ദുരന്തനിവാരണ നിയമം വകുപ്പ് 30 പ്രകാരമാണ് ഉത്തരവ്. സംസ്ഥാന ജലഗതാഗത വകുപ്പ് ഡയറക്ടര് അന്വേഷണം നടത്തി ഏഴു ദിവസത്തിനകം റിപ്പോര്ട്ട് നല്കണമെന്നാണ് ഉത്തരവ്.
