കൗതുകമുണര്ത്തുന്ന ഒട്ടനവധി വാര്ത്തകളാണ് ദിവസവും സമൂഹ മാധ്യമങ്ങളിലൂടെ വൈറലാകുന്നത്. ഇവയില് പലതും അവിശ്വസിനീയമായി തോന്നുമെങ്കിലും ഭൂരിഭാഗവും യഥാര്ത്ഥ സംഭവങ്ങളുടെ നേര്ക്കാഴ്ചകള് തന്നെയായിരിക്കും. ഇപ്പോഴിതാ സമാനമായ ഒരു വാര്ത്തയാണ് നെറ്റീസണ്സിനെ ഞെട്ടിച്ചിരിക്കുന്നത്. വാര്ത്തയ്ക്ക് ആധാരമായ സംഭവം നടക്കുന്നത് കൊവിഡ് കാലത്താണ്. ഏകദേശം രണ്ട് വര്ഷം മുമ്പ്. അതും ചൈനയിലെ ഷാങ്ഹായ് എന്ന സ്ഥലത്ത്. എന്നാല് ഇപ്പോഴാണ് സംഭവം വീണ്ടും ശ്രദ്ധ നേടുന്നത്.
കൊവിഡ് നിയന്ത്രണങ്ങളെല്ലാം നിലനില്ക്കുന്ന സമയം. മാസ്ക് ധരിക്കലാണല്ലോ ഏറ്റവും നിര്ബന്ധമായി ഉണ്ടായിരുന്നത്. എന്നാല് ഒരു കോടീശ്വരന്- അദ്ദേഹത്തിന്റെ പേര് 'സണ്വെയര്' എന്നാണ്. ഇത് യഥാര്ത്ഥ പേരല്ല. സോഷ്യല് മീഡിയയിലെ ഇദ്ദേഹത്തിന്റെ പേരാണ്. ഇദ്ദേഹം ബാങ്കില് ഒരാവശ്യത്തിന് പോയി. മാസ്ക് ധരിക്കാത്തതിനാല് ബാങ്കിലെ സെക്യൂരിറ്റി ജീവനക്കാര് ഇദ്ദേഹത്തെ തടഞ്ഞുവയ്ക്കുകയും മാസ്ക് ധരിച്ച് വരാന് ആവശ്യപ്പെടുകയും ചെയ്തു. എന്നാല് ജീവനക്കാരുമായി വഴക്കുണ്ടായ സണ്വെയര് ഉടന് തന്നെ അക്കൗണ്ടിലുണ്ടായിരുന്ന മുഴുവന് പണവും പിന്വലിച്ചു. ഒരു ദിവസം കൊണ്ട് എത്ര പണം പിന്വലിക്കാമോ അത്രയും പണമാണ് അദ്ദേഹം പിന്വലിച്ചത്.
തുടര്ന്ന് നോട്ടുകള് എല്ലാം കൈകൊണ്ട് എണ്ണി തിട്ടപ്പെടുത്താനും അദ്ദേഹം ജീവനക്കാരോട് ആവശ്യപ്പെട്ടു. മണിക്കൂറുകളോളം ഇരുന്ന് ജീവനക്കാര് ഇദ്ദേഹത്തിന്റെ പണം കൈ കൊണ്ട് എണ്ണി. ഏകദേശം ആറര കോടിയോളം രൂപയാണ് അദ്ദേഹം പിന്വലിച്ചത്. അത്രയും പണമാണ് ബാങ്ക് ജീവനക്കാര്ക്ക് കൈ കൊണ്ട് എണ്ണേണ്ടി വന്നത്. താനിത് ചെയ്തുവെന്ന് സണ്വെയര് തന്നെയാണത്രേ സോഷ്യല് മീഡിയയിലൂടെ പങ്കുവച്ചത്. തുടര്ന്ന് ബാങ്ക് ഈ സംഭവത്തോട് പ്രതികരിച്ചു. മാസ്ക് ധരിക്കാനാവശ്യപ്പെട്ടപ്പോള് അദ്ദേഹം അതിന് കൂട്ടാക്കിയില്ല, കൊവിഡ് പ്രോട്ടോക്കോള് തെറ്റിച്ചതാണ് തങ്ങള് ചോദ്യം ചെയ്തത് എന്നെല്ലാമാണ് ബാങ്ക് അറിയിച്ചത്. ഇതിന്റെ വൈരാഗ്യമെന്ന നിലയിലാണ് ഇദ്ദേഹം ആറര കോടി രൂപ കൈ കൊണ്ട് എണ്ണിച്ചത്.
