ലണ്ടന്: ആകാശത്തുപോയി ഭക്ഷണം കഴിക്കാം, 1.06 കോടി രൂപ മുടക്കിയാല് മതി! ഫ്രഞ്ച് കമ്പനിയായ സഫാല്ടോയുടേതാണു വാഗ്ദാനം. അടുത്ത വര്ഷം ബുക്കിങ് തുടങ്ങും. ബലൂണില് ഭൂനിരപ്പില്നിന്നു 25 കിലോമീറ്റര് ഉയരത്തിലെത്തി ഭക്ഷണം വിളമ്പാനാണു പദ്ധതി.
ആറു മണിക്കൂര് നീണ്ട യാത്രയാണ് ആകാശത്തെ ഭക്ഷണത്തിനുവേണ്ടത്. ബഹിരാകാശത്തെപ്പോലെ ''ഭാരരഹിത'' അനുഭവമൊന്നും 25 കിലോമീറ്റര് ഉയരത്തില് പ്രതീക്ഷിക്കേണ്ട. ( ഭൂമിയില്നിന്ന് 100 കിലോമീറ്റര് അകലെയെത്തുമ്പോഴാണു ബഹിരാകാശമായി പരിഗണിക്കപ്പെടുന്നത്.)
25 കിലോമീറ്റര് ഉയരത്തില് ഭൂമിയുടെ മനോഹരദൃശ്യങ്ങള് ആസ്വദിക്കാമെന്നാണു വാഗ്ദാനം. സൂര്യനെയും നക്ഷത്രങ്ങളെയും കൂടുതല് വ്യക്തമായി കാണാനാകും. ആറു യാത്രക്കാരും രണ്ട് െപെലറ്റുമാരുമാകും ബലൂണിലുണ്ടാകുക.
സെക്കന്ഡില് നാലു മീറ്റര് വേഗത്തിലാകും ഭൂമിയില്നിന്നു പറന്നുയരുക. ലക്ഷ്യസ്ഥാനത്തെത്താന് ഒന്നര മണിക്കൂര് വേണ്ടിവരും. മൂന്നു മണിക്കൂര് നേരം ആകാശത്ത് തുടരും. യാത്രക്കാര്ക്ക് പ്രായപരിധിയൊന്നുംവച്ചിട്ടില്ല.
സമാനമായ യാത്രാനുഭവം നല്കുന്ന ബ്ല്യൂഒറിജിന്റെ റോക്കറ്റിലാകട്ടെ ബഹിരാകാശ സഞ്ചാരികള്ക്ക് 100 കിലോമീറ്റര് വരെ ഉയരത്തിലെത്താനാകും. ഒരു വര്ഷം 60 യാത്രകള് നടത്താനാണു സഫാല്ടോയുടെ പദ്ധതി. പരിസര മലിനീകരണമില്ലാതെ ബഹിരാകാശ യാത്ര നടത്താമെന്നതാണു തങ്ങളുടെ പ്രത്യേകതയെന്നു കമ്പനി അവകാശപ്പെടുന്നു.
