തൃശൂര്: വിയ്യൂര് അതീവ സുരക്ഷാ ജയിലില് കൊടി സുനിയെ ജയില് ജീവനക്കാര് മര്ദിച്ചെന്നാരോപിച്ച് കുടുംബത്തിന്റെ പരാതി. പരുക്കേറ്റ കൊടി സുനി തൃശൂര് മെഡിക്കല് കോളജ് ആശുപത്രിയില് ചികിത്സയിലാണ്. ജയിലിനുള്ളിലെ സെല്ലില് ഉറങ്ങിക്കിടക്കുകയായിരുന്ന കൊടി സുനിയെ മുളകുപൊടിയെറിഞ്ഞ് ജയില് ജീവനക്കാര് മാരകമായി മര്ദിക്കുകയായിരുന്നുവെന്ന് കുടുംബം പരാതിപ്പെട്ടു.
കഴിഞ്ഞ ദിവസം ഉച്ചയോടെയാണ് കൊടി സുനിയെ തൃശൂര് മെഡിക്കല് കോളജ് ആശുപത്രിയില് പ്രവേശിപ്പിച്ചത്. ജയിലിലുണ്ടായ സംഘര്ഷങ്ങളുടെ തുടര്ച്ചയായാണ് കൊടി സുനിക്ക് മര്ദനമേറ്റതെന്നാണ് പരാതി. ജയിലില് കഴിഞ്ഞ ദിവസമുണ്ടായ സംഘര്ഷത്തില് കൊടിസുനിയെ അഞ്ചാം പ്രതിയാക്കി വിയ്യൂര് പോലീസ് കേസെടുത്തിരുന്നു. സുനിയെ കെട്ടിയിട്ട് മര്ദിച്ച്, കണ്ണില് മുളക് തേച്ച് അടിച്ചുവെന്നും നിജസ്ഥതി അറിയാന് വിയ്യൂര് ജയിലിലെ സി.സി.ടിവികള് പരിശോധിക്കണമെന്നും ബന്ധുക്കള് ആവശ്യപ്പെട്ടു.
കൊടി സുനിയുടെ ബന്ധുക്കള് മുഖ്യമന്ത്രി പിണറായി വിജയന്, ജയില് അധികൃതര് എന്നിവര്ക്ക് പരാതി നല്കി. ഇതോടൊപ്പം വിയ്യൂര് സ്റ്റേഷനിലും മനുഷ്യാവകാശ കമ്മിഷനും പരാതി നല്കിയെന്ന് കുടുംബം പറഞ്ഞു. കഴിഞ്ഞ ദിവസം ജയിലില് തടവുകാര് തമ്മില് ഏറ്റുമുട്ടിയിരുന്നു. ഒരു വിഭാഗത്തെ രക്ഷിക്കാന് ശ്രമിച്ചുവെന്ന് പറഞ്ഞ് മറു സംഘം ജയില് ജീവനക്കാരെ ആക്രമിക്കുകയും ഗാര്ഡ് ഓഫീസ് തല്ലി തകര്ക്കുകയും ചെയ്തു. ടി.പി. വധക്കേസിലെ പ്രതി കൊടി സുനിയുടെ നേതൃത്വത്തിലുള്ള സംഘവും തിരുവനന്തപുരം സ്വദേശിയും കൊലക്കേസിലെ പ്രതിയുമായ കാട്ടുണ്ണിയുടെ നേതൃത്വത്തിലുള്ള സംഘവുമാണ് ഉച്ചഭക്ഷണ സമയത്ത് ഏറ്റുമുട്ടിയത്.
ഓടിയെത്തിയ ജയില് ഉദ്യോഗസ്ഥര് തിരുവനന്തപുരം സംഘത്തെ രക്ഷിച്ച് ഓഫീസിലെത്തിച്ചു. ഇതില് പ്രകോപിതരായ കൊടി സുനിയും സംഘവും ജയില് ബ്ലോക്കില് പ്രവര്ത്തിക്കുന്ന ഗാര്ഡ് ഓഫീസില് അതിക്രമിച്ച് കടന്ന് അക്രമങ്ങള് കാട്ടുകയായിരുന്നുവെന്നും പറയുന്നു. കമ്പിയടക്കമുള്ള ആയുധങ്ങള് ഉപയോഗിച്ചായിരുന്നു ആക്രമണം. ഫര്ണിച്ചറുകളും ജനലുകളും മേശകളും തല്ലിത്തകര്ത്തു. പ്രിസണ് ഓഫീസര് അര്ജുന് അടക്കം മൂന്നു ജയില് ഉദ്യോഗസ്ഥര്ക്ക് പരുക്കേറ്റിരുന്നു. സംഭവത്തില് പത്ത് പേര്ക്കതിരേ വിയ്യൂര് പോലീസ് കേസെടുത്തു. സമീപ ജയിലില്നിന്നും എത്തിയ ജീവനക്കാരാണ് സ്ഥിതി ശാന്തമാക്കിയത്.
