ഘാനയില് ഏകദേശം 300 വര്ഷം പഴക്കമുള്ള കോല മരം വെട്ടിമാറ്റിയതില് പ്രതിഷേധിച്ച് പ്രദേശവാസികള് രംഗത്തിറങ്ങിയ വാര്ത്തയാണ് സമൂഹ മാധ്യമങ്ങളില് ശ്രദ്ധ നേടുന്നത്. രോഗ ശാന്തി ശക്തിയുണ്ടെന്ന് ഇവിടുത്തെ ആളുകള് വിശ്വസിച്ചിരുന്ന മരമാണ് അജ്ഞാതര് വെട്ടിമാറ്റിയത്. മൂന്ന് പതിറ്റാണ്ട് പഴക്കമുള്ള ഈ മരം ആധുനിക ഘാനയുടെ ഭാഗമായ അശാന്തി രാജവംശത്തിന്റെ കാലം തൊട്ടുള്ളതാണ്.
ഇത്രയധികം പവിത്രതയുള്ള ഈ മരത്തെ മുറിച്ചുമാറ്റിയ ആളുകളെ കണ്ടെത്താനുള്ള തീവ്ര ശ്രമത്തിലാണ് നാട്ടുകാര്. ഫെയ്യാസെ പട്ടണത്തില് നിന്നുള്ള ഈ കോലമരം വെട്ടിയ ചിത്രം ഓണ്ലൈനില് പ്രചരിച്ചതോടെ വലിയ രോഷമാണ് ഘാനയിലെ ജനങ്ങളില് നിന്നും ഉണ്ടാകുന്നത്. കോല മരത്തിന്റെ കറുപ്പും വെളുപ്പും നിറത്തിലുള്ള കുരു രോഗങ്ങളും ശാപങ്ങളും ഭേദമാക്കുമെന്നാണ് ഇപ്പോഴും പല നാട്ടുകാരും വിശ്വസിക്കുന്നത്. ഘാനയുടെ വാണിജ്യ കേന്ദ്രമായ കുമാസിയേയും ബോസോംട്വേ തടാകത്തേയും തമ്മില് ബന്ധിപ്പിക്കുന്ന ഒരു പ്രധാന റോഡിന്റെ മധ്യത്തിലായിരുന്നു ഈ മരം നിന്നിരുന്നത്.
ഹൈവേ വികസനത്തിന്റെ സമയത്ത് പോലും മരത്തിന്റെ പ്രാധാന്യം കണക്കിലെടുത്ത് അത് വെട്ടിമാറ്റിയിട്ടുണ്ടായിരുന്നില്ല. പകരം അത് ഒഴിവാക്കിയായിരുന്നു പ്രവൃത്തികള്. അതുമാത്രമല്ല, വിനോദസഞ്ചാരികള്ക്ക് വലിയ ആകര്ഷണമായിരുന്നു ഈ മരം.
അശാന്തി രാജ്യത്തിന്റെ ചരിത്രത്തില് തന്നെ ഈ മരം നില്ക്കുന്ന സ്ഥലം വലിയ പ്രാധാന്യമര്ഹിക്കുന്നു എന്നാണ് അശാന്തി രാജകുടുംബമുണ്ടായിരുന്ന മാന്ഹിയ കൊട്ടാരത്തിലെ ഗവേഷണ ഡയറക്ടര് ഒസെയ്-ബോണ്സു സഫോ കണ്ടങ്ക ബിബിസിയോട് പറഞ്ഞത്. അന്നത്തെ കരുത്തരായ ഡെന്കിറയ്ക്കെതിരെ അശാന്തി ജനത തങ്ങളുടെ സ്വാതന്ത്ര്യത്തിന് വേണ്ടി പോരാടിയ യുദ്ധമാണ് ഫെയ്യാസെ. ആ യുദ്ധത്തില് അശാന്ത ജനത ഡെന്കിറയെ പരാജയപ്പെടുത്തിയ സ്ഥലത്താണ് ആ മരം നിലനിന്നിരുന്നത്.
