മനുഷ്യന്‍ ചെയ്യുന്ന ജോലികള്‍ അല്പംകൂടി ലളിതമാക്കാനാണ് യന്ത്രങ്ങള്‍ കണ്ടുപിടിച്ചത്. മുന്‍ കാലങ്ങളില്‍ കഠിനമേറിയ ജോലികള്‍ ചെയ്യാനാണ് യന്ത്രങ്ങളുടെ സഹായം തേടിയിരുന്നത്. എന്നാല്‍ ആധുനിക യുഗത്തില്‍ ചെറിയ ചെറിയ പണികള്‍ ചെയ്യാന്‍ പോലും ആളുകള്‍ യന്ത്രങ്ങളെ ആശ്രയിച്ചുത്തുടങ്ങി. ഇത്തരത്തില്‍ വളരെയധികം പ്രത്യേകതകള്‍ ഉള്ള നിരവധി കണക്കിന് യന്ത്രങ്ങള്‍ ഇന്ന് വിപണിയില്‍ ലഭ്യമാണ്. എന്നാല്‍ ഇത്തരത്തില്‍ ഉപയോഗിക്കുന്ന യന്ത്രങ്ങള്‍ നിത്യജീവിതത്തില്‍ അത്ര ലാഘവത്തോടെ ഉപയോഗിക്കുന്നത് പലപ്പോഴും അപ്രതീക്ഷിതമായ അപകടങ്ങള്‍ക്ക് കാരണമാകും. അതുകൊണ്ട് ഇവ ഉപയോഗിക്കുമ്പോള്‍ വേണ്ടത്ര ശ്രദ്ധയും സൂക്ഷ്മതയും ഉണ്ടാകണം. ഇതിന് ഉദാഹരണമാണ് കഴിഞ്ഞ ദിവസം ഇന്‍സ്റ്റയില്‍ പങ്കുവയ്ക്കപ്പെട്ട ഒരു വീഡിയോ.
@tradiejobs.com.au എന്ന ഇന്‍സ്റ്റാഗ്രാം അക്കൗണ്ടാണ് വീഡിയോ പങ്കുവച്ചത്. ഓസ്‌ട്രേലിയയിലെ ക്വീന്‍സ്ലാന്‍ഡിലുള്ള തന്റെ വീട്ടിലെ ഒരു നിര്‍മ്മാണത്തിനിടെ അല്‌സറ്റര്‍ കാന്‍ഡ്ല്‍ ചിത്രീകരിച്ച വീഡിയോയിരുന്നു അത്. വീഡിയോയുടെ തുടക്കത്തില്‍ അദ്ദേഹത്തിന്റെ കൈയ്യില്‍ ഒരു പഴയ ആംഗിള്‍ ഗ്രൈന്‍ഡര്‍ കാണാം. ഒപ്പം മുറിക്കാനായി എടുത്ത ഒരു ഇരുമ്പ് പൈപ്പും. എന്നാല്‍ ആ ഗ്രൈന്‍ഡറിന്റെ ബ്ലൈഡ് പകുതി മാത്രമേ യന്ത്രത്തില്‍ കാണാന്‍ കഴിയുന്നുള്ളു. മറുപകുതി കാണാന്‍ കഴിഞ്ഞിരുന്നില്ല. തുടര്‍ന്ന് ക്യമാറ താഴക്കുമ്പോള്‍ അലസ്റ്റര്‍ ധരിച്ച പാന്റില്‍ തുടകള്‍ക്ക് മേലെയായി പൊട്ടിയ ബ്ലൈഡിന്റെ പകുതി തറച്ചിരിക്കുന്നത് കാണാം. അപ്പോഴാണ് സംഭവത്തിന്റെ തീവ്രത ആളുകള്‍ക്ക് മനസ്സിലാകുന്നത്. ബോബി ഡാരിന്‍ പാടിയ ബിയോഡ് ദി സീ എന്ന പാട്ടിനൊപ്പമുള്ള വീഡിയോ കണ്ടവരെല്ലാം ഞെട്ടിയിരിക്കുകയാണ്.
സുരക്ഷാ സജ്ജീകരണങ്ങളൊന്നും ഇല്ലാതെയാണ് അലസ്റ്റര്‍ ഗ്രൈന്‍ഡര്‍ ഉപയോഗിച്ചതെന്ന് വീഡിയോയില്‍ നിന്ന് വ്യക്തമാണ്. ശക്തമായി ചലിക്കുന്ന ബ്ലൈഡ് പൊട്ടി മറ്റെവിടേയ്ക്ക് വേണമെങ്കിലും തെറിച്ച് അപകടം സംഭവിക്കാം. അല്പം കൂടി വേഗത്തിലായിരുന്നെങ്കില്‍ പോലും വലിയൊരു അപകടം സംഭവിക്കാം. ഭാഗ്യം കൊണ്ട് മാത്രമാണ് അലസ്റ്റര്‍ അപകടത്തില്‍ നിന്നും രക്ഷപ്പെട്ടെതെന്ന് കാഴ്ചക്കാരന് ഒരു നിമിഷം തോന്നുന്നു. ടികിടോക്കിലൂടെയാണ് അലസ്റ്റര്‍ ഈ വീഡിയോ ആദ്യം പങ്കുവച്ചത്. പിന്നാലെ ഇത് ലക്ഷക്കണക്കിന് ആളുകള്‍ കാണുകയും വൈറലാവുകയും ചെയ്തു.
Comments