ദ്വീപുകള് ഇഷ്ടമില്ലാത്തവരായി ആരും കാണില്ല. വെള്ളത്താല് ചുറ്റപ്പെട്ട ഇത്തരം പ്രദേശങ്ങളിലുള്ള വീടുകള് ആളുകളില് എന്നും കൗതുകം ജനിപ്പിക്കുന്നുണ്ട്. മാത്രമല്ല സമാധാനവും ഏകാന്തതയും ഇഷ്ടമുള്ളവര്ക്ക് ജീവിക്കാന് ഇതിലും മികച്ച ഒരു ഇടം കണ്ടെത്താനാകില്ല. എന്നാല് മറ്റുചിലര്ക്ക് ഇത്തരം ഇടങ്ങളില് താമസിക്കാന് താത്പര്യമില്ലെങ്കിലും സന്ദര്ശിക്കാനെങ്കിലും ആഗ്രഹം ഉണ്ടാകും. എന്നാല് ഇവിടെ ഇതാ ഒരു ദ്വീപില് ആളുകള്ക്ക് സന്ദര്ശനം നടത്താനും ഇഷ്ടമല്ല, ഇവിടെ ഉള്ള വീട്ടില് താമസിക്കാനും താത്പര്യമില്ല. പറഞ്ഞുവരുന്നത് നോര്ത്ത് വെയില്സിലുള്ള Ynys Gorad Goch എന്ന ദ്വീപിനെക്കുറിച്ചാണ്. തികച്ചും ഏകാന്തത നിറഞ്ഞ അതിമനോഹരമായ ദ്വീപാണ് ഇത്. അവധിക്കാലം ആഘോഷിക്കാനെങ്കിലും ഇവിടെ എത്തണമെന്ന് ആളുകള്ക്ക് തോന്നിപ്പോകുന്ന വിധം മനോഹരമാണ് ഇവിടം. എന്നാല് ഇതിന്റെ സമീപത്തുള്ള ആളുകള് പറയുന്നത് ലക്ഷകണക്കിന് രൂപ നല്കാമെന്ന് പറഞ്ഞാലും അവര് ഇവിടെ താമസിക്കാന് തയ്യാറാകില്ല എന്നാണ്.
കാരണം എന്തെന്നാല് ഈ ദ്വീപിന്റെ ഇപ്പോഴത്തെ അവസ്ഥ തീര്ത്തും ശോചനീയമാണ്. അടുത്തിടെ ദ്വീപിന്റെ ഒരു ചിത്രം ഓണ്ലൈനില് പ്രചരിച്ചിരുന്നു. അതിലാണ് ദ്വീപിന്റെ നിലവിലെ അവസ്ഥ വ്യക്തമായി കാണാന് കഴിയുന്നത്. വെള്ളം കയറി വരുന്നത് തടയാന് നിര്മ്മിച്ച മതിലുകള് അടക്കം സകലതും ഇപ്പോള് വെള്ളത്തിലാണ്. മാത്രമല്ല വേലിയേറ്റ സമയങ്ങളിലും ഈ പ്രദേശത്ത് മുഴുവന് വെള്ളമായിരിക്കും. നോര്ത്ത് വെയ്ല്സ് ലൈവ് പ്രകാരം ഫെബ്രുവരി 22 -ന് 8.03 മീറ്ററാണ് ഈ വര്ഷം ഇവിടെ രേഖപ്പെടുത്തിയിരിക്കുന്ന ഏറ്റവും ഉയര്ന്ന വേലിയേറ്റം. ഇതൊന്നും കൂടാതെ ഇടയ്ക്കിടെയുള്ള കൊടുങ്കാറ്റും വെള്ളപ്പൊക്കവും ജലനിരപ്പ് 11.2 മീറ്ററോളം ഉയര്ത്തുകയും ചെയ്തു. ഈ ദുരന്തങ്ങളെല്ലാമാണ് ഇവിടേക്ക് മാറാന് ജനങ്ങള് മടിക്കുന്നതിന്റെ കാരണം.
വെയില്സിലെ ഗ്വിനെഡില് നിന്ന് ആംഗ്ലെസിയെ വേര്തിരിക്കുന്ന മെനായ് കടലിടുക്കിലാണ് ഈ ദ്വീപ്. 400 വര്ഷത്തിലധികം കാലം ഈ ദ്വീപ് മത്സ്യത്തൊഴിലാളി കുടുംബങ്ങള്ക്ക് അനുയോജ്യമായ ഇടമായിരുന്നു. എന്നാല്, ദ്വീപ് ഒരു സ്വകാര്യ ഉടമസ്ഥതയിലാണ്. ദ്വീപിലെ വീടിന്റെ താഴത്തെ നിലകള് നിര്മ്മിച്ചിരിക്കുന്നത് ചുവന്ന ക്വാറി ടൈലുകള് കൊണ്ടാണ്. താഴത്തെ നിലകളെല്ലാം കോണ്ക്രീറ്റാണ് എന്നും മത്സ്യത്തൊഴിലാളി കുടുംബത്തില് നിന്നുള്ള ഒരു പ്രദേശവാസി പറയുന്നു. ഇവിടെയെല്ലാം കടലില് നിന്നുള്ള വെള്ളം കേറുമെന്നും അത് പിന്നീട് വൃത്തിയാക്കേണ്ടി വരുമെന്നും അയാള് പറയുന്നു. അതേസമയം മറ്റൊരാള് ചോദിക്കുന്നത് ഇത്തരമൊരു ദുരവസ്ഥയില് കഴിയാന് ആരാണ് ഇഷ്ടപ്പെടുക എന്നാണ്.
