വ്യത്യസ്തത ഉണര്ത്തുന്ന ഒട്ടനവധി വാര്ത്തകളാണ് ദിവസവും സമൂഹ മാധ്യമങ്ങളിലൂടെ വൈറലായിക്കൊണ്ടിരിക്കുന്നത്. ഇവയില് ചിലതൊക്കെ ആളുകള് അത്ര ഗൗരവമായി എടുക്കാറില്ല. എന്നാല് മറ്റുചില വാര്ത്തകളാകട്ടെ വലിയ ചര്ച്ചകള്ക്ക് കാരണമായി തീരാറുണ്ട്. സമാനമായ ഒരു വാര്ത്തയാണ് ഇപ്പോള് സമൂഹ മാധ്യമങ്ങളില് ശ്രദ്ധ നേടിക്കൊണ്ടിരിക്കുന്നത്. ടാക്സിയില് ഫോണ് മറന്നുവച്ച യുവതി, ഡ്രൈവറോട് അത് തിരികെകൊണ്ട് തരണമെന്ന് ആവശ്യപ്പെട്ട ഒരു സംഭവമാണ് ഇത്. ഒന്നും രണ്ടും കിലോമീറ്റര് അല്ല 50 കിലോമീറ്റര് താണ്ടി ഡ്രൈവര് തിരികെ കൊണ്ട് ഫോണ് തരണമെന്നതാണ് യുവതിയുടെ ആവശ്യം.
ചൈന മോര്ണിംഗ് പോസ്റ്റ് റിപ്പോര്ട്ട് ചെയ്യുന്നതനുസരിച്ച് തെക്കുകിഴക്കന് ചൈനയിലെ ഗ്വാങ്ഡോങ് പ്രവിശ്യയിലാണ് സംഭവം നടക്കുന്നത്.
ഗ്വാങ്ഷൂവിനടുത്തുള്ള ചെറിയൊരു നഗരമാണ് ഷാവോക്കിങ്ങ്. അവിടേക്കായിരുന്നു യുവതി ടാക്സിക്കാറില് യാത്ര ചെയ്തത്. എന്നാല്, ഫോണ് അതില് വച്ച് മറന്നുപോയി. താന് തന്റെ ഫോണ് കാറില് വച്ച് മറന്നു പോയി എന്ന് മനസിലാക്കിയ യുവതി ഡ്രൈവറെ വിളിച്ചു. ശേഷം തന്റെ ഫോണ് കൊണ്ടുത്തരണം എന്ന് ആവശ്യപ്പെടുകയായിരുന്നു. അതും സൗജന്യമായി കൊണ്ടുത്തരണം എന്നായിരുന്നു യുവതിയുടെ ആവശ്യം. ഇതിനോടകം സംഭവത്തിന്റെ വീഡിയോയും യുവതിയും ഡ്രൈവറും തമ്മിലുള്ള സംഭാഷണവും പുറത്തുവന്നിട്ടുണ്ടെന്നാണ് റിപ്പോര്ട്ടുകള് പറയുന്നത്.
'എന്റെ ഫോണ് തിരിച്ചു തരാമോ?' എന്നാണ് യുവതി ഡ്രൈവറോട് ചോദിക്കുന്നത്. എന്നാല്, താന് ആ സ്ഥലത്ത് നിന്നും തിരികെ പോന്നു എന്നായിരുന്നു ഡ്രൈവറുടെ മറുപടി. താന് തിരികെ വരാം പക്ഷേ ആയിരം രൂപ തരേണ്ടി വരും എന്നും ഡ്രൈവര് പറഞ്ഞു. എന്നാല്, യുവതി ആ പണം കൊടുക്കാന് വിസമ്മതിച്ചു. ഫോണ് മറന്നുവച്ചത് തന്റെ കുറ്റമല്ല, യുവതിയുടെ കുറ്റമാണ് എന്നും ഡ്രൈവര് പറയുന്നുണ്ട്. തനിക്ക് എണ്ണയടിക്കണമെങ്കില് പൈസ കൊടുക്കണമെന്നും ചാരിറ്റിക്ക് വേണ്ടിയല്ല താന് ടാക്സിയോടിക്കുന്നത് എന്നും ഡ്രൈവര് പറഞ്ഞു. ഒപ്പം താന് നില്ക്കുന്ന സ്ഥലത്ത് വന്ന് ഫോണ് വാങ്ങാനും ഡ്രൈവര് യുവതിയോട് ആവശ്യപ്പെടുന്നു. അപ്പോള് യുവതി പറയുന്നത് ഫോണ് കൊണ്ടുത്തന്നില്ലെങ്കില് ഡ്രൈവര് അത് മോഷ്ടിച്ചുവെന്ന് താന് ആരോപിക്കും എന്നാണ്. ആ സമയത്ത് ഡ്രൈവര് പറയുന്നത് എന്നാല് പോലീസ് സ്റ്റേഷനിലേക്ക വരൂ എന്നാണ്.
സംഭവം വലിയ ചര്ച്ചകള്ക്ക് വഴിവച്ചതോടെ യുവതിയ്ക്കെതിരെ നിരവധി ആളുകളാണ് വിമര്ശനം ഉന്നയിച്ച് രംഗത്തെത്തിയത്. യുവതി സ്വാര്ത്ഥയാണെന്നും ഫോണ് വാങ്ങേണ്ടത് യുവതിയുടെ ഉത്തരവാദിത്തമാണെന്നും ഭൂരിഭാഗം ആളുകളും ചൂണ്ടിക്കാട്ടി.
