വിവാദങ്ങള്ക്കിടെ നടന് മന്സൂര് അലി ഖാന് തൃഷയോട് മാപ്പ് പറഞ്ഞ് ഇന്ന് രംഗത്തെത്തിയിരുന്നു. തന്റെ വാക്കുകള് സഹപ്രവര്ത്തകയെ വേദനിപ്പിച്ചെന്നു മനസിലാക്കുന്നതായി നടന് പറഞ്ഞു.
നടന്റെ മാപ്പിന് പിന്നാലെ തൃഷ പ്രതികരിച്ചെത്തിയിരിക്കുകയാണ്. 'തെറ്റുപറ്റുന്നത് മാനുഷികമാണ്, ക്ഷമിക്കുന്നതാണ് ദൈവീകം' എന്നാണ് തൃഷ എക്സില് പോസ്റ്റ് ചെയ്തത്. മന്സൂര് അലി ഖാന്റെ പേര് പരാമര്ശിക്കാതെയാണ് തൃഷ പോസ്റ്റിട്ടത്. പോസ്റ്റിനോപ്പം കൈകൂപ്പുന്ന ഒരു ഇമോജിയും ചേര്ത്തിട്ടുണ്ട്.
ഇന്നലെയാണ് നടന് മന്സൂര് അലി ഖാന് തൃഷയ്ക്ക് മാപ്പ് പറഞ്ഞുകൊണ്ട് സോഷ്യല് മീഡിയയില് പ്രസ്തവനയിറക്കിയത്. 'എന്റെ വാക്കുകള് സഹപ്രവര്ത്തകയെ വേദനിപ്പിച്ചെന്നു മനസിലാക്കുന്നു. തൃഷ, ദയവായി എന്നോട് ക്ഷമിക്കൂ' എന്നാണ് മന്സൂര് അലി ഖാന് പുറത്തുവിട്ട പ്രസ്താവനയില് പറഞ്ഞത്.
ലിയോയില് തൃഷയ്ക്കൊപ്പം ബലാത്സംഗ സീന് ഇല്ലാത്തതില് നിരാശയുണ്ടെന്ന നടന്റെ പരാമര്ശമാണ് വിവാദത്തിലായത്.
താന് തെറ്റായി ഒന്നും പറഞ്ഞിട്ടില്ല എന്നും താന് പറഞ്ഞതിനെ തെറ്റായി വ്യാഖ്യാനിക്കുകയാണ് ചെയ്തതെന്നുമായിരുന്നു തൃഷയുടെ പ്രതികരണത്തിനെതിരെ മന്സൂര് അലി ഖാന്റെ മറുപടി. തന്നെ വ്യക്തിഹത്യ ചെയ്യാന് ശ്രമിച്ച തൃഷയ്ക്കെതിരെ പരാതി കൊടക്കുമെന്നും മന്സൂര് അലി ഖാന് പറഞ്ഞിരുന്നു. തുടര്ന്ന് വനിത കമ്മീഷന് ഇടപെടുകയും കേസ് രജിസ്റ്റര് ചെയ്യുകയുമായിരുന്നു. കഴിഞ്ഞ ദിവസം നടനെ പോലീസ് ചോദ്യം ചെയ്തു. ഇതിനു ശേഷമാണ് നടന് മാപ്പ് പറഞ്ഞ് പ്രസ്താവന പുറത്തിറക്കിയിരിക്കുന്നതും തുടര്ന്ന് തൃഷയുടെ പ്രതികരണമെത്തുന്നതും.
