ഡെറാഡൂണ്: തൊഴിലാളികളായ 41 പേര് 17 ദിവസം കുടുങ്ങിയ ഉത്തരകാശിയിലെ സില്ക്യാര - ബാര്ക്കോട്ട് തുരങ്കം കഴിഞ്ഞ അഞ്ചു വര്ഷത്തിനിടയില് തകര്ന്നുവീണത് 20 തവണ. നവംബര് 12 ന് മണ്ണിടിച്ചിലിനെ തുടര്ന്ന് തുരങ്കത്തില് കുടുങ്ങിയ 41 തൊഴിലാളികളെയും 17 ദിവസത്തിന് ശേഷം വിജയകരമായി പുറത്തെടുക്കുകയും ചെയ്തു.
നാലര കിലോമീറ്റര് നീളം വരുന്ന തുരങ്കം ചാര്ധാം ഓള് വെതര് റോഡ് പ്രൊജക്ടിന്റെ ഭാഗമായിരുന്നു. കഴിഞ്ഞ അഞ്ചു വര്ഷത്തിനിടയില് സമാനരീതിയിലുള്ള മണ്ണിടിച്ചില് പലപ്പോഴായി സംഭവിച്ചിട്ടുണ്ട്. തുരങ്ക നിര്മ്മാണ വേളയില് പല തവണ ചെറിയ രീതിയിലുള്ള ഇടിച്ചില് ഉണ്ടായിട്ടുണ്ടെന്നാണ് അധികൃതര് നല്കുന്ന സൂചന. എല്ലാത്തരം തുരങ്ക നിര്മ്മാണ ജോലികള്ക്കും ഈ രീതിയിലുള്ള പ്രതിസന്ധികള് പലപ്പോഴായി സഹിക്കേണ്ടി വന്നിട്ടുണ്ടെന്നും പറഞ്ഞു. മണ്ണിടിച്ചിലിനെ സാധാരണം എന്നാണ് ഇവര് പറയുന്നത്.
ഇത് സാധാരണ സംഭവിക്കാറുള്ളതാണെന്നും എന്നാല് ഇത്തവണ തൊഴിലാളികള് കുടുങ്ങിപ്പോയെന്ന് മാത്രമാണെന്നും പറഞ്ഞു. ഇത്തരം സംഭവങ്ങള് സില്ക്യാരയിലും തുരങ്കത്തിന്റെ മറുവശമായ ബാര്കോട്ടിലും സംഭവിച്ചിട്ടുണ്ടെന്നും പറഞ്ഞു. സില്ക്യാരയെ അപേക്ഷിച്ച് ബാര്കോട്ടില് കൂടുതല് തവണ മണ്ണിടിച്ചില് ഉണ്ടായിട്ടുണ്ടെന്നും തുരങ്കത്തിന്റെ സില്ക്യാരയിലെ മുഖഭാഗം 'റെഡ് സോണ്' എന്നാണ് അറിയപ്പെടുന്നത്.
