തിരുവനന്തപുരം: കണ്ണൂര് വിസിയായി ഗോപിനാഥ് രവീന്ദ്രന്റെ പുനര്നിയമനത്തിനായി മുഖ്യമന്ത്രിയുടെ ഓഫീസില് നിന്നും തന്നെ കാണാന് ഒമ്പതു തവണയാണ് പ്രതിനിധി എത്തിയതെന്ന് ഗവര്ണര്. സുപ്രീംകോടതി വിധി വന്നതിന് പിന്നാലെ സ്ഥിരം വിസിമാരെ നിയമിക്കാന് നടപടികള് ആരംഭിച്ചതിന് പിന്നാലെയാണ് മുഖ്യമന്ത്രിയുടെ ഓഫീസിന് നേരെയുള്ള വിമര്ശനം ഗവര്ണര് ആവര്ത്തിച്ചത്.
താന് തീരുമാനം എടുത്തത് എജിയുടെ നിയമോപദേശത്തിന്റെ അടിസ്ഥാനത്തിലാണ്. എജിയുടെ ഉപദേശം ചട്ടവിരുദ്ധമാണ്. ഇപ്പോള് നടക്കുന്നത് എല്ലാം ഭരണഘടനാ വിരുദ്ധമായ കാര്യങ്ങളാണെന്നും പറഞ്ഞു. സര്ക്കാരില് നിന്ന് ഉപദേശം തേടുന്നതില് തനിക്ക് എതിര്പ്പില്ല. പക്ഷെ സമ്മര്ദ്ദങ്ങള്ക്ക് വഴങ്ങില്ലെന്നും പറഞ്ഞു. ഓര്ഡിനന്സ് ഒപ്പിടുന്നില്ലെന്ന ആരോപണത്തിലും ഗവര്ണര് വിമര്ശനം ഉന്നയിച്ചു.
ഓര്ഡിനന്സ് ഒപ്പിടുന്നില്ല എന്നത് ശരിയല്ലെന്നും അടിയന്തര പ്രാധാന്യമുള്ള ഓര്ഡിനന്സ് ആണെങ്കില് മുഖ്യമന്ത്രി രാജ് ഭവനില് എത്തി വിശദീകരിക്കട്ടെയെന്നും പറഞ്ഞു. മുഖ്യമന്ത്രിയെ രാജ്ഭവനിലേക്ക് ക്ഷണിക്കുകയാണെന്നും മാധ്യമങ്ങളോട് സംസാരിക്കുന്നതിന് പകരം മുഖ്യമന്ത്രി രാജ്ഭവനില് വന്ന് വിശദീകരിക്കുകയാണ് വേണ്ടതെന്നും ഗവര്ണര് പറഞ്ഞു.
