ആലപ്പുഴ: നവകേരള സദസ്സ് കടന്നുപോകവെ മുദ്രാവാക്യം വിളിച്ചു എന്നാരോപിച്ച് കെ എസ് യൂ പ്രവര്ത്തകരെ മുഖ്യമന്ത്രിയുടെ അംഗരക്ഷകരും ഗണ്മാനും ആക്രമിച്ചതായി പരാതി. മുഖ്യമന്ത്രിക്കെതിരെ മുദ്രാവാക്യം വിളിച്ചു എന്നാരോപിച്ച് ഗണ്മാനും അംഗരക്ഷകരും കെ എസ് യൂ പ്രവര്ത്തകരെ വളഞ്ഞിട്ട് മര്ദ്ദിക്കുകയായിരുന്നു. ആക്രമണത്തില് യൂത്ത് കോണ്ഗ്രസ് സെക്രട്ടറി അജയ് ജുവല് കുര്യക്കോസിന് തലയ്ക്ക് പരിക്കേറ്റു. അജയ് ആശുപത്രിയില് ചികിത്സയിലാണ്. ആലപ്പുഴ ജനറല് ആശുപത്രി ജംഗ്ഷനിലായിരുന്നു സംഭവം.
നവകേരള സദസ്സ് ബസ് കടന്നുപോകുന്നതിനിടയിലാണ് യൂത്ത് കോണ്ഗ്രസ് പ്രവര്ത്തകര് മുദ്രാവാക്യം വിളിച്ച് ഓടിയെത്തിയത്. ഇവരെ പോലീസ് ഉടന് തന്നെ പിടിച്ചു മാറ്റുകയും ചെയ്തു. പോലീസുകാര് പിടിച്ചുവച്ചവരെ വാഹനത്തില് നിന്നു ഇറങ്ങി വന്ന അംഗരക്ഷകര് ലാത്തികൊണ്ട് ക്രൂരമായി മര്ദ്ദിക്കുകയായിരുന്നു.
അതേസമയം കൈതവനം ജംഗ്ഷനില് വെച്ച് മുഖ്യമന്ത്രിയുടെ വാഹനവ്യൂഹത്തിന് നേരെ യൂത്ത് കോണ്ഗ്രസിന്റെ കരിങ്കൊടി പ്രതിഷേധമുണ്ടായിരുന്നു. യൂത്ത് കോണ്ഗ്രസ് ജില്ലാ പ്രസിഡന്റ് എം ബി പ്രവീണിന്റെ നേതൃത്വത്തിലാണ് പ്രതിഷേധിച്ചത്. അമ്പലപ്പുഴ നവകേരള സദസ്സ് പരിപാടി പൂര്ത്തിയാക്കി കുട്ടനാട്ടിലേക്ക് പോകവെയാണ് യൂത്ത് കോണ്ഗ്രസ് പ്രവര്ത്തകര് കരിങ്കൊടി കാണിച്ച് പ്രതിഷേധിച്ചത്. നവംബര് 18 ന് ആരംഭിച്ച നവകേരള യാത്ര വ്യാഴാഴ്ചയാണ് ആലപ്പുഴ ജില്ലയില് പ്രവേശിച്ചത്.
