കുന്നംകുളം: നടി ഗൗതമിയുടെ 25 കോടി മൂല്യമുള്ള സ്വത്ത് തട്ടിയെടുത്ത കേസില് ഒളിവില് കഴിഞ്ഞിരുന്ന മുഖ്യപ്രതികളെ തമിഴ്നാട് പോലീസ് കുന്നംകുളത്ത് അറസ്റ്റ് ചെയ്തു. തമിഴ്നാട് സ്വദേശികളായ അളഗപ്പന് (62), ഭാര്യ നാച്ചല് (56), മകന് ശിവ (32), ബന്ധുക്കളായ ആരതി (28), സതീഷ് (27) എന്നിവരാണ് അറസ്റ്റിലായത്. കുന്നംകുളം ചൂണ്ടല് പുതുശേരി എഴുത്തുപുരക്കല് ബില്ഡിങ് ക്വാര്ട്ടേഴ്സില് വാടകയ്ക്ക് മുറികളെടുത്ത് ഒളിവില് കഴിയുകയായിരുന്ന സംഘത്തെ ചെൈന്ന ക്രൈംബ്രാഞ്ചാണ് ഇന്നലെ രാവിലെ പിടികൂടിയത്.
കഴിഞ്ഞ ദിവസം ചെൈന്ന ഹൈക്കോടതി അളഗപ്പന്റെ മുന്കൂര് ജാമ്യം തള്ളിയിരുന്നു. കുന്നംകുളം ചൊവ്വന്നൂര് ഗ്രാമപഞ്ചായത്ത് ബി.ജെ.പി. മെംബറായ അജിതയുടെ ഭര്ത്താവും ബി.ജെ.പി. പ്രാദേശിക നേതാവും വോയ്സ് ഓഫ് കുന്നംകുളം എന്ന പേരില് ഓണ്ലൈന് ചാനല് നടത്തിപ്പുകാരനുമായ കാണിപ്പയ്യൂര് മാന്തോപ്പ് പൊട്ടക്കുളം റോഡില് വാടകയ്ക്ക് താമസിക്കുന്ന വിശാലാ(40) ണ് തട്ടിപ്പ് സംഘത്തിന് ചൂണ്ടല് പുതുശേരിയില് ഒളിത്താവളം ഒരുക്കാന് ഒത്താശ ചെയ്തതെന്ന് പോലീസ് പറഞ്ഞു.
ഇന്നലെ രാവിലെ തമിഴ്നാട് ക്രൈംബ്രാഞ്ച് പോലീസ് വിശാലും കുടുംബവും വാടകയ്ക്ക് താമസിക്കുന്ന കാണിപ്പയ്യൂര് മാന്തോപ്പിലെ വീട്ടിലെത്തി വിശാലിനെ കസ്റ്റഡിയിലെടുത്ത് ചോദ്യംചെയ്തു വിട്ടയച്ചിരുന്നു. പിന്നീട് തിരിച്ചുപോയ സംഘം വീണ്ടും രാവിലെ 10നു വീട്ടിലെത്തിയെങ്കിലും വിശാലും കുടുംബവും വീടുപൂട്ടി സ്ഥലംവിട്ടിരുന്നു.
വിശാലിന്റെ ഭാര്യ അജിത ജോലി ചെയ്യുന്ന കേച്ചേരിയിലെ സ്വകാര്യ സ്ഥാപനത്തിലും തമിഴ്നാട് ക്രൈംബ്രാഞ്ച് പോലീസ് തെരിച്ചിലും പരിശോധനയും നടത്തി. വിശാലിനുവേണ്ടി വീട്ടില് നോട്ടീസ് പതിച്ച ശേഷമാണു പോലീസ് തിരിച്ചുപോയത്. ഒളിത്താവളമൊരുക്കാന് പ്രതികളെ വിശാലിനു പരിചയപ്പെടുത്തി കൊടുത്തതാരാണെന്നു കണ്ടെത്തിയാല് മാത്രമെ ഈ കേസിലെ മറ്റ് പ്രതികളുടെ പങ്ക് വ്യക്തമാകുകയുള്ളുവെന്ന് പോലീസ് പറഞ്ഞു. കഴിഞ്ഞ രണ്ടു ദിവസമായി ചെൈന്ന പോലീസ് കമ്മിഷണറും ക്രൈംബ്രാഞ്ച് പോലീസും തൃശൂരില് ക്യാമ്പ് ചെയ്താണു ചൂണ്ടല് പുതുശേരിയിലെ ഒളിത്താവളം കണ്ടെത്തിയത്.
പ്രതികള് താമസിച്ചിരുന്ന ചൂണ്ടല് പുതുശേരിയിലെ എഴുത്തുപുരക്കല് ബില്ഡിങ് ക്വാര്ട്ടേഴ്സ് കേച്ചേരി സ്വദേശിയുടെ ഉടമസ്ഥതയിലുള്ളതാണ്. ബി.ജെ.പി. പ്രാദേശിക നേതാവായ ഷാജിയാണു ക്വാര്ട്ടേഴ്സ് നടത്തിക്കൊണ്ടുപോയിരുന്നത്. വിശാലിന്റെ അറിവോടെ ഭാര്യ ബി.ജെ.പി. പഞ്ചായത്ത് മെംബറായ അജിത വഴിയാണ് ഈ ക്വാര്ട്ടേഴ്സ് പ്രതികള്ക്ക് താമസിക്കാന് ഏര്പ്പാടാക്കി കൊടുത്തതെന്ന് പോലീസ് പറഞ്ഞു.
പ്രതികള്ക്ക് താവളമൊരുക്കിയത് ബി.ജെ.പി. നേതാവെന്ന് സി.പി.എം.
കുന്നംകുളം: സിനിമാതാരം ഗൗതമിയുടെ സ്ഥലം തട്ടിയെടുത്ത സംഭവത്തില് പ്രതികള്ക്ക് താവളമൊരുക്കിയത് ജില്ലയിലെ ഉന്നത ബി.ജെ.പി. നേതാവാണന്നു സി.പി.എം. കുന്നംകുളം ഏരിയാ കമ്മിറ്റി. കൊടകര കുഴല്പ്പണക്കേസ് പ്രതികളായ കവര്ച്ച സംഘത്തെ സംരക്ഷിച്ചതും ഇതേ ഉന്നത നേതാവാണെന്നും സി.പി.എം. കുറ്റപ്പെടുത്തി. ഈ നേതാവ് കുന്നംകുളത്ത് മത്സരിക്കുമ്പോള് സോഷ്യല് മീഡിയ കൈകാര്യം ചെയ്തത് വിശാലായിരുന്നു. ഈ അടുപ്പമാണ് തമിഴ്നാട്ടിലെ തട്ടിപ്പുസംഘത്തിന് ഒളിത്താവളം ഒരുക്കാന് ഉപയോഗിച്ചത്.
തട്ടിപ്പുകാര്ക്ക് ഒളിത്താവളം ഒരുക്കി സംരക്ഷിച്ച വിശാല്, ഭാര്യ അജിത എന്നിവരെ അറസ്റ്റ് ചെയ്യണമെന്നും ചൊവ്വന്നൂര് ഗ്രാമപഞ്ചായത്ത് 12 -ാം വാര്ഡംഗം അജിത വിശാല് രാജിവക്കണമെന്നും സി.പി.എം. കുന്നംകുളം ഏരിയാ സെക്രട്ടറി എം.എന്. സത്യന് ആവശ്യപ്പെട്ടു.
പവര് ഓഫ് അറ്റോര്ണിയുടെ മറവില് തട്ടിയത് 25 കോടി
കുന്നംകുളം: പവര് ഓഫ് അറ്റോര്ണിയുടെ മറവില് തമിഴ് സിനിമ നടി ഗൗതമിയുടെ പക്കല്നിന്നു തട്ടിയെടുത്തത് 25 കോടി. ഗൗതമിയുടെ സ്വത്ത് അളഗപ്പന് സ്വന്തം കുടുംബാംഗങ്ങളുടെ പേരിലേക്ക് മാറ്റിയെന്നും 5.96 കോടി രൂപ ഗൗതമിയുടെ ബാങ്ക് അക്കൗണ്ടില്നിന്നു ട്രാന്സ്ഫര് ചെയ്തുവെന്നുമാണ് പരാതി. നവംബര് 11നു ഗൗതമിയുടെ പരാതിയില് ആറുപേര്ക്കെതിരേ കേസ് എടുത്തിരുന്നു.
ശ്രീപെരുമ്പത്തൂരില് ഉള്പ്പെടെ തമിഴ്നാട്ടിലെ വിവിധ ഭാഗങ്ങളിലായുള്ള ഭൂമിയാണു തട്ടിയെടുക്കപ്പെട്ടതെന്നും താനും മകളും വധഭീഷണി നേരിടുകയാണെന്നും ഗൗതമി പരാതിയില് പറഞ്ഞിരുന്നു. 46 ഏക്കര് വരുന്ന സ്ഥലം വിറ്റുതരാമെന്നു പറഞ്ഞ് കെട്ടിട നിര്മാതാവായ അളഗപ്പനും ഭാര്യയും തന്നെ സമീപിക്കുകയായിരുന്നുവെന്നാണു ഗൗതമി പറയുന്നത്. സംസാരത്തിലൂടെ വിശ്വാസം പിടിച്ചുപറ്റി. അതു കൊണ്ട് അവര്ക്ക് പവര് ഓഫ് അറ്റോര്ണി നല്കുകയായിരുന്നത്രേ. എന്നാല് വ്യാജരേഖകളും തന്റെ ഒപ്പും ഉപയോഗിച്ച് അവര് 25 കോടിയുടെ സ്വത്തുക്കള് തട്ടിയെടുക്കുകയാണു ചെയ്തതെന്നും ഗൗതമി പറയുന്നു. ബാങ്ക് ഇടപാടുകള് പരിശോധിച്ചത് പ്രകാരം നാല് തട്ടിപ്പുകളാണ്.
