ന്യൂഡല്ഹി: അയോദ്ധ്യയിലെ രാമക്ഷേത്ര ഉദ്ഘാടനത്തിനുള്ള ക്ഷണം നിരസിച്ച സിപിഎം ജനറല് സെക്രട്ടറി സീതാറാം യെച്ചൂരിയ്ക്ക് നേരെ ഒളിയമ്പെറിഞ്ഞ് വിശ്വഹിന്ദു പരിക്ഷത്ത്. ജനുവരി 22 ന് നടക്കുന്ന രാമക്ഷേത്ര അഭിക്ഷേക ദിനത്തില് സിപിഎം ജനറല് സെക്രട്ടറിയേയും ക്ഷണിച്ചിരുന്നെങ്കിലും അദ്ദേഹം ക്ഷണം നിരസിച്ചിരുന്നു.
എന്നാല് കമ്യൂണിസ്റ്റ് നേതാവില് നിന്നും ഇതില് കൂടുതല് പ്രതിക്ഷീക്കുന്നില്ലെന്ന് പ്രതികരിച്ച വിഎച്ച്പി നേതാക്കള് 'രാമന്, രാമത്വ, ഭാരതം' എന്നതിലേക്ക് മടങ്ങുന്നതിലൂടെ 'സീതാറാം' എന്ന പേര് കൂടുതല് അന്വര്ത്ഥമാക്കപ്പെടേണ്ടതുണ്ടെന്നും പറഞ്ഞു. നേരത്തേ മതം ഒരാളുടെ വ്യക്തിപരമായ കാര്യമാണെന്നും അതിനെ ഒരു രാഷ്ട്രീയ നേട്ടത്തിനുള്ള ഉപകരണമാക്കി മാറ്റരുതെന്നും പറഞ്ഞു.
ഇതിന് വിഎച്ച്പിയുടെ ദേശീയ വക്താവ് വിനോദ് ഭന്സാല് എക്സിലൂടെയാണ് മറുപടി നല്കിയത്. സീതാറാം എന്ന് പേരുള്ള ആള് പോലും അയോദ്ധ്യയിലേക്ക് പോകുന്നില്ല. രാഷ്ട്രീയ എതിര്പ്പ് മനസ്സിലാക്കാവുന്ന കാര്യമാണ്. എന്നാല് ഒരാള് സ്വന്തം പേരിനോട് പോലും ഇത്ര വെറുപ്പ് കാട്ടുന്നെങ്കില് അയാള്ക്ക് ഒരു കമ്യൂണിസ്റ്റ് ആയിട്ടേ ഇരിക്കാനാകൂ.'' എന്നായിരുന്നു വിനോദ് ഭന്സാല് കുറിച്ചത്.
യെച്ചൂരിയുടെ പാര്ട്ടിയോടുള്ള പ്രതിബദ്ധത എന്തുമാകട്ടെ. പക്ഷേ സിപിഎം ജനറല് സെക്രട്ടറിയുടെ ശ്രീരാമനോടും സ്വന്തം പേരിനോടും ഉള്ള എതിര്പ്പ് എന്തിനെന്ന് മനസ്സിലാകുന്നില്ലെന്നും ഇക്കാര്യത്തില് സിപിഎം സംസ്ഥാന സെക്രട്ടറി കൂടുതല് വ്യക്തത വരുത്തേണ്ടതുണ്ടെന്നും ഭന്സാല് വീഡിയോ പ്രസ്താവനയിലൂടെയും പറഞ്ഞു. രാജ്യം രാമനിലേക്കും രാമത്വത്തിലേക്കും മടങ്ങി വരുമ്പോള് എത്രകാലം ഇവര്ക്കൊക്കെ എതിര്ക്കാന് കഴിയുമെന്നും വിഎച്ച്പി നേതാവ് ചോദിച്ചു. രാമനിലേക്കും രാമത്വത്തിലേക്കും ഭാരതത്തിലേക്കും മടങ്ങാന് യൂച്ചൂരിയെ ക്ഷണിച്ച വിഎച്ച്പി നേതാവ് അല്ലെങ്കില് എങ്ങിനെ പ്രതികരിക്കണമെന്ന് ജനങ്ങള്ക്ക് കാണിച്ചുതരുമെന്നും പറഞ്ഞു.
